ಬೆಂಗಳೂರು: ಗರ್ಭಧಾರಣೆಯ ಅವಧಿಯಲ್ಲಿ ಹೆಚ್ಚು ವಾಯು ಮಾಲಿನ್ಯ ಇರುವ ಪ್ರದೇಶಗಳಲ್ಲಿ ವಾಸಿಸುವ ಗರ್ಭಿಣಿಯರು ಎಚ್ಚರಿಕೆ ವಹಿಸಬೇಕು. ಏಕೆಂದರೆ, ವಾಯು ಮಾಲಿನ್ಯವು ತಾಯಿಯ ಆರೋಗ್ಯದ ಜೊತೆಗೆ ಗರ್ಭದಲ್ಲಿರುವ ಮಗುವಿನ ಮೆದುಳಿನ ಬೆಳವಣಿಗೆಯ ಮೇಲೂ ಪ್ರತಿಕೂಲ ಪರಿಣಾಮ ಬೀರಬಹುದು ಎಂದು The Lancet Planetary Health ಜರ್ನಲ್ನಲ್ಲಿ ಪ್ರಕಟವಾದ ಅಧ್ಯಯನವೊಂದು ತಿಳಿಸಿದೆ.
ವಿಶೇಷವಾಗಿ ನೈಟ್ರೋಜನ್ ಡೈಆಕ್ಸೈಡ್ (NO₂), PM2.5 (ಸೂಕ್ಷ್ಮ ಕಣ ಮಾಲಿನ್ಯ) ಮತ್ತು ಬ್ಲ್ಯಾಕ್ ಕಾರ್ಬನ್ ಮೊದಲಾದ ವಾಯು ಮಾಲಿನ್ಯಕಾರಕಗಳು ಶಿಶುವಿನ ಮೆದುಳಿನ ರಚನೆಯಲ್ಲಿ ಸಣ್ಣ ಪ್ರಮಾಣದ ಬದಲಾವಣೆಗಳನ್ನು ಉಂಟುಮಾಡಬಹುದು ಎಂದು ಸಂಶೋಧಕರು ಹೇಳಿದ್ದಾರೆ. ಬಾರ್ಸಿಲೋನಾದ BiSC ಯೋಜನೆಯಡಿ ಸುಮಾರು 754 ಗರ್ಭಿಣಿಯರ ಮೇಲೆ ಈ ಅಧ್ಯಯನ ನಡೆಸಲಾಗಿದೆ. ಗರ್ಭಧಾರಣೆಯ ಎರಡನೇ ಹಾಗೂ ಮೂರನೇ ತ್ರೈಮಾಸಿಕದಲ್ಲಿ ಮಾಲಿನ್ಯಕ್ಕೆ ಒಳಗಾದ ಮಹಿಳೆಯರ ಗರ್ಭದಲ್ಲಿದ್ದ ಶಿಶುಗಳ ಮೆದುಳಿನ ರಚನೆಯನ್ನು ಟ್ರಾನ್ಸ್ವ್ಯಾಜೈನಲ್ ನ್ಯೂರೋಸೊನೋಗ್ರಫಿ (ವಿಶೇಷ ಅಲ್ಟ್ರಾಸೌಂಡ್ ಪರೀಕ್ಷೆ) ಮೂಲಕ ಪರಿಶೀಲಿಸಲಾಯಿತು.
ಅಧ್ಯಯನದಲ್ಲಿ ಶಿಶುಗಳ ಲ್ಯಾಟರಲ್ ವೆಂಟ್ರಿಕಲ್ಸ್ (ಮೆದುಳಿನ ಕುಹರಗಳು) ಗಾತ್ರ ಹೆಚ್ಚಾಗಿರುವುದು, ಸಿಸ್ಟರ್ನಾ ಮ್ಯಾಗ್ನಾ ವಿಸ್ತರಿಸಿರುವುದು ಹಾಗೂ ಚಲನ ಕೌಶಲ್ಯಗಳಿಗೆ ಸಂಬಂಧಿಸಿದ ಮೆದುಳಿನ ಭಾಗಗಳಲ್ಲಿ ಸಣ್ಣ ಬದಲಾವಣೆಗಳು ಕಂಡುಬಂದಿವೆ. ಇವು ಮುಂದಿನ ದಿನಗಳಲ್ಲಿ ಮಗುವಿನ ಮೆದುಳಿನ ಬೆಳವಣಿಗೆ, ಚಲನ ಸಾಮರ್ಥ್ಯ ಹಾಗೂ ಸಂವೇದನಾ ಮಾಹಿತಿ ಸಂಸ್ಕರಣೆಯ ಮೇಲೆ ಪರಿಣಾಮ ಬೀರಬಹುದೆಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇತರೆ ಅಪಾಯಗಳೇನು?
ವಾಯು ಮಾಲಿನ್ಯದಿಂದ ಗರ್ಭಿಣಿಯರಲ್ಲಿ ಉಸಿರಾಟದ ತೊಂದರೆಗಳು ಹಾಗೂ ಆಸ್ತಮಾ ಅಪಾಯ ಹೆಚ್ಚಾಗಬಹುದು. ಅಲ್ಲದೆ, ಮಾಲಿನ್ಯಕಾರಕಗಳು ಪ್ಲಾಸೆಂಟಾ ಮೂಲಕ ಶಿಶುವಿಗೆ ತಲುಪಿ ಉರಿಯೂತ (Inflammation) ಮತ್ತು ಆಕ್ಸಿಡೇಟಿವ್ ಒತ್ತಡ (Oxidative Stress) ಉಂಟುಮಾಡಿ ಮೆದುಳಿನ ಬೆಳವಣಿಗೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.ಆದರೆ, ಈ ಬದಲಾವಣೆಗಳು ಸಾಮಾನ್ಯವಾಗಿ ಸಣ್ಣ ಮಟ್ಟದಲ್ಲಿರುತ್ತವೆ ಮತ್ತು ಪ್ರತಿಯೊಬ್ಬ ಶಿಶುವಿನಲ್ಲೂ ರೋಗಕಾರಕ (Pathological) ಬದಲಾವಣೆಗಳಾಗುವುದಿಲ್ಲ ಎಂದು ಅಧ್ಯಯನ ತಿಳಿಸಿದೆ.
ಗರ್ಭಿಣಿಯರು ಯಾವ ಮುನ್ನೆಚ್ಚರಿಕೆ ವಹಿಸಬೇಕು?
- ಹೆಚ್ಚು ವಾಹನ ಸಂಚಾರ ಇರುವ ಪ್ರದೇಶಗಳಲ್ಲಿ ಅನಗತ್ಯವಾಗಿ ಸಂಚರಿಸುವುದನ್ನು ತಪ್ಪಿಸಿ.
- ಹೊಗೆ ಅಥವಾ ಮಂಜು ಹೆಚ್ಚಿರುವ ದಿನಗಳಲ್ಲಿ ಹೊರಗೆ ಹೋಗುವುದನ್ನು ಸಾಧ್ಯವಾದಷ್ಟು ಕಡಿಮೆ ಮಾಡಿ.
- ಅಗತ್ಯವಿದ್ದರೆ ಮಾಸ್ಕ್ ಧರಿಸಿ.
- ಮನೆಯನ್ನು ಸ್ವಚ್ಛವಾಗಿಡಿ.
- ಸಾಧ್ಯವಾದರೆ ಏರ್ ಪ್ಯೂರಿಫೈಯರ್ ಬಳಸಿ.
- ನಗರಗಳಲ್ಲಿ ವಾಯು ಮಾಲಿನ್ಯ ನಿಯಂತ್ರಣಕ್ಕಾಗಿ ಹಸಿರು ಇಂಧನ ಬಳಕೆ ಹಾಗೂ ಸಂಚಾರ ನಿಯಂತ್ರಣದಂತಹ ನೀತಿಗಳನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸುವ ಅಗತ್ಯವಿದೆ ಎಂದು ಆರೋಗ್ಯ ತಜ್ಞರು ಹೇಳಿದ್ದಾರೆ.
ಗಮನಿಸಿ: ಮೇಲಿನ ಮಾಹಿತಿಯು ಇಂಟರ್ನೆಟ್ನಲ್ಲಿ ಲಭ್ಯವಿರುವ ಅಧ್ಯಯನಗಳ ಆಧಾರದ ಮೇಲೆ ನೀಡಲಾಗಿದೆ. ಇದು ಸಾರ್ವಜನಿಕ ಅರಿವಿಗಾಗಿ ಮಾತ್ರ. ಯಾವುದೇ ಅನುಮಾನಗಳಿದ್ದರೆ ವೈದ್ಯರು ಅಥವಾ ಆರೋಗ್ಯ ತಜ್ಞರನ್ನು ಸಂಪರ್ಕಿಸಿ.
