ಪಂಜಾಬಿ ಶೈಲಿಯ ಟೊಮೆಟೊ ಚಟ್ನಿ ಅದರ ವಿಶಿಷ್ಟವಾದ ಸುಟ್ಟ ಘಮ ಮತ್ತು ಖಾರಕ್ಕೆ ಹೆಸರುವಾಸಿ. ಪರೋಟ, ರೊಟ್ಟಿ ಅಥವಾ ಬಿಸಿ ಅನ್ನದ ಜೊತೆ ಈ ಚಟ್ನಿ ಅದ್ಭುತ ರುಚಿ ನೀಡುತ್ತದೆ. ಸುಲಭವಾಗಿ ಮತ್ತು ಕಡಿಮೆ ಸಮಯದಲ್ಲಿ ಇದನ್ನು ಮಾಡುವ ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು:
- ಟೊಮೆಟೊ: 2
- ಹಸಿಮೆಣಸಿನಕಾಯಿ: 2
- ಬೆಳ್ಳುಳ್ಳಿ ಎಸಳು: 4-5
- ತಾಜಾ ಕೊತ್ತಂಬರಿ ಸೊಪ್ಪು: 2-3 ಚಮಚ
- ಉಪ್ಪು ಮತ್ತು ಕಪ್ಪು ಉಪ್ಪು: ರುಚಿಗೆ ತಕ್ಕಷ್ಟು
- ಹುರಿದ ಜೀರಿಗೆ ಪುಡಿ: 1 ಚಮಚ
- ಸಾಸಿವೆ ಎಣ್ಣೆ: 2 ಚಮಚ
- ಸಕ್ಕರೆ: ಒಂದು ಚಿಟಿಕೆ
ತಯಾರಿಸುವ ವಿಧಾನ: ಮೊದಲು ಟೊಮೆಟೊ, ಹಸಿಮೆಣಸಿನಕಾಯಿ ಮತ್ತು ಬೆಳ್ಳುಳ್ಳಿಯನ್ನು ನೇರವಾಗಿ ಉರಿಯಲ್ಲಿ ಅಥವಾ ಹದವಾಗಿ ಸುಟ್ಟುಕೊಳ್ಳಿ. ಟೊಮೆಟೊ ಚೆನ್ನಾಗಿ ಬೆಂದು ಅದರ ಮೇಲಿನ ಸಿಪ್ಪೆ ಕಪ್ಪಾಗುವವರೆಗೆ ಸುಡಬೇಕು. ನಂತರ ಸುಟ್ಟ ಟೊಮೆಟೊಗಳ ಮೇಲಿರುವ ಸಿಪ್ಪೆಯನ್ನು ತೆಗೆದು ಸಣ್ಣದಾಗಿ ಹೆಚ್ಚಿಕೊಳ್ಳಿ.
ಒಂದು ಕುಟ್ಟಾಣಿಗೆ ಸುಟ್ಟ ಹಸಿಮೆಣಸಿನಕಾಯಿ, ಬೆಳ್ಳುಳ್ಳಿ, ಕೊತ್ತಂಬರಿ ಸೊಪ್ಪು ಮತ್ತು ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಜಜ್ಜಿ ಪೇಸ್ಟ್ ಮಾಡಿಕೊಳ್ಳಿ. ಇದನ್ನು ಒಂದು ಬಟ್ಟಲಿಗೆ ವರ್ಗಾಯಿಸಿ. ಅದೇ ಕುಟ್ಟಾಣಿಯಲ್ಲಿ ಹೆಚ್ಚಿದ ಟೊಮೆಟೊಗಳನ್ನು ಹಾಕಿ ನುಣ್ಣಗೆ ಕುಟ್ಟಿ, ಮೊದಲು ಸಿದ್ಧಪಡಿಸಿದ ಮಿಶ್ರಣಕ್ಕೆ ಸೇರಿಸಿ.
ಈ ಮಿಶ್ರಣಕ್ಕೆ ಸಾಸಿವೆ ಎಣ್ಣೆ, ಕಪ್ಪು ಉಪ್ಪು, ಹುರಿದ ಜೀರಿಗೆ ಪುಡಿ ಮತ್ತು ಒಂದು ಚಿಟಿಕೆ ಸಕ್ಕರೆ ಸೇರಿಸಿ ಚೆನ್ನಾಗಿ ಬೆರೆಸಿ. ಈಗ ರುಚಿಕರವಾದ ಪಂಜಾಬಿ ಟೊಮೆಟೊ ಚಟ್ನಿ ಸಿದ್ಧ. ಇದನ್ನು ಪರೋಟ ಅಥವಾ ರೊಟ್ಟಿಯೊಂದಿಗೆ ಬಡಿಸಿ ಸವಿಯಿರಿ.
