ಮುಂಬೈನ ಪ್ರಸಿದ್ಧ ಮಾಲ್ನಲ್ಲಿರುವ ಮಕ್ಕಳ ಆಟದ ಗೃಹವೊಂದರಲ್ಲಿ ಆಹಾರ ನೈರ್ಮಲ್ಯದ ಗಂಭೀರ ಲೋಪ ಬೆಳಕಿಗೆ ಬಂದಿದೆ. ಪೋಷಕರು ತಮ್ಮ ಮಕ್ಕಳಿಗೆ ಆರ್ಡರ್ ಮಾಡಿದ್ದ ಪಾಸ್ಟಾದಲ್ಲಿ ಜಿರಳೆ ಕಂಡುಬಂದಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಪ್ರಮುಖ ಸುದ್ದಿ ವಾಹಿನಿಯೊಂದರಲ್ಲಿ ಬ್ಯೂರೋ ಮುಖ್ಯಸ್ಥರಾಗಿ ಕಾರ್ಯನಿರ್ವಹಿಸುತ್ತಿರುವ ಶ್ರಿಮಿ ಚೌಧರಿ ಎಂಬುವರು ಈ ಅನುಭವವನ್ನು ಎದುರಿಸಿದವರು. ಮುಂಬೈನ ಲೋವರ್ ಪೇರಲ್ ಪ್ರದೇಶದಲ್ಲಿರುವ ‘ಪೋಕಿಡೋ ಜೂನಿಯರ್’ ಎಂಬ ಕಿಡ್ಸ್ ಪ್ಲೇ ಝೋನ್ನಲ್ಲಿ ಈ ಘಟನೆ ನಡೆದಿದೆ. ಮಕ್ಕಳು ಈಗಾಗಲೇ ಆ ಪಾಸ್ಟಾವನ್ನು ತಿಂದ ನಂತರ ತಟ್ಟೆಯಲ್ಲಿ ಜಿರಳೆ ಇರುವುದು ಗಮನಕ್ಕೆ ಬಂದಿದೆ ಎಂದು ಅವರು ತಿಳಿಸಿದ್ದಾರೆ.
ಅಷ್ಟೇ ಅಲ್ಲದೆ, ಈ ಕೇಂದ್ರದ ಕುಳಿತುಕೊಳ್ಳುವ ಆಸನಗಳ ಬಳಿಯೂ ಸತ್ತ ಜಿರಳೆಗಳು ಬಿದ್ದಿದ್ದವು ಎಂದು ಆರೋಪಿಸಿರುವ ಅವರು, ಅಲ್ಲಿನ ನೈರ್ಮಲ್ಯದ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಅವರು, ಬೃಹನ್ಮುಂಬೈ ಮಹಾನಗರ ಪಾಲಿಕೆ ಹಾಗೂ ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ ಸಂಸ್ಥೆಗೆ ಸೂಕ್ತ ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದಾರೆ.
ಇತ್ತೀಚೆಗೆ ಮಹಾರಾಷ್ಟ್ರ ಎಫ್ಡಿಎ ಆಯುಕ್ತರಾಗಿ ಅಧಿಕಾರ ವಹಿಸಿಕೊಂಡಿರುವ ಹಿರಿಯ ಐಎಎಸ್ ಅಧಿಕಾರಿ ತುಕಾರಾಮ್ ಮುಂಧೆ ಅವರು ರಾಜ್ಯಾದ್ಯಂತ ನಕಲಿ ಆಹಾರ ಮತ್ತು ನೈರ್ಮಲ್ಯ ಲೋಪಗಳ ವಿರುದ್ಧ ಕಟ್ಟುನಿಟ್ಟಿನ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಈ ಸಂಸ್ಥೆಯ ಮೇಲೆಯೂ ಸೂಕ್ತ ತನಿಖೆ ನಡೆಯುವ ಸಾಧ್ಯತೆಯಿದೆ.
A cockroach was found in the pasta served to us after our kids had already eaten it. This is completely unacceptable @pokiddojunior, (#LowerParel) this is a serious food safety and hygiene lapse. They are literally playing with kids’ health. This is one of Mumbai’s popular kids’… pic.twitter.com/VDPrh20sx6
— Shrimi Choudhary श्रीमी (@Shrimichoudhary) July 29, 2026
