ಪ್ರಯಾಗ್‌ರಾಜ್ ಕುಂಭಮೇಳದ ಸಮಯದಲ್ಲಿ ವೈರಲ್ ಆಗಿದ್ದ ಮೊನಾಲಿಸಾ ಬಗ್ಗೆ ಎಲ್ಲರಿಗೂ ತಿಳಿದಿದೆ. ಇತ್ತೀಚೆಗೆ ಕೇರಳದಲ್ಲಿ ಫರ್ಮನ್ ಎಂಬ ವ್ಯಕ್ತಿಯನ್ನು ವಿವಾಹವಾಗುವ ಮೂಲಕ ಅವಳು ಮತ್ತೊಮ್ಮೆ ಸುದ್ದಿಯಾಗಿದ್ದಳು.
ಇದೀಗ ಆಕೆಯ ಪತಿ ಫರ್ಮನ್, “ಮೊನಾಲಿಸಾ ಓಡಿಹೋಗಿದ್ದಾಳೆ” ಎಂದು ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋವೊಂದನ್ನು ಅಪ್‌ಲೋಡ್ ಮಾಡಿದ್ದು, ಇದು ಭಾರೀ ಸಂಚಲನ ಮೂಡಿಸಿದೆ. ಆದರೆ, ಮೊನಾಲಿಸಾ ನಾಪತ್ತೆಯಾಗಲು ಫರ್ಮನ್ ಅವರೇ ಕಾರಣ ಎಂದು ಮತ್ತು ಇದೊಂದು ಉದ್ದೇಶಪೂರ್ವಕ ಸಂಚು ಎಂದು ಮೊನಾಲಿಸಾ ತಾಯಿ ಆರೋಪಿಸಿದ್ದಾರೆ.
ಫರ್ಮನ್ ವಿಡಿಯೋದಲ್ಲಿ ಹೇಳಿದ್ದೇನು?
“ನಾನು ಅಜ್ಮೀರ್ ಮತ್ತು ಪುಷ್ಕರ್‌ನಲ್ಲಿದ್ದೇನೆ. ಮೊನಾಲಿಸಾ ಓಡಿಹೋಗಿದ್ದಾಳೆ, ಅವಳನ್ನು ಹುಡುಕಲೆಂದೇ ನಾನು ಇಲ್ಲಿಗೆ ಬಂದಿದ್ದೇನೆ. ಮಿತ್ರರೇ, ನನಗೆ ಅಜ್ಮೀರ್‌ನಲ್ಲಿ ಮೊನಾಲಿಸಾ ಸಿಕ್ಕಿಲ್ಲ. ಅವಳನ್ನು ಹುಡುಕಲು ನಾನು ಜೋಧ್‌ಪುರಕ್ಕೆ ಹೋಗುತ್ತಿದ್ದೇನೆ. ಯಾರಿಗಾದರೂ ಮಾಹಿತಿ ತಿಳಿದಿದ್ದರೆ ದಯವಿಟ್ಟು ನನಗೆ ತಿಳಿಸಿ,” ಎಂದು ಫರ್ಮನ್ ಹೇಳಿಕೊಂಡಿದ್ದಾನೆ.
ಕುಟುಂಬದ ಆತಂಕ ಮತ್ತು ಕಾನೂನು ಕ್ರಮ
ಈ ಘಟನೆಯು ಮೊನಾಲಿಸಾ ಕುಟುಂಬದಲ್ಲಿ ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಆಕೆಯ ತಾಯಿ ಲತಾಬಾಯಿ ಮತ್ತು ತಂದೆ ಜೈಸಿಂಗ್ ಬೋಸಲೆ ಅವರು ಇದೊಂದು ದೊಡ್ಡ ಪಿತೂರಿ ಎಂದು ಆರೋಪಿಸಿದ್ದಾರೆ. ಸುಮಾರು 15-20 ದಿನಗಳ ಹಿಂದೆ ಫರ್ಮನ್ ತನ್ನ ಮಗಳೊಂದಿಗೆ ಮಾತನಾಡಿಸಿದ್ದನು, ಆ ನಂತರ ಇಬ್ಬರೂ ಫೋನ್ ಕರೆಗಳಿಗೆ ಸ್ಪಂದಿಸುತ್ತಿಲ್ಲ ಎಂದು ಅವರು ತಿಳಿಸಿದ್ದಾರೆ.
ಪೋಕ್ಸೊ (POCSO) ಪ್ರಕರಣ ದಾಖಲು: ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ ಮತ್ತು ರಾಷ್ಟ್ರೀಯ ಪರಿಶಿಷ್ಟ ಪಂಗಡಗಳ ಆಯೋಗದ ಹಸ್ತಕ್ಷೇಪದ ನಂತರ ಮೊನಾಲಿಸಾಳ ಅಸಲಿ ಜನ್ಮ ದಿನಾಂಕ ಬಹಿರಂಗವಾಗಿದೆ. ಮೊನಾಲಿಸಾ ಇನ್ನೂ ಅಪ್ರಾಪ್ತೆಯಾಗಿದ್ದರಿಂದ, ಮಹೇಶ್ವರ್ ಪೊಲೀಸ್ ಠಾಣೆಯಲ್ಲಿ ಫರ್ಮನ್ ವಿರುದ್ಧ ಕಠಿಣವಾದ ಪೋಕ್ಸೊ ಕಾಯ್ದೆಯಡಿ ಎಫ್‌ಐಆರ್ ದಾಖಲಿಸಲಾಗಿದೆ. ಈ ಪ್ರಕರಣ ದಾಖಲಾದ ಬೆನ್ನಲ್ಲೇ ಅವಳು ನಾಪತ್ತೆಯಾಗಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.
