ಬೆಂಗಳೂರು: ಒಂದೇ ಕಂಪನಿಯಲ್ಲಿ ಹಲವು ವರ್ಷಗಳ ಕಾಲ ನಿಷ್ಠೆಯಿಂದ ಕೆಲಸ ಮಾಡಿದರೂ, ಉದ್ಯೋಗ ಕಳೆದುಕೊಳ್ಳುವ ಸಂದರ್ಭದಲ್ಲಿ ಆ ಸೇವೆಗೆ ಸೂಕ್ತ ಗೌರವ ಸಿಗುತ್ತದೆಯೇ ಎಂಬ ಪ್ರಶ್ನೆ ಮತ್ತೆ ಚರ್ಚೆಗೆ ಬಂದಿದೆ. ಒರಾಕಲ್ (Oracle)ನಲ್ಲಿ 12 ವರ್ಷಗಳ ಕಾಲ ಕೆಲಸ ಮಾಡಿದ್ದ ಭಾರತೀಯ ಮೂಲದ ಟೆಕ್ಕಿ ಸೌರಭ್ ಅವರನ್ನು ಕೆಲಸದಿಂದ ವಜಾಗೊಳಿಸಲಾಗಿದೆ ಎಂದು ಅವರ ಪತ್ನಿ ಪೂಜಾ ಸಾಹು ಲಿಂಕ್ಡ್‌ಇನ್‌ನಲ್ಲಿ ಹಂಚಿಕೊಂಡಿರುವ ಪೋಸ್ಟ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯುತ್ತಿದೆ.
ತಮ್ಮ ಪತಿ ಕಂಪನಿಗಾಗಿ ಹಲವು ಸಂದರ್ಭಗಳಲ್ಲಿ ವೈಯಕ್ತಿಕ ಸಮಯವನ್ನೂ ಬದಿಗಿಟ್ಟು ಕೆಲಸ ಮಾಡಿದ್ದರು ಎಂದು ಪೂಜಾ ವಿವರಿಸಿದ್ದಾರೆ. ಆದರೆ ಕೊನೆಗೆ ಅವರ ಉದ್ಯೋಗ ಅಂತ್ಯಗೊಂಡ ರೀತಿಯೇ ಹೆಚ್ಚು ನೋವು ತಂದಿದೆ ಎಂದು ಅವರು ಹೇಳಿದ್ದಾರೆ.
ಲಾಗಿನ್ ಆಗದ ಲ್ಯಾಪ್ಟಾಪ್ ಮೂಲಕವೇ ಉದ್ಯೋಗ ಅಂತ್ಯ
ಪೂಜಾ ಅವರ ಪ್ರಕಾರ, ಎಂದಿನಂತೆ ಸೌರಭ್ ಕೆಲಸ ಮಾಡಲು ಲ್ಯಾಪ್ಟಾಪ್ ತೆರೆಯುವಾಗ ಸಿಸ್ಟಮ್‌ಗೆ ಲಾಗಿನ್ ಆಗಲು ಸಾಧ್ಯವಾಗಲಿಲ್ಲ. 12 ವರ್ಷಗಳ ಸೇವೆಯ ನಂತರ ಉದ್ಯೋಗಕ್ಕೆ ವಿದಾಯ ಹೇಳುವ ಯಾವುದೇ ವೈಯಕ್ತಿಕ ಸಂವಹನವೂ ಇರಲಿಲ್ಲ ಎಂದು ಅವರು ತಮ್ಮ ಪೋಸ್ಟ್‌ನಲ್ಲಿ ಬೇಸರ ವ್ಯಕ್ತಪಡಿಸಿದ್ದಾರೆ.
ಇದರಿಂದ ಹಲವು ವರ್ಷಗಳ ಕಾಲ ಒಂದೇ ಸಂಸ್ಥೆಯಲ್ಲಿ ಕೆಲಸ ಮಾಡಿದ ಉದ್ಯೋಗಿಯ ಸೇವೆ ಕೊನೆಗೊಳ್ಳುವ ರೀತಿ ಹೇಗಿರಬೇಕು ಎಂಬ ಚರ್ಚೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಆರಂಭವಾಗಿದೆ.
ಪತ್ನಿ ಆಸ್ಪತ್ರೆಯಲ್ಲಿದ್ದಾಗಲೂ ಕೆಲಸ ಮಾಡಿದ್ದರಂತೆ
ಸೌರಭ್ ಕಂಪನಿಯ ಕೆಲಸಕ್ಕೆ ನೀಡುತ್ತಿದ್ದ ಆದ್ಯತೆಯ ಹಲವು ಘಟನೆಗಳನ್ನು ಪೂಜಾ ತಮ್ಮ ಪೋಸ್ಟ್‌ನಲ್ಲಿ ನೆನಪಿಸಿಕೊಂಡಿದ್ದಾರೆ.
ತಾವು ಹೊಟ್ಟೆಯಲ್ಲಿದ್ದ ಗಡ್ಡೆ ತೆಗೆಯುವ ಶಸ್ತ್ರಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದ ಸಂದರ್ಭದಲ್ಲಿ, ತಾವು ಆಪರೇಷನ್ ಥಿಯೇಟರ್‌ನಲ್ಲಿದ್ದರೂ ಸೌರಭ್ ಆಸ್ಪತ್ರೆಯಲ್ಲೇ ಕುಳಿತು ಕೆಲಸ ಮಾಡುತ್ತಿದ್ದರು ಎಂದು ಅವರು ಹೇಳಿದ್ದಾರೆ.
ಅದೇ ರೀತಿ, ನ್ಯೂ ಮೆಕ್ಸಿಕೋಗೆ ಪ್ರವಾಸ ತೆರಳಿದ್ದಾಗಲೂ ಸೌರಭ್ ರಜೆಯನ್ನು ಸಂಪೂರ್ಣವಾಗಿ ಆನಂದಿಸದೆ ಆಫೀಸ್ ಕಾಲ್‌ಗಳಲ್ಲಿ ನಿರತರಾಗಿದ್ದರು ಎಂದು ಪೂಜಾ ತಿಳಿಸಿದ್ದಾರೆ.
ದೀಪಾವಳಿ, ಹೋಳಿ, ರಕ್ಷಾಬಂಧನ, ಹುಟ್ಟುಹಬ್ಬ, ವಿವಾಹ ವಾರ್ಷಿಕೋತ್ಸವ ಸೇರಿದಂತೆ ಕುಟುಂಬದ ಪ್ರಮುಖ ದಿನಗಳಲ್ಲೂ ಕೆಲಸಕ್ಕೆ ಹೆಚ್ಚಿನ ಸಮಯ ನೀಡುತ್ತಿದ್ದರು ಎಂದು ಅವರು ಹೇಳಿದ್ದಾರೆ. ಕೆಲವೊಮ್ಮೆ ರಾತ್ರಿ ತಡವರೆಗೂ ಕೆಲಸ ಮಾಡುತ್ತಿದ್ದರಿಂದ ಆರೋಗ್ಯದ ಮೇಲೂ ಪರಿಣಾಮ ಬೀರಿತ್ತು ಎಂದು ಪತ್ನಿ ವಿವರಿಸಿದ್ದಾರೆ.
https://x.com/HelloVyom/status/2099764986335895682
ಒರಾಕಲ್‌ನಲ್ಲಿ ‘ಬೆಸ್ಟ್ ಎಂಪ್ಲಾಯ್’ ಪ್ರಶಸ್ತಿಯೂ ಸಿಕ್ಕಿತ್ತು
ಐಟಿ ಕ್ಷೇತ್ರದಲ್ಲಿ ಸುಮಾರು 20 ವರ್ಷಗಳ ಅನುಭವ ಹೊಂದಿರುವ ಸೌರಭ್, ಒರಾಕಲ್‌ನಲ್ಲಿ ‘ಬೆಸ್ಟ್ ಎಂಪ್ಲಾಯ್’ ಪ್ರಶಸ್ತಿ ಪಡೆದಿದ್ದರು ಎಂದು ಪೂಜಾ ಹೇಳಿದ್ದಾರೆ.
ಇಷ್ಟೆಲ್ಲಾ ವರ್ಷಗಳ ಅನುಭವ ಮತ್ತು ಸಂಸ್ಥೆಗೆ ನೀಡಿದ ಕೊಡುಗೆಯ ನಡುವೆಯೂ ಉದ್ಯೋಗ ಕಳೆದುಕೊಂಡಿರುವುದು ಕುಟುಂಬಕ್ಕೆ ಆಘಾತ ತಂದಿದೆ. ವಿಶೇಷವಾಗಿ ವಿದೇಶದಲ್ಲಿ ಕೆಲಸ ಮಾಡುವ ಭಾರತೀಯ ಟೆಕ್ಕಿಗಳಿಗೆ ಉದ್ಯೋಗದ ಜೊತೆಗೆ ವೀಸಾ ಮತ್ತು ಕುಟುಂಬದ ಭವಿಷ್ಯದ ವಿಚಾರಗಳೂ ಪ್ರಮುಖವಾಗಿರುವುದರಿಂದ ಪರಿಸ್ಥಿತಿ ಮತ್ತಷ್ಟು ಕಷ್ಟಕರವಾಗುತ್ತದೆ ಎಂಬ ಅಭಿಪ್ರಾಯವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ಪತಿಗೆ ಹೊಸ ಉದ್ಯೋಗಕ್ಕಾಗಿ ಪತ್ನಿಯ ಮನವಿ
ಪೋಸ್ಟ್‌ನಲ್ಲಿ ತಮ್ಮ ಪತಿಯ ಪರವಾಗಿ ಹೊಸ ಉದ್ಯೋಗಾವಕಾಶಕ್ಕಾಗಿ ಪೂಜಾ ನೆಟ್ಟಿಗರಲ್ಲಿ ಮನವಿ ಮಾಡಿದ್ದಾರೆ.
ಸೌರಭ್ ಅವರ ಅನುಭವ ಮತ್ತು ಕೆಲಸದ ಬದ್ಧತೆಯನ್ನು ಪರಿಗಣಿಸಿ, ಸೂಕ್ತ ಅವಕಾಶವಿದ್ದರೆ ರೆಫರ್ ಮಾಡುವಂತೆ ಅವರು ಕೇಳಿಕೊಂಡಿದ್ದಾರೆ. ಹೊಸ ಸಂಸ್ಥೆಗೆ ಅವರು ಸೇರಿದರೆ ಉತ್ತಮ ಸಹೋದ್ಯೋಗಿಯಾಗುವುದರ ಜೊತೆಗೆ ದೀರ್ಘಕಾಲದ ಸ್ನೇಹಿತನಾಗಿಯೂ ಇರುತ್ತಾರೆ ಎಂದು ಪತ್ನಿ ಹೇಳಿದ್ದಾರೆ.
ತಮ್ಮ ಪತಿಗೆ ಧೈರ್ಯ ತುಂಬಿರುವ ಅವರು, ಈ ಉದ್ಯೋಗ ಕಳೆದುಕೊಂಡಿರುವುದು ಅಂತ್ಯವಲ್ಲ ಮತ್ತು ಮುಂದಿನ ದಿನಗಳಲ್ಲಿ ಇನ್ನೂ ಉತ್ತಮ ಅವಕಾಶಗಳು ಸಿಗಲಿವೆ ಎಂಬ ವಿಶ್ವಾಸವನ್ನೂ ವ್ಯಕ್ತಪಡಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ
ಪೂಜಾ ಅವರ ಪೋಸ್ಟ್‌ಗೆ ಹಲವರು ಪ್ರತಿಕ್ರಿಯಿಸಿದ್ದು, ದೀರ್ಘಕಾಲ ಒಂದೇ ಸಂಸ್ಥೆಯಲ್ಲಿ ಕೆಲಸ ಮಾಡಿದ ಉದ್ಯೋಗಿಯ ಸೇವೆಯನ್ನು ಕಂಪನಿಗಳು ಹೇಗೆ ಗೌರವಿಸಬೇಕು ಎಂಬ ಚರ್ಚೆ ನಡೆದಿದೆ.
ಕೆಲವರು ಉದ್ಯೋಗ ಕಡಿತವು ಕಾರ್ಪೊರೇಟ್ ಜಗತ್ತಿನ ವಾಸ್ತವಿಕತೆ ಎಂದು ಅಭಿಪ್ರಾಯಪಟ್ಟರೆ, ಇನ್ನು ಕೆಲವರು ವರ್ಷಗಳ ಕಾಲ ಸಂಸ್ಥೆಗೆ ಸೇವೆ ಸಲ್ಲಿಸಿದ ನೌಕರರೊಂದಿಗೆ ಉದ್ಯೋಗ ಅಂತ್ಯಗೊಳಿಸುವಾಗ ಕನಿಷ್ಠ ಮಾನವೀಯತೆ ಮತ್ತು ಗೌರವ ಇರಬೇಕು ಎಂದು ಹೇಳಿದ್ದಾರೆ.
ಈ ನಡುವೆ ಸೌರಭ್ ಅವರ ಅನುಭವವನ್ನು ಗಮನಿಸಿ ಹೊಸ ಉದ್ಯೋಗದ ಅವಕಾಶ ಕಲ್ಪಿಸಲು ಸಹಾಯ ಮಾಡುವಂತೆ ಹಲವರು ತಮ್ಮ ನೆಟ್‌ವರ್ಕ್‌ನಲ್ಲಿ ಮನವಿ ಮಾಡುತ್ತಿದ್ದಾರೆ.
