ಮುಂಬೈ: ಕೆಲಸ ಮತ್ತು ವೈಯಕ್ತಿಕ ಜೀವನದ ಸಮತೋಲನದ (Work-Life Balance) ಬಗ್ಗೆ ಸದಾ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಈ ನಡುವೆ, ಸತತ 50 ಗಂಟೆಗಳ ಕಾಲ ಆಸ್ಪತ್ರೆಯಲ್ಲಿ ಕರ್ತವ್ಯ ಮುಗಿಸಿ ಮನೆಗೆ ಮರಳಿದ ಪ್ಲಾಸ್ಟಿಕ್ ಸರ್ಜನ್ ಸೌಮ್ಯ ಗುಪ್ತಾ ಅವರಿಗೆ ಅವರ ಅತ್ತೆ ‘ಆರತಿ’ ಬೆಳಗಿ ಸ್ವಾಗತಿಸಿರುವ ವಿಡಿಯೋ ಈಗ ಇಂಟರ್ನೆಟ್ನಲ್ಲಿ ಭಾರಿ ವೈರಲ್ ಆಗಿದೆ. ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋ ಈಗಾಗಲೇ 45 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ.
ವಿಡಿಯೋದಲ್ಲೇನಿದೆ?
ವಿಡಿಯೋದ ಆರಂಭದಲ್ಲಿ ಸೌಮ್ಯ ಗುಪ್ತಾ ಅವರ ಅತ್ತೆ, “ನಮ್ಮ ಪುಣ್ಯ, ನೀವು ನಮ್ಮ ಮನೆಗೆ ಬಂದಿದ್ದೀರಿ” ಎನ್ನುತ್ತಾ ಸಾಂಪ್ರದಾಯಿಕವಾಗಿ ಆರತಿ ಬೆಳಗುತ್ತಾರೆ. ಸೌಮ್ಯ ಅವರು ಅತ್ತೆಯ ಪಾದ ಮುಟ್ಟಿ ನಮಸ್ಕರಿಸಿದಾಗ, “ಧನ್ಯವಾದಗಳು ಮಮ್ಮಿ, ಭಗವಂತ ನನಗೆ ಸದ್ಬುದ್ಧಿ ನೀಡಲಿ ಮತ್ತು ಮನೆಯಲ್ಲಿ ಹೆಚ್ಚು ಸಮಯ ಕಳೆಯುವ ಅವಕಾಶ ನೀಡಲಿ” ಎಂದು ಹೇಳುತ್ತಾರೆ.
ನಂತರ ಅತ್ತೆಯವರು ಕ್ಯಾಮರಾ ಕಡೆಗೆ ನೋಡಿ ತಮಾಷೆಯಾಗಿ, “ಇಂತಹ ಸೊಸೆಯನ್ನು ನೋಡಿದ್ದೀರಾ? ನಾಲ್ಕು ನಾಲ್ಕು ದಿನಕ್ಕೊಮ್ಮೆ ಮನೆಗೆ ಬರುತ್ತಾಳೆ, ಇದರಿಂದ ನಮಗೇನು ಸುಖ?” ಎಂದು ನಗುತ್ತಾ ಚುಡಾಯಿಸುತ್ತಾರೆ.
https://www.instagram.com/reel/DWJok6IE-CC/?utm_source=ig_web_copy_link&igsh=MzRlODBiNWFlZA==
ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ ಮತ್ತು ಪರ-ವಿರೋಧ ಚರ್ಚೆ
ಈ ವಿಡಿಯೋಗೆ ನೆಟ್ಟಿಗರಿಂದ ಭಿನ್ನ ರೀತಿಯ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ:
ಮೆಚ್ಚುಗೆ: “ಇಂತಹ ಬೆಂಬಲ ನೀಡುವ ಕುಟುಂಬ ಸಿಗುವುದು ಅದೃಷ್ಟ” ಎಂದು ಹಲವರು ಶ್ಲಾಘಿಸಿದ್ದಾರೆ.
ಟೀಕೆ: ಅತ್ತೆಯವರ ತಮಾಷೆಯ ಮಾತನ್ನು ಕೆಲವರು ‘ವ್ಯಂಗ್ಯ’ (Taunt) ಎಂದು ಭಾವಿಸಿದ್ದಾರೆ. “ಒಬ್ಬ ಸರ್ಜನ್ ಕೂಡ ಇಂತಹ ಮಾತುಗಳನ್ನು ಕೇಳಬೇಕೆ? ಇದೇ ಕಾರಣಕ್ಕೆ ಮದುವೆಯಾಗಲು ಭಯವಾಗುತ್ತದೆ” ಎಂದು ಕೆಲವು ಯುವತಿಯರು ಕಾಮೆಂಟ್ ಮಾಡಿದ್ದಾರೆ.
ಟೀಕಾಕಾರರಿಗೆ ಪತಿಯ ಖಡಕ್ ಉತ್ತರ
ಸೌಮ್ಯ ಅವರ ಪತಿ ಡಾ. ಶಗುನ್ ಅಗರ್ವಾಲ್ ಟೀಕೆಗಳಿಗೆ ತಕ್ಕ ಉತ್ತರ ನೀಡಿದ್ದಾರೆ.
“ನನ್ನ ತಾಯಿಯನ್ನು ಟೀಕಿಸುವವರಿಗೆ ಇಂತಹ ಸಕಾರಾತ್ಮಕ ಕುಟುಂಬದ ಅನುಭವ ಇರಲಿಕ್ಕಿಲ್ಲ. ನನ್ನ ತಾಯಿ ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ಆಸ್ಪತ್ರೆಗೆ ಡ್ರೈವರ್ ಮೂಲಕ ಬಿಸಿಬಿಸಿ ಊಟ ಕಳುಹಿಸುತ್ತಾರೆ. ನಾವು ಹಣಕ್ಕಾಗಿ ಕೆಲಸ ಮಾಡುತ್ತಿಲ್ಲ, ನನ್ನ ತಾಯಿಯ ಬಾಡಿಗೆ ಆದಾಯವೇ ನಮ್ಮಿಬ್ಬರ ಸಂಬಳಕ್ಕಿಂತ ಹೆಚ್ಚಿದೆ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.ಅಲ್ಲದೆ, ತನ್ನ ಪತ್ನಿ ಜಗತ್ತಿನಲ್ಲೇ ಶ್ರೇಷ್ಠ ಸೊಸೆ ಎಂದು ಅವರು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
