ಹುಡುಗ ಅಥವಾ ಹುಡುಗಿಯ ಜಾತಕದಲ್ಲಿ ಯಾವುದೇ ದೋಷವಿಲ್ಲದಿದ್ದರೂ, ಎಷ್ಟೇ ಪೂಜೆ-ಪುನಸ್ಕಾರ ಮಾಡಿದರೂ ಮದುವೆ ಮಾತುಕತೆ ಮುಂದುವರಿಯುತ್ತಿಲ್ಲವೇ? ಸಂಬಂಧಗಳು ಬಂದಷ್ಟೇ ವೇಗವಾಗಿ ಕೈತಪ್ಪಿ ಹೋಗುತ್ತಿವೆಯೇ? ಹಾಗಿದ್ದಲ್ಲಿ ಸಮಸ್ಯೆಯು ಗ್ರಹಗತಿಗಳಿಗಿಂತ ಹೆಚ್ಚಾಗಿ ನಿಮ್ಮ ಮನೆಯ ವಾಸ್ತುವಿನಲ್ಲಿ ಇರಬಹುದು ವಿಶೇಷವಾಗಿ ಅವಿವಾಹಿತರು ಮಲಗುವ ಕೋಣೆಯ ದಿಕ್ಕು ಅವರ ಕಂಕಣ ಭಾಗ್ಯದ ಮೇಲೆ ನೇರ ಪ್ರಭಾವ ಬೀರುತ್ತದೆ ಎನ್ನುತ್ತಾರೆ ವಾಸ್ತು ಶಾಸ್ತ್ರಜ್ಞರು.
ಹೌದು, ವಾಸ್ತು ಶಾಸ್ತ್ರಜ್ಞರ ಪ್ರಕಾರ ಅವಿವಾಹಿತರು ಮಲಗುವ ಕೋಣೆಯ ದಿಕ್ಕು ಅವರ ಮದುವೆಯ ಮೇಲೆ ನೇರ ಪ್ರಭಾವ ಬೀರುತ್ತದೆ. ಹಾಗಾದರೆ ಮದುವೆಯಾಗದವರು ಯಾವ ದಿಕ್ಕಿನಲ್ಲಿ ಮಲಗಬೇಕು? ಯಾವ ತಪ್ಪುಗಳನ್ನು ಮಾಡಬಾರದು? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್:
ಮದುವೆಯಾಗದವರು ಈ ರೂಮಿನಲ್ಲಿ ಮಲಗಲೇಬೇಡಿ
ವಾಸ್ತು ಶಾಸ್ತ್ರದ ಪ್ರಕಾರ, ಮನೆಯ ಕೆಲವು ದಿಕ್ಕುಗಳು ವಿವಾಹ ಪ್ರಕ್ರಿಯೆಯನ್ನು ವಿಳಂಬಗೊಳಿಸುತ್ತವೆ. ಅವುಗಳೆಂದರೆ:
ನೈಋತ್ಯ (South West): ಈ ದಿಕ್ಕು ಮನೆಯ ಹಿರಿಯರಿಗೆ ಮಾತ್ರ ಸೂಕ್ತ. ಅವಿವಾಹಿತ ಯುವಕ-ಯುವತಿಯರು ಈ ಮೂಲೆಯ ರೂಮಿನಲ್ಲಿ ಮಲಗಿದರೆ, ಮದುವೆ ನಿರ್ಧಾರಗಳು ತೀವ್ರವಾಗಿ ವಿಳಂಬವಾಗಬಹುದು ಅಥವಾ ಪದೇ ಪದೇ ಅಡೆತಡೆಗಳು ಎದುರಾಗಬಹುದು.
ಈಶಾನ್ಯ (North East): ಈ ಪವಿತ್ರ ಮೂಲೆಯಲ್ಲಿ ಮದುವೆಯಾಗಬೇಕಾದ ಯುವತಿಯರು ಮಲಗಲೇಬಾರದು. ಇದು ಪೂಜೆ ಅಥವಾ ಚಿಕ್ಕ ಮಕ್ಕಳಿಗೆ ಮಾತ್ರ ಮೀಸಲು. ಇಲ್ಲಿ ಮಲಗುವ ಯುವತಿಯರಿಗೆ ಸಂಬಂಧಗಳು ಕೂಡಿ ಬರುವುದು ಬಹಳ ಕಷ್ಟಕರ ಎನ್ನುತ್ತದೆ ಶಾಸ್ತ್ರ.
ಶೀಘ್ರ ವಿವಾಹಕ್ಕೆ ಯಾವ ದಿಕ್ಕು ಶ್ರೇಷ್ಠ?
ವಾಸ್ತು ವಿಜ್ಞಾನದ ಪ್ರಕಾರ ಮದುವೆಯಾಗದವರಿಗೆ ವಾಯವ್ಯ (North West) ಮೂಲೆಯ ಕೋಣೆ ಅತ್ಯಂತ ಶ್ರೇಷ್ಠವಾಗಿದೆ.
ವಾಯು ತತ್ವದ ಮ್ಯಾಜಿಕ್: ವಾಯವ್ಯ ದಿಕ್ಕು ವಾಯು ತತ್ವವನ್ನು ಹೊಂದಿದ್ದು, ಇದು ಜೀವನದಲ್ಲಿ ಚಲನಶೀಲತೆಯನ್ನು ತರುತ್ತದೆ. ಇಲ್ಲಿ ಮಲಗುವುದರಿಂದ ಹೊಸ ಸಂಬಂಧಗಳು ಬೇಗನೆ ಕುದುರುತ್ತವೆ.
ಪರ್ಯಾಯ ಆಯ್ಕೆ: ವಾಯವ್ಯ ಸಾಧ್ಯವಿಲ್ಲದಿದ್ದರೆ ಪೂರ್ವ ಅಥವಾ ಪಶ್ಚಿಮ ದಿಕ್ಕಿನ ಕೊಠಡಿಗಳನ್ನು ಬಳಸಬಹುದು. ಮಲಗುವಾಗ ತಲೆಯನ್ನು ಪೂರ್ವ ಅಥವಾ ದಕ್ಷಿಣಕ್ಕೆ ಹಾಕಿ ಮಲಗುವುದು ಮನಸ್ಸಿನ ಶಾಂತಿಗೆ ಪೂರಕ.
ಬೆಡ್ರೂಮ್ ಹೇಗಿರಬೇಕು? ಇಲ್ಲಿದೆ ಸ್ಮಾರ್ಟ್ ಟಿಪ್ಸ್
ಕೇವಲ ದಿಕ್ಕಷ್ಟೇ ಅಲ್ಲ, ನಿಮ್ಮ ಕೋಣೆಯ ಅಲಂಕಾರ ಕೂಡ ಸಕಾರಾತ್ಮಕ ಶಕ್ತಿಯನ್ನು ಆಕರ್ಷಿಸುತ್ತದೆ:
ಬಣ್ಣಗಳ ಆಯ್ಕೆ: ಕಪ್ಪು ಅಥವಾ ಕಂದು ಬಣ್ಣದಂತಹ ಗಾಢ ಬಣ್ಣಗಳ ಬದಲು ಗುಲಾಬಿ, ತಿಳಿ ಹಳದಿ ಅಥವಾ ಬಿಳಿ ಬಣ್ಣಗಳನ್ನು ಬಳಸಿ.
ಕಸ ತೆಗೆಯಿರಿ: ಮಂಚದ ಅಡಿಯಲ್ಲಿ ಹಳೆಯ ಕಬ್ಬಿಣದ ವಸ್ತುಗಳು ಅಥವಾ ಮುರಿದ ಸಾಮಾನುಗಳನ್ನು ಇಡಬೇಡಿ. ಇದು ನಕಾರಾತ್ಮಕತೆಯನ್ನು ಸೃಷ್ಟಿಸುತ್ತದೆ.
ಜೋಡಿ ಚಿತ್ರಗಳಿರಲಿ: ಕೋಣೆಯಲ್ಲಿ ಒಬ್ಬಂಟಿ ವ್ಯಕ್ತಿಯ ಚಿತ್ರಗಳ ಬದಲು ಜೋಡಿ ಹಕ್ಕಿಗಳ ಅಥವಾ ಪ್ರಕೃತಿಯ ಸುಂದರ ಚಿತ್ರಗಳನ್ನು ಹಾಕಿ. ಇದು ವಿವಾಹದ ಆಲೋಚನೆಗಳು ಬೇಗನೆ ಕಾರ್ಯರೂಪಕ್ಕೆ ಬರಲು ನೆರವಾಗುತ್ತದೆ.
