ಪಾಟ್ನಾದಲ್ಲೇ ಉಳಿದ ಲಗೇಜ್, ಪುಣೆ ತಲುಪಿದ ಪ್ರಯಾಣಿಕರು ! ಏರ್‌ಲೈನ್ ಎಡವಟ್ಟು ಮಾಡಿದರೆ ಹೀಗೆ ಮಾಡಿ

ವಿಮಾನಯಾನ ಸಂಸ್ಥೆಯ ಕಡೆಯಿಂದ ಇತ್ತೀಚೆಗೆ ಒಂದು ದೊಡ್ಡ ಎಡವಟ್ಟು ನಡೆದಿದ್ದು, ಇದರಿಂದ ಪ್ರಯಾಣಿಕರು ತೀವ್ರ ಸಂಕಷ್ಟ ಎದುರಿಸುವಂತಾಗಿದೆ. ಪ್ರಯಾಣಿಕರು ಪಾಟ್ನಾದಿಂದ ಪುಣೆಗೆ ಸುರಕ್ಷಿತವಾಗಿ ತಲುಪಿದರೂ, ಅವರ ಲಗೇಜ್‌ಗಳನ್ನು ಏರ್‌ಲೈನ್ ಸಂಸ್ಥೆಯು ತರುವುದನ್ನೇ ಮರೆತಿತ್ತು. ಲಗೇಜ್‌ಗಳು ಪಾಟ್ನಾದಲ್ಲಿದ್ದರೆ, ಪ್ರಯಾಣಿಕರು ಪುಣೆಯಲ್ಲಿದ್ದರು. ಏರ್‌ಲೈನ್‌ನ ಈ ಬೇಜವಾಬ್ದಾರಿತನದ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆ, ಜನರು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ನಿಗದಿತ ಸಮಯಕ್ಕೆ ಪ್ರಯಾಣಿಕರು ತಲುಪಿದರೂ, ಅವರ ಲಗೇಜ್‌ಗಳನ್ನು ವಿಮಾನಕ್ಕೆ ಲೋಡ್ ಮಾಡಿರಲಿಲ್ಲ. ಪಾಟ್ನಾದಿಂದ ಪುಣೆಗೆ ಹೊರಟಿದ್ದ ಇಂಡಿಗೋ ವಿಮಾನ 6E-126 ಸಂಜೆ 4:50 ಕ್ಕೆ ಪುಣೆಗೆ ತಲುಪಿತು. ವಿಮಾನದಲ್ಲಿದ್ದ 180 ಪ್ರಯಾಣಿಕರಲ್ಲಿ ಸುಮಾರು 100ಕ್ಕೂ ಹೆಚ್ಚು ಪ್ರಯಾಣಿಕರ ಬ್ಯಾಗ್‌ಗಳು ಪುಣೆಗೆ ಬಂದಿರಲಿಲ್ಲ.

ಲಗೇಜ್‌ಗಳು ಯಾಕೆ ಬರಲಿಲ್ಲ?

ಸಾಮಾಜಿಕ ಜಾಲತಾಣದಲ್ಲಿ ಪ್ರಯಾಣಿಕರೊಬ್ಬರು ಟ್ವೀಟ್ ಮಾಡಿ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. “ನಮ್ಮ ಲಗೇಜ್ ಸಿಗದಿದ್ದಾಗ ನಾವು ಗ್ರೌಂಡ್ ಸ್ಟಾಫ್ ಬಳಿ ವಿಚಾರಿಸಿದೆವು. ಆಗ ವಿಮಾನದಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಿದ್ದರಿಂದ ಮತ್ತು ರನ್‌ವೇ ಚಿಕ್ಕದಾಗಿದ್ದರಿಂದ ಭಾರ ಹೊತ್ತು ಟೇಕ್-ಆಫ್ ಮಾಡಲು ಸಾಧ್ಯವಿಲ್ಲ ಎಂಬ ಕಾರಣಕ್ಕೆ ಪೈಲಟ್ ಲಗೇಜ್‌ಗಳನ್ನು ಲೋಡ್ ಮಾಡದಿರಲು ನಿರ್ಧರಿಸಿದ್ದರು ಎಂಬ ವಿಷಯ ತಿಳಿಯಿತು.”

ಯಾವುದೇ ಮುನ್ಸೂಚನೆ ಇಲ್ಲದೆ ಲಗೇಜ್ ಇಳಿಸಿರುವುದಕ್ಕೆ ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬ್ಯಾಗ್‌ಗಳಲ್ಲಿ ತುರ್ತು ಔಷಧಿಗಳು ಮತ್ತು ಪ್ರಮುಖ ದಾಖಲೆಗಳಿದ್ದವು ಎಂದು ಹಲವರು ನೋವು ತೋಡಿಕೊಂಡಿದ್ದಾರೆ. ಏರ್‌ಲೈನ್‌ನ ಸೇವೆ ದಿನದಿಂದ ದಿನಕ್ಕೆ ಹದಗೆಡುತ್ತಿದೆ ಮತ್ತು ಯಾರೂ ಜವಾಬ್ದಾರಿ ತೆಗೆದುಕೊಳ್ಳುತ್ತಿಲ್ಲ ಎಂಬುದು ಪ್ರಯಾಣಿಕರ ದೂರಾಗಿದೆ.

ವಿಮಾನ ನಿಲ್ದಾಣದಲ್ಲಿ ನಿಮ್ಮ ಲಗೇಜ್ ಸಿಗದಿದ್ದರೆ ಏನು ಮಾಡಬೇಕು?

1. ತಕ್ಷಣವೇ ‘ಬ್ಯಾಗೇಜ್ ಸರ್ವಿಸ್ ಡೆಸ್ಕ್’ಗೆ ಹೋಗಿ: ಮೊದಲು ಕನ್ವೇಯರ್ ಬೆಲ್ಟ್ ಬಳಿ ನಿಮ್ಮ ಬ್ಯಾಗ್ ಹುಡುಕಿ. ಸಿಗದಿದ್ದಲ್ಲಿ, ಯಾವುದೇ ಕಾರಣಕ್ಕೂ ಏರ್‌ಪೋರ್ಟ್‌ನಿಂದ ಹೊರಬರಬೇಡಿ. ಅಲ್ಲೇ ಇರುವ ಅಧಿಕಾರಿಗಳೊಂದಿಗೆ ಮಾತನಾಡಿ ಅಥವಾ ‘Baggage Service’ / ‘Lost and Found’ ಕೌಂಟರ್‌ನಲ್ಲಿ ಸಹಾಯ ಕೇಳಿ.

2. PIR ದಾಖಲಿಸಿ: ಬ್ಯಾಗ್ ಸಿಗದಿದ್ದರೆ ಏರ್‌ಲೈನ್ ಸಿಬ್ಬಂದಿ ನಿಮ್ಮ ದೂರನ್ನು ದಾಖಲಿಸಿಕೊಂಡು ನಿಮಗೆ PIR (Property Irregularity Report) ಸಂಖ್ಯೆಯನ್ನು ನೀಡುತ್ತಾರೆ. ಈ ನಂಬರ್ ಮೂಲಕವೇ ನೀವು ಬ್ಯಾಗ್‌ ಅನ್ನು ಟ್ರ್ಯಾಕ್ ಮಾಡಲು ಸಾಧ್ಯ.

3. ಬ್ಯಾಗೇಜ್ ಟ್ಯಾಗ್ ಜೋಪಾನವಾಗಿಡಿ: ವಿಮಾನ ಪ್ರಯಾಣದ ಸಮಯದಲ್ಲಿ ಬೋರ್ಡಿಂಗ್ ಪಾಸ್ ಮೇಲೆ ಅಂಟಿಸಲಾದ ಸಣ್ಣ ಬ್ಯಾಗೇಜ್ ಟ್ಯಾಗ್ ಅನ್ನು ಎಂದಿಗೂ ಎಸೆಯಬೇಡಿ. ಲಗೇಜ್ ಹುಡುಕಲು ಇದು ಅತಿ ಮುಖ್ಯ ದಾಖಲೆ.

4. ಪರಿಹಾರ ಕೇಳಿ (Compensation): ನಿಯಮಗಳ ಪ್ರಕಾರ, ಲಗೇಜ್ ಕಳೆದುಹೋದರೆ ಅಥವಾ ವಿಮಾನ ಇಳಿದ 96 ಗಂಟೆಗಳ ಒಳಗೆ ಬ್ಯಾಗ್ ಹಸ್ತಾಂತರಿಸದಿದ್ದರೆ ಏರ್‌ಲೈನ್ ಪರಿಹಾರ ನೀಡಬೇಕು.

• ದೇಶೀಯ ಪ್ರಯಾಣಕ್ಕೆ: ಗರಿಷ್ಠ ₹19,000 ವರೆಗೆ.
• ಅಂತರಾಷ್ಟ್ರೀಯ ಪ್ರಯಾಣಕ್ಕೆ: ಗರಿಷ್ಠ ₹66,000 ವರೆಗೆ ಪರಿಹಾರ ಸಿಗುತ್ತದೆ.

ಬ್ಯಾಗ್‌ನ ಸ್ಥಿತಿಗತಿಯ ಬಗ್ಗೆ ಏರ್‌ಲೈನ್ ನಿಮಗೆ ಇಮೇಲ್ ಅಥವಾ ಎಸ್‌ಎಂಎಸ್ ಮೂಲಕ ನಿರಂತರವಾಗಿ ಅಪ್‌ಡೇಟ್ ನೀಡುತ್ತಿರಬೇಕು.