ಮುಂಬೈ ನಗರವು ಹೆಣ್ಣುಮಕ್ಕಳಿಗೆ ಸುರಕ್ಷಿತ ಎಂಬ ಮಾತಿದೆ, ಆದರೆ ರಿಯಾಲಿಟಿ ಶೋ ‘ಸ್ಪ್ಲಿಟ್ಸ್ವಿಲ್ಲಾ 16’ ಖ್ಯಾತಿಯ ಪ್ರೀತ್ ಸಿಂಗ್ ಅವರಿಗೆ ಅಲ್ಲಿ ಭೀಕರ ಅನುಭವವೊಂದು ಎದುರಾಗಿದೆ. ಮುಂಬೈನ ಕ್ಲಬ್ ಒಂದರಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬ ತನ್ನ ಮೇಲೆ ದೈಹಿಕವಾಗಿ ಹಲ್ಲೆ ನಡೆಸಿದ್ದಾನೆ ಎಂದು ಪ್ರೀತ್ ಸಿಂಗ್ ಗಂಭೀರ ಆರೋಪ ಮಾಡಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಅವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿದ್ದು, ಅದರಲ್ಲಿ ಅವರ ಊದಿಕೊಂಡ ಮುಖ ಮತ್ತು ಗಾಯದ ಗುರುತುಗಳನ್ನು ಕಂಡು ಅಭಿಮಾನಿಗಳು ಬೆಚ್ಚಿಬಿದ್ದಿದ್ದಾರೆ.
ಘಟನೆ ನಡೆದಿದ್ದು ಹೇಗೆ? ಪ್ರೀತ್ ಸಿಂಗ್ ಅವರು ತಮ್ಮ ಸ್ನೇಹಿತೆಯೊಂದಿಗೆ ಕ್ಲಬ್ನಲ್ಲಿ ಕುಳಿತು ಸಮಯ ಕಳೆಯುತ್ತಿದ್ದಾಗ, ಅಲ್ಲಿಗೆ ಬಂದ ಇನ್ಫ್ಲುಯೆನ್ಸರ್ ಒಬ್ಬರು ಇವರೊಂದಿಗೆ ವಾಗ್ವಾದಕ್ಕೆ ಇಳಿದಿದ್ದಾರೆ ಎನ್ನಲಾಗಿದೆ. ಈ ವೇಳೆ ಆ ಇನ್ಫ್ಲುಯೆನ್ಸರ್ ಜೊತೆಗಿದ್ದ ಪುರುಷ ಸ್ನೇಹಿತ ಏಕಾಏಕಿ ಪ್ರೀತ್ ಮೇಲೆ ದಾಳಿ ನಡೆಸಿದ್ದಾನೆ. ಹಲ್ಲೆಯ ತೀವ್ರತೆಗೆ ಪ್ರೀತ್ ಅವರ ಮುಖ ಊದಿಕೊಂಡಿದ್ದು, ಒಂದು ಹಲ್ಲು ಕೂಡ ಮುರಿದಿದೆ. “ನಾನು ಮತ್ತು ನನ್ನ ಸ್ನೇಹಿತೆ ಶಾಂತವಾಗಿದ್ದೆವು, ಆದರೆ ಆ ಹುಡುಗಿ ಜಗಳ ಶುರು ಮಾಡಿದಳು. ಕೂಡಲೇ ಅವಳ ಸ್ನೇಹಿತ ಬಂದು ನಮಗೆ ಹೊಡೆಯಲು ಶುರು ಮಾಡಿದ,” ಎಂದು ಪ್ರೀತ್ ನೋವು ತೋಡಿಕೊಂಡಿದ್ದಾರೆ.
ಇನ್ಸ್ಟಾಗ್ರಾಮ್ನಲ್ಲಿ ಆಕ್ರೋಶ ನನ್ನ ಕಣ್ಣುಗಳು ಊದಿಕೊಂಡಿವೆ, ಮುಖವೆಲ್ಲಾ ರಕ್ತದ ಕಲೆಗಳಿಂದ ಕೂಡಿದೆ, ಈ ಘಟನೆಯಿಂದ ನಾನು ಇನ್ನೂ ಆಘಾತದಲ್ಲಿದ್ದೇನೆ ಎಂದು ಪ್ರೀತ್ ಬರೆದುಕೊಂಡಿದ್ದಾರೆ. ಮುಂಬೈನಂತಹ ನಗರದಲ್ಲಿ ಇಷ್ಟು ಬಹಿರಂಗವಾಗಿ ಹಲ್ಲೆ ನಡೆದಿರುವುದು ಆತಂಕಕಾರಿ ಎಂದು ಅವರು ಪ್ರಶ್ನಿಸಿದ್ದಾರೆ. ಪ್ರೀತ್ ಸಿಂಗ್ ಅವರ ಈ ಪೋಸ್ಟ್ಗೆ ಚಿತ್ರರಂಗದ ಹಲವು ಗಣ್ಯರು ಬೆಂಬಲ ವ್ಯಕ್ತಪಡಿಸಿದ್ದಾರೆ. ನಟಿ ಫಾತಿಮಾ ಸನಾ ಶೇಖ್ ಸೇರಿದಂತೆ ಹಲವರು ತಕ್ಷಣವೇ ಪೊಲೀಸ್ ದೂರು ದಾಖಲಿಸುವಂತೆ ಸಲಹೆ ನೀಡಿದ್ದಾರೆ.
ಕಾನೂನು ಕ್ರಮಕ್ಕೆ ಆಗ್ರಹ ಪ್ರೀತ್ ಅವರ ಸಹ-ಸ್ಪರ್ಧಿಗಳಾದ ಝಲಕ್ ಗೋಹಿಲ್ ಮತ್ತು ರುರು ಠಾಕೂರ್ ಕೂಡ ಈ ಘಟನೆಯನ್ನು ಖಂಡಿಸಿದ್ದಾರೆ. ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಆ ಇನ್ಫ್ಲುಯೆನ್ಸರ್ ಮತ್ತು ಹಲ್ಲೆ ಮಾಡಿದ ವ್ಯಕ್ತಿಯ ಹೆಸರನ್ನು ಬಹಿರಂಗಪಡಿಸುವಂತೆ ಅಭಿಮಾನಿಗಳು ಒತ್ತಾಯಿಸುತ್ತಿದ್ದಾರೆ. ಸದ್ಯಕ್ಕೆ ಪ್ರೀತ್ ಚಿಕಿತ್ಸೆ ಪಡೆಯುತ್ತಿದ್ದು, ಈ ಸಂಬಂಧ ಶೀಘ್ರದಲ್ಲೇ ಕಾನೂನು ಹೋರಾಟ ನಡೆಸುವ ಸಾಧ್ಯತೆ ಇದೆ. ಸನ್ನಿ ಲಿಯೋನ್ ಮತ್ತು ಕರಣ್ ಕುಂದ್ರಾ ನಿರೂಪಣೆಯ ‘ಸ್ಪ್ಲಿಟ್ಸ್ವಿಲ್ಲಾ 16’ ರಿಯಾಲಿಟಿ ಶೋ ಮೂಲಕ ಪ್ರೀತ್ ಸಿಂಗ್ ಹೆಚ್ಚು ಜನಪ್ರಿಯತೆ ಗಳಿಸಿದ್ದರು.
