ತಾಂತ್ರಿಕ ದೈತ್ಯ ಮೆಟಾ (Meta) ಸಂಸ್ಥೆಯು ತನ್ನ ಒಟ್ಟು ಕಾರ್ಯಪಡೆಯ ಸುಮಾರು 20% ರಷ್ಟು, ಅಂದರೆ ಸುಮಾರು 16,000 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಲು ಯೋಜಿಸುತ್ತಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಕೃತಕ ಬುದ್ಧಿಮತ್ತೆ (AI) ಮೂಲಸೌಕರ್ಯಕ್ಕಾಗಿ ಹೆಚ್ಚುತ್ತಿರುವ ವೆಚ್ಚವನ್ನು ಸರಿದೂಗಿಸಲು ಕಂಪನಿಯು ಈ ಕಠಿಣ ಹೆಜ್ಜೆಗೆ ಮುಂದಾಗಿದೆ.
ಮೆಟಾ ಸಂಸ್ಥೆಯು ಡಿಸೆಂಬರ್ 31 ರ ವೇಳೆಗೆ ಸುಮಾರು 79,000 ಉದ್ಯೋಗಿಗಳನ್ನು ಹೊಂದಿತ್ತು. ಈಗ ಶೇ. 20 ರಷ್ಟು ಉದ್ಯೋಗಿಗಳನ್ನು ಕಡಿತಗೊಳಿಸಿದರೆ, ಇದು ಕಂಪನಿಯ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಮಟ್ಟದ ಲೇ ಆಫ್ ಆಗಲಿದೆ.
AI ಮೇಲೆ ಹೂಡಿಕೆ: ಮಾರ್ಕ್ ಜುಕರ್ಬರ್ಗ್ ಅವರು ಜನರೇಟಿವ್ AI ರೇಸ್ನಲ್ಲಿ ಸ್ಪರ್ಧಿಸಲು ಭಾರಿ ಹೂಡಿಕೆ ಮಾಡುತ್ತಿದ್ದಾರೆ. 2028 ರ ವೇಳೆಗೆ ಡೇಟಾ ಸೆಂಟರ್ ಮೂಲಸೌಕರ್ಯಕ್ಕಾಗಿ $600 ಬಿಲಿಯನ್ ಹೂಡಿಕೆ ಮಾಡುವ ಯೋಜನೆಯನ್ನು ಮೆಟಾ ಹೊಂದಿದೆ.
ಜುಕರ್ಬರ್ಗ್ ಅವರ ಪ್ರಕಾರ, ಈ ಹಿಂದೆ ದೊಡ್ಡ ತಂಡಗಳು ಮಾಡುತ್ತಿದ್ದ ಕೆಲಸವನ್ನು ಈಗ AI ಸಹಾಯದಿಂದ ಒಬ್ಬರೇ ಮಾಡಬಲ್ಲರು. ಇದರಿಂದಾಗಿ ಉದ್ಯೋಗಿಗಳ ಅಗತ್ಯತೆ ಕಡಿಮೆಯಾಗುತ್ತಿದೆ.ಮೆಟಾದ ಲಾಮ 4 (Llama 4) ಮಾಡೆಲ್ ಕಳೆದ ವರ್ಷ ನಿರೀಕ್ಷಿತ ಯಶಸ್ಸು ಕಂಡಿರಲಿಲ್ಲ. ಈಗ ‘ಅವಕಾಡೊ’ (Avocado) ಎಂಬ ಹೊಸ ಮಾಡೆಲ್ ಮೇಲೆ ಕಂಪನಿ ಕೆಲಸ ಮಾಡುತ್ತಿದೆ. 2022 ಮತ್ತು 2023 ರಲ್ಲಿ ಈಗಾಗಲೇ ಸಾವಿರಾರು ಉದ್ಯೋಗಿಗಳನ್ನು ವಜಾಗೊಳಿಸಿದ್ದ ಮೆಟಾ, ಈಗ AI ತಂತ್ರಜ್ಞಾನಕ್ಕೆ ಹೆಚ್ಚಿನ ಹಣ ಮೀಸಲಿಡಲು ಮತ್ತೊಂದು ಸುತ್ತಿನ ಲೇ ಆಫ್ಗೆ ಸಿದ್ಧತೆ ನಡೆಸುತ್ತಿದೆ.
ಇತರ ಕಂಪನಿಗಳಲ್ಲೂ ಲೇ ಆಫ್: ಈ ವರ್ಷದ ಆರಂಭದಲ್ಲಿ ಅಮೆಜಾನ್ (Amazon) ಕೂಡ 16,000 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಫಿನ್-ಟೆಕ್ ಕಂಪನಿ ‘ಬ್ಲಾಕ್’ (Block) ಕೂಡ ತನ್ನ ಅರ್ಧದಷ್ಟು ಸಿಬ್ಬಂದಿಯನ್ನು ಕೈಬಿಟ್ಟಿದೆ.
