ಬೆಂಗಳೂರು: ವಾಟ್ಸಾಪ್ ತನ್ನ ಬಳಕೆದಾರರ ಅನುಭವವನ್ನು ಇನ್ನಷ್ಟು ಉತ್ತಮಗೊಳಿಸುವ ಉದ್ದೇಶದಿಂದ ಹೊಸ ‘ಬರ್ತ್ಡೇ ರಿಮೈಂಡರ್’ (Birthday Reminder) ಫೀಚರ್ ಅನ್ನು ಅಭಿವೃದ್ಧಿಪಡಿಸುತ್ತಿದೆ. ಈ ಫೀಚರ್ ಜಾರಿಗೆ ಬಂದ ಬಳಿಕ, ನಿಮ್ಮ ಕಾಂಟ್ಯಾಕ್ಟ್ ಲಿಸ್ಟ್ನಲ್ಲಿರುವವರ ಮುಂಬರುವ ಜನ್ಮದಿನಗಳ ಕುರಿತು ನೇರವಾಗಿ ವಾಟ್ಸಾಪ್ನಲ್ಲೇ ನೋಟಿಫಿಕೇಶನ್ಗಳು ದೊರೆಯಲಿವೆ. ಇದರಿಂದ ಪ್ರತ್ಯೇಕವಾಗಿ ಕ್ಯಾಲೆಂಡರ್ ಅಥವಾ ಇತರೆ ರಿಮೈಂಡರ್ ಆ್ಯಪ್ಗಳನ್ನು ಬಳಸುವ ಅಗತ್ಯ ಇರುವುದಿಲ್ಲ.
ಹೌದು. ಶೀಘ್ರದಲ್ಲೇ ಮೆಸೇಜಿಂಗ್ ಆ್ಯಪ್ನಲ್ಲಿ ‘ಬರ್ತ್ಡೇ ರಿಮೈಂಡರ್’ ಎಂಬ ಹೊಸ ಫೀಚರ್ ಪರಿಚಯವಾಗಲಿದ್ದು, ನಿಮ್ಮ ಕಾಂಟ್ಯಾಕ್ಟ್ಗಳ ಜನ್ಮದಿನದ ಬಗ್ಗೆ ನೇರವಾಗಿ ವಾಟ್ಸಾಪ್ನಲ್ಲೇ ಮುಂಚಿತವಾಗಿ ನೋಟಿಫಿಕೇಶನ್ ಸಿಗಲಿದೆ. ಇದರಿಂದ ಸ್ನೇಹಿತರು, ಕುಟುಂಬದವರು ಹಾಗೂ ಆತ್ಮೀಯರ ಜನ್ಮದಿನವನ್ನು ಮರೆತು ಬಿಡುವ ಸಾಧ್ಯತೆ ಕಡಿಮೆಯಾಗಲಿದ್ದು, ಪ್ರತ್ಯೇಕ ಕ್ಯಾಲೆಂಡರ್ ಅಥವಾ ರಿಮೈಂಡರ್ ಆ್ಯಪ್ಗಳನ್ನು ಬಳಸುವ ಅಗತ್ಯವೂ ಇರುವುದಿಲ್ಲ.
ವರದಿಗಳ ಪ್ರಕಾರ, ವಾಟ್ಸಾಪ್ ಈಗಾಗಲೇ ಆಂಡ್ರಾಯ್ಡ್ ಬೀಟಾ ಆವೃತ್ತಿ 2.24.12.25 ನಲ್ಲಿ ಈ ವೈಶಿಷ್ಟ್ಯದ ಪರೀಕ್ಷೆಯನ್ನು ಆರಂಭಿಸಿದೆ. ಈ ವೇಳೆ ಕೆಲವು ಬಳಕೆದಾರರಿಂದ ಜನ್ಮ ದಿನಾಂಕದ ಮಾಹಿತಿಯನ್ನು ಸಂಗ್ರಹಿಸಲಾಗುತ್ತಿದೆ. ಆದರೆ ಈ ಮಾಹಿತಿ ಇತರ ಬಳಕೆದಾರರಿಗೆ ಗೋಚರಿಸುವುದಿಲ್ಲ ಎಂದು ಕಂಪನಿ ಸ್ಪಷ್ಟಪಡಿಸಿದೆ.
ಒಮ್ಮೆ ಜನ್ಮ ವರ್ಷವನ್ನು ದಾಖಲಿಸಿದ ಬಳಿಕ ಅದನ್ನು ಬದಲಾಯಿಸಲು ಸಾಧ್ಯವಾಗುವುದಿಲ್ಲ. ಆರಂಭದಲ್ಲಿ ಈ ಮಾಹಿತಿಯನ್ನು ಕಾನೂನು ನಿಯಮಗಳ ಪಾಲನೆಗಾಗಿ ಮಾತ್ರ ಬಳಸಲಾಗುತ್ತಿತ್ತು. ವಿಶೇಷವಾಗಿ ಅಮೆರಿಕದ ಕೆಲವು ರಾಜ್ಯಗಳಲ್ಲಿ ಆನ್ಲೈನ್ ಸೇವೆಗಳು ಬಳಕೆದಾರರ ವಯಸ್ಸನ್ನು ದೃಢೀಕರಿಸಬೇಕೆಂಬ ನಿಯಮಗಳ ಹಿನ್ನೆಲೆಯಲ್ಲಿ ಈ ವ್ಯವಸ್ಥೆ ಜಾರಿಗೊಂಡಿತ್ತು.
ಜನ್ಮದಿನದ ರಿಮೈಂಡರ್
ಈಗ ಅದೇ ಮಾಹಿತಿಯನ್ನು ಜನ್ಮದಿನದ ರಿಮೈಂಡರ್ಗಳಿಗಾಗಿ ಬಳಸಲು ವಾಟ್ಸಾಪ್ ಸಿದ್ಧತೆ ನಡೆಸುತ್ತಿದೆ. ಇದಕ್ಕಾಗಿ ಆ್ಯಪ್ನಲ್ಲಿ ಪ್ರತ್ಯೇಕ ‘Birthdays’ ವಿಭಾಗವನ್ನೂ ಪರಿಚಯಿಸಲಾಗುತ್ತಿದೆ. ಈ ವಿಭಾಗದಲ್ಲಿ ಬಳಕೆದಾರರು ತಮ್ಮ ಸಂಪರ್ಕ ಪಟ್ಟಿಯಲ್ಲಿರುವವರ ಮುಂಬರುವ ಜನ್ಮದಿನಗಳನ್ನು ಒಂದೇ ಸ್ಥಳದಲ್ಲಿ ನೋಡಬಹುದಾಗಿದೆ.
ಆದರೆ, ಸಂಬಂಧಿತ ವ್ಯಕ್ತಿ ತನ್ನ ಜನ್ಮ ದಿನಾಂಕವನ್ನು ವಾಟ್ಸಾಪ್ನಲ್ಲಿ ದಾಖಲಿಸಿದ್ದರೆ ಮಾತ್ರ ಈ ರಿಮೈಂಡರ್ಗಳು ಕಾಣಿಸಿಕೊಳ್ಳಲಿವೆ. ಪ್ರಸ್ತುತ ಈ ಫೀಚರ್ ಅಭಿವೃದ್ಧಿ ಹಂತದಲ್ಲಿದ್ದು, ಮುಂದಿನ ದಿನಗಳಲ್ಲಿ ಗೌಪ್ಯತೆ (Privacy) ನಿಯಂತ್ರಣಗಳನ್ನೂ ಸೇರಿಸಲಾಗುತ್ತದೆ. ಇದರಿಂದ ಬಳಕೆದಾರರು ತಮ್ಮ ಜನ್ಮದಿನದ ಮಾಹಿತಿಯನ್ನು ಯಾರಿಗೆ ತೋರಿಸಬೇಕು ಎಂಬುದನ್ನು ತಾವೇ ನಿರ್ಧರಿಸಬಹುದು.
ಈಗಾಗಲೇ ಫೇಸ್ಬುಕ್ ಸೇರಿದಂತೆ ಹಲವು ಸಾಮಾಜಿಕ ಜಾಲತಾಣಗಳಲ್ಲಿ ಬರ್ತ್ಡೇ ರಿಮೈಂಡರ್ ವ್ಯವಸ್ಥೆ ಲಭ್ಯವಿದ್ದು, ಶೀಘ್ರದಲ್ಲೇ ವಾಟ್ಸಾಪ್ ಕೂಡ ಇದೇ ಸೌಲಭ್ಯವನ್ನು ತನ್ನ ಬಳಕೆದಾರರಿಗೆ ನೀಡಲು ಸಜ್ಜಾಗಿದೆ.
