ಹೆಂಡತಿ ತನ್ನ ಮೇಲೆ ಕೋಪ ಮಾಡಿಕೊಂಡ ಕಾರಣ, ಆಕೆಯನ್ನು ಮೆಚ್ಚಿಸುವುದಕ್ಕಾಗಿ ಎರಡು ಲಾಟರಿ ಟಿಕೇಟ್ ಅನ್ನು ಈ ಪತಿರಾಯ ಖರೀದಿ ಮಾಡಿದ್ದು, ಜಾಕ್ಪಾಟ್ ಹೊಡೆದಿದೆ !
ಪತ್ನಿಯ ಹೆಸರಿನಲ್ಲಿ ಖರೀದಿ ಮಾಡಿದ ಎರಡೂ ಲಾಟರಿಗೆ ಆಸ್ಟ್ರೇಲಿಯಾದ ವ್ಯಕ್ತಿಗೆ $2 ಮಿಲಿಯನ್ (ಸುಮಾರು ರೂ. 16.4 ಕೋಟಿ) ಸಿಕ್ಕಿದೆ! ಪತ್ನಿಯನ್ನು ರಮಿಸಲು ಪತಿ ಮಾಡಿದ ಈ ಸಾಹಸಕ್ಕೆ ದಂಪತಿ ರಾತ್ರೋರಾತ್ರಿ ಕೋಟ್ಯಧಿಪತಿಗಳಾಗಿದ್ದಾರೆ.
ನ್ಯೂ ಸೌತ್ ವೇಲ್ಸ್‌ನಲ್ಲಿ ಲಾಟರಿ ಖರೀದಿ ಮಾಡಿದ ಪತಿಗೆ ಈ ಭಾರಿ ಮೊತ್ತ ಸಿಕ್ಕಿದೆ. ಈ ದಂಪತಿ ಲಾಟರಿ ಟಿಕೆಟ್ ಖರೀದಿ ಮಾಡುವುದು ಬಹಳ ವರ್ಷಗಳಿಂದಲೂ ನಡೆದು ಬಂದಿದೆ. ಯಾರಿಗೆ ಅದೃಷ್ಟ ಒಲಿಯುತ್ತದೆ ಎಂಬ ಬಗ್ಗೆ ದಂಪತಿ ಬೆಟ್ಟಿಂಗ್ ಕೂಡ ನಡೆಸುತ್ತಿದ್ದರಂತೆ. ಆದರೆ ಈಗ ಪತ್ನಿಯ ಹೆಸರಿನಲ್ಲಿ ಪತಿ ಖರೀದಿಸಿದ್ದ ಲಾಟರಿಗೆ ಅದೃಷ್ಟ ಒಲಿದಿದೆ.
ಆರಂಭದಲ್ಲಿ ಈ ವಿಷಯವನ್ನು ನಂಬಲು ಸಾಧ್ಯವೇ ಆಗಲಿಲ್ಲ ಎಂದು ದಂಪತಿ ಹೇಳಿದ್ದಾರೆ. ಈಗ ಇವರು ತಮ್ಮ ಮಕ್ಕಳಿಗಾಗಿ ಮನೆ ಖರೀದಿಸುವ ಯೋಚನೆಯಲ್ಲಿ ಇದ್ದಾರೆ, ಜೊತೆಗೆ ಮೊಮ್ಮಕ್ಕಳ ಭವಿಷ್ಯಕ್ಕಾಗಿ ಹಣ ಡಿಪಾಸಿಟ್ ಇಡುತ್ತಾರಂತೆ. ಈ ಸುದ್ದಿ ವೈರಲ್ ಆಗುತ್ತಲೇ ಹಣವನ್ನು ಹೇಗೆಲ್ಲಾ ಉಪಯೋಗಿಸಬಹುದು ಎಂಬ ಬಗ್ಗೆ ನೆಟ್ಟಿಗರು ವಿಭಿನ್ನ ರೀತಿಯ ಸಲಹೆ ಕೊಡುತ್ತಿದ್ದಾರೆ.
