ಬೆಂಗಳೂರು: ಭಾರತೀಯ ಮೂಲದ ಗೂಗಲ್ ಸಿಇಒ ಸುಂದರ್ ಪಿಚೈ ಅವರು ತಮ್ಮ ಮೂಲ ಬೇರುಗಳನ್ನು ಮರೆತಿಲ್ಲ ಎಂಬುದಕ್ಕೆ ಅವರು ಪ್ರತಿವರ್ಷ ಆಚರಿಸುವ ಹಬ್ಬಗಳೇ ಸಾಕ್ಷಿ. ಈ ವರ್ಷವೂ ಸಹ ಸುಂದರ್ ಪಿಚೈ ಅವರು ಭಾರತದ ಬಣ್ಣಗಳ ಹಬ್ಬ ‘ಹೋಳಿ’ಯನ್ನು ಅತ್ಯಂತ ಸಡಗರದಿಂದ ಸ್ವಾಗತಿಸಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿರುವ ಒಂದು ಪೋಸ್ಟ್ ಈಗ ಭಾರಿ ವೈರಲ್ ಆಗುತ್ತಿದೆ. ವಿಶೇಷವೆಂದರೆ, ಪಿಚೈ ಅವರು ಮುಂಬೈ ಮೂಲದ ಫೋಟೋಗ್ರಾಫರ್ ಒಬ್ಬರು ಸೆರೆಹಿಡಿದ ಕಣ್ಮನ ಸೆಳೆಯುವ ಫೋಟೋವನ್ನು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
“ಬಣ್ಣಗಳು, ಸಮುದಾಯ ಮತ್ತು ಹೊಸ ಆರಂಭದ ಸಂಭ್ರಮವಿದು. ಎಲ್ಲರಿಗೂ ಹೋಳಿ ಹಬ್ಬದ ಶುಭಾಶಯಗಳು” ಎಂದು ಬರೆದುಕೊಂಡಿರುವ ಪಿಚೈ, ಆ ಸುಂದರ ಚಿತ್ರವನ್ನು ಸೆರೆಹಿಡಿದ ಮುಂಬೈನ ಪ್ರಜಯ್ ಕಟ್ಕೋರಿಯಾ ಅವರ ಕೆಲಸವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಈ ಫೋಟೋದಲ್ಲಿ ಯುವಕನೊಬ್ಬ ಬಣ್ಣವನ್ನು ಗಾಳಿಯಲ್ಲಿ ತೂರುತ್ತಿರುವ ದೃಶ್ಯವಿದ್ದು, ಗುಲಾಬಿ ಬಣ್ಣದ ಗುಲಾಲ್ ಮೋಡದಂತೆ ಆವರಿಸಿಕೊಂಡಿರುವ ಕ್ಷಣ ಅದ್ಭುತವಾಗಿ ಮೂಡಿಬಂದಿದೆ. ಸ್ವತಃ ಗೂಗಲ್ ಸಿಇಒ ಅವರೇ ತಮ್ಮನ್ನು ಟ್ಯಾಗ್ ಮಾಡಿ ಪ್ರಶಂಸೆ ವ್ಯಕ್ತಪಡಿಸಿದ್ದಕ್ಕೆ ಪ್ರಜಯ್ ಕಟ್ಕೋರಿಯಾ ಸಂತಸ ವ್ಯಕ್ತಪಡಿಸಿದ್ದು, “ಇದು ನನಗೆ ತುಂಬಾ ದೊಡ್ಡ ಗೌರವ” ಎಂದು ಪ್ರತಿಕ್ರಿಯಿಸಿದ್ದಾರೆ.
ಅಂದಹಾಗೆ ಸುಂದರ್ ಪಿಚೈ ಮೆಚ್ಚುಗೆಗೆ ಪಾತ್ರರಾದ ಪ್ರಜಯ್ ಕಟ್ಕೋರಿಯಾ ಕೇವಲ ಫೋಟೋಗ್ರಾಫರ್ ಮಾತ್ರವಲ್ಲ, ಅವರು ಹಣಕಾಸು ವಿಶ್ಲೇಷಕರಾಗಿ (Financial Analyst) ಕೆಪಿಎಂಜಿಯಂತಹ ದೊಡ್ಡ ಸಂಸ್ಥೆಗಳಲ್ಲಿ ಕೆಲಸ ಮಾಡಿದ ಅನುಭವ ಹೊಂದಿದ್ದಾರೆ. ಪ್ರಸ್ತುತ ಹೋಳಿ ಹಬ್ಬದ ಸಂಭ್ರಮದ ನಡುವೆಯೇ ಗೂಗಲ್ ಸರ್ಚ್ ಇಂಜಿನ್ನಲ್ಲಿ ಕೂಡ “ಹೋಳಿ ವಿಶ್” ಮತ್ತು “ಹೋಳಿ ಸೆಲೆಬ್ರೇಷನ್” ಪದಗಳು ಟ್ರೆಂಡಿಂಗ್ನಲ್ಲಿವೆ.
ಮಾರ್ಚ್ 4 ರಂದು ದೇಶಾದ್ಯಂತ ಸಂಭ್ರಮದಿಂದ ಆಚರಿಸಲಾಗುತ್ತಿರುವ ಈ ಹಬ್ಬಕ್ಕೆ ಸುಂದರ್ ಪಿಚೈ ಅವರ ಈ ಪೋಸ್ಟ್ ಹೊಸ ಮೆರುಗು ನೀಡಿದೆ. ಲಕ್ಷಾಂತರ ಜನರು ಈ ಫೋಟೋಗೆ ಲೈಕ್ ಮಾಡಿದ್ದು, ಕಲಾತ್ಮಕವಾಗಿ ಹೋಳಿಯ ಸತ್ವವನ್ನು ಸೆರೆಹಿಡಿದ ಫೋಟೋಗ್ರಾಫರ್ಗೆ ಮೆಚ್ಚುಗೆ ಸೂಚಿಸುತ್ತಿದ್ದಾರೆ.
https://www.instagram.com/p/DVbZBPNkd6x/?utm_source=ig_web_copy_link&igsh=NTc4MTIwNjQ2YQ==
