ಬೆಂಗಳೂರು: ತನ್ನ ವಾಹನಕ್ಕೆ ತಗುಲಿದೆ ಎಂದು ಕಾರಿನ ಮೇಲೆ ಕುಳಿತಿದ್ದ ಗೂಡ್ಸ್ ವಾಹನ ಚಾಲಕನನ್ನು ಒಂದು ಕಿಲೋಮೀಟರ್ ವರೆಗೂ ಕಾರಿನ ಚಾಲಕ ಎಳೆದೊಯ್ದ ಘಟನೆ ಬೆಂಗಳೂರುನ ಹಲಸೂರು ಪೊಲೀಸ್ ಠಾಣಾ ವ್ಯಾಪ್ತಿಯ ಓಲ್ಡ್ ಏರ್ಪೋರ್ಟ್ ರಸ್ತೆಯಲ್ಲಿ ನಡೆದಿದೆ.
ಬುಧವಾರ ಮಧ್ಯಾಹ್ನ 12:45 ರ ಸುಮಾರಿಗೆ ಘಟನೆ ನಡೆದಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವಾಹನ ತಗುಲಿದ ವಿಚಾರಕ್ಕೆ ಗೂಡ್ಸ್ ಚಾಲಕ ನಂಜುಂಡ ಮತ್ತು ಕಾರ್ ನ ಚಾಲಕರ ಸುರೇಶ್ ನಡುವೆ ವಾಗ್ವಾದ ನಡೆದಿದೆ.
ಇದರಿಂದ ಸಿಟ್ಟುಗೊಂಡ ಸರಕು ವಾಹನ ಚಾಲಕ ಕಾರ್ ಬ್ಯಾನೆಟ್ ಮೇಲೆ ಕುಳಿತಿದ್ದಾನೆ. ಆಕ್ರೋಶಗೊಂಡ ಕಾರ್ ಚಾಲಕ ಆತನ ಸಮೇತ ಕಾರ್ ಚಾಲನೆ ಮಾಡಿದ್ದು, ವಾಹನ ನಿಲ್ಲಿಸುವಂತೆ ಕೂಗಾಡಿದರೂ ಸುಮಾರು ಒಂದು ಕಿಲೋ ಮೀಟರ್ ದೂರ ಎಳೆದೊಯ್ದು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾನೆ. ಹಲಸೂರು ಠಾಣೆ ಪೊಲೀಸರು ಪುಲಿಕೇಶಿ ನಗರದ ಕಾರ್ ಚಾಲಕ ಸುರೇಶ್ ನನ್ನು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ.
