ಸಾಮಾನ್ಯವಾಗಿ ಹಾಗಲಕಾಯಿ ಎಂದರೆ ಅದರ ಕಹಿ ರುಚಿಯಿಂದಾಗಿ ಹೆಚ್ಚಿನವರು ದೂರ ಸರಿಯುತ್ತಾರೆ. ಆದರೆ ಹಾಗಲಕಾಯಿಯಿಂದ ಕೇವಲ ಪಲ್ಯ ಅಥವಾ ಗೊಜ್ಜು ಮಾತ್ರವಲ್ಲದೆ, ರುಚಿಕರವಾದ ಮತ್ತು ಆರೋಗ್ಯಕರವಾದ ಸ್ನ್ಯಾಕ್ಸ್ ಕೂಡ ತಯಾರಿಸಬಹುದು ಎಂಬುದು ನಿಮಗೆ ತಿಳಿದಿದೆಯೇ? ಹೌದು, ಪನೀರ್ ಮತ್ತು ಮಸಾಲೆಗಳನ್ನು ಬಳಸಿ ತಯಾರಿಸುವ ಈ ‘ಹಾಗಲಕಾಯಿ ಟಿಕ್ಕಿ’ ಕಹಿಯಿಲ್ಲದೆ ಅತ್ಯಂತ ರುಚಿಯಾಗಿರುತ್ತದೆ. ವಿಶೇಷವೆಂದರೆ, ಇದು ತೂಕ ಇಳಿಸಲು ಬಯಸುವವರಿಗೆ ಮತ್ತು ಮಧುಮೇಹಿಗಳಿಗೆ (Diabetes) ಅತ್ಯಂತ ಸೂಕ್ತವಾದ ತಿಂಡಿಯಾಗಿದೆ.
ಬೇಕಾಗುವ ಸಾಮಗ್ರಿಗಳು:
- ದೊಡ್ಡ ಗಾತ್ರದ ಹಾಗಲಕಾಯಿ: 2
- ತುರಿದ ಲೋ ಫ್ಯಾಟ್ ಪನೀರ್: ಅರ್ಧ ಕಪ್
- ಈರುಳ್ಳಿ: 1
- ಕಡಲೆ ಹಿಟ್ಟು (Besan): 1 ಕಪ್
- ಹಸಿಮೆಣಸಿನಕಾಯಿ: 2
- ಶುಂಠಿ: 1 ಇಂಚು
- ಬೆಳ್ಳುಳ್ಳಿ ಎಸಳು: 4
- ಕೊತ್ತಂಬರಿ ಸೊಪ್ಪು: ಅರ್ಧ ಕಪ್
- ಆಮ್‌ಚೂರ್ ಪುಡಿ ಅಥವಾ ಚಾಟ್ ಮಸಾಲ: 1 ಚಮಚ
- ಅಚ್ಚಕಾರದ ಪುಡಿ: 1 ಚಮಚ
- ಅರಿಶಿನ ಪುಡಿ: ಅರ್ಧ ಚಮಚ
- ಓಮಕಾಳು (Ajwain): ಅರ್ಧ ಚಮಚ
- ಉಪ್ಪು: ರುಚಿಗೆ ತಕ್ಕಷ್ಟು
- ಎಣ್ಣೆ: ಫ್ರೈ ಮಾಡಲು
ತಯಾರಿಸುವ ವಿಧಾನ:
- ಹಾಗಲಕಾಯಿ ಸಿದ್ಧತೆ: ಮೊದಲು ಹಾಗಲಕಾಯಿಯನ್ನು ತೊಳೆದು ಅದರ ಮೇಲ್ಭಾಗವನ್ನು ಚೆನ್ನಾಗಿ ತುರಿಯಿರಿ. ಇದನ್ನು ಮಿಕ್ಸಿಯಲ್ಲಿ ಹಾಕಿ ತರಿತರಿಯಾಗಿ ರುಬ್ಬಿಕೊಳ್ಳಿ. ನಂತರ ಇದಕ್ಕೆ ಒಂದು ಚಮಚ ಉಪ್ಪು ಸೇರಿಸಿ 30 ನಿಮಿಷಗಳ ಕಾಲ ಪಕ್ಕಕ್ಕೆ ಇಡಿ. ಇದು ಹಾಗಲಕಾಯಿಯಲ್ಲಿರುವ ಕಹಿಯನ್ನು ಕಡಿಮೆ ಮಾಡುತ್ತದೆ.
- ತರಕಾರಿ ಕತ್ತರಿಸಿ: ಈರುಳ್ಳಿ, ಶುಂಠಿ, ಬೆಳ್ಳುಳ್ಳಿ, ಹಸಿಮೆಣಸಿನಕಾಯಿ ಮತ್ತು ಕೊತ್ತಂಬರಿ ಸೊಪ್ಪನ್ನು ಸಣ್ಣದಾಗಿ ಹೆಚ್ಚಿ ಒಂದು ದೊಡ್ಡ ಪಾತ್ರೆಗೆ ಹಾಕಿಕೊಳ್ಳಿ.
- ಮಿಶ್ರಣ ಮಾಡಿ: ಉಪ್ಪು ಸವರಿಟ್ಟ ಹಾಗಲಕಾಯಿಯನ್ನು ಚೆನ್ನಾಗಿ ಹಿಂಡಿ ಅದರಲ್ಲಿರುವ ನೀರನ್ನು ತೆಗೆಯಿರಿ. ಈ ಹಾಗಲಕಾಯಿಯನ್ನು ಈರುಳ್ಳಿ ಇರುವ ಪಾತ್ರೆಗೆ ಸೇರಿಸಿ. ನಂತರ ಇದಕ್ಕೆ ತುರಿದ ಪನೀರ್, ಖಾರದ ಪುಡಿ, ಅರಿಶಿನ, ಆಮ್‌ಚೂರ್ ಪುಡಿ, ಓಮಕಾಳು ಮತ್ತು ಕಡಲೆ ಹಿಟ್ಟನ್ನು ಸೇರಿಸಿ ಚೆನ್ನಾಗಿ ಬೆರೆಸಿ.
- ಟಿಕ್ಕಿ ಆಕಾರ: ಸಿದ್ಧಪಡಿಸಿದ ಮಿಶ್ರಣದಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ, ಅಂಗೈಯಿಂದ ಒತ್ತಿ ವಡೆಯ ಆಕಾರ (ಟಿಕ್ಕಿ) ನೀಡಿ.
- ಫ್ರೈ ಮಾಡಿ: ತವಾವನ್ನು ಬಿಸಿ ಮಾಡಿ ಸ್ವಲ್ಪ ಎಣ್ಣೆ ಹಾಕಿ, ಮಧ್ಯಮ ಉರಿಯಲ್ಲಿ ಟಿಕ್ಕಿಗಳನ್ನು ಎರಡು ಬದಿ ಹೊಂಬಣ್ಣ ಬರುವವರೆಗೆ ಚೆನ್ನಾಗಿ ಬೇಯಿಸಿ.
ಬಿಸಿಯಾದ ಹಾಗಲಕಾಯಿ ಟಿಕ್ಕಿಯನ್ನು ಪುದೀನಾ ಚಟ್ನಿ ಅಥವಾ ಸಾಸ್ ಜೊತೆಗೆ ಸವಿಯಲು ನೀಡಬಹುದು.
