ಮಹಾರಾಷ್ಟ್ರದಲ್ಲಿ ದುರಂತೋ ಎಕ್ಸ್ಪ್ರೆಸ್ ರೈಲಿನ ಕಿಟಕಿಗೆ ಕಲ್ಲು ಬಡಿದು ಒಡೆದಿದ್ದು, ಗಾಜಿನ ಚೂರುಗಳು ಬೋಗಿಯೊಳಗೆ ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ.
ಶುಕ್ರವಾರ ರಾತ್ರಿ ಮಹಾರಾಷ್ಟ್ರದ ಬೋರ್ಖೇಡಿ ನಿಲ್ದಾಣವನ್ನು ದಾಟಿದ ನಂತರ ದುರಂತೋ ಎಕ್ಸ್ಪ್ರೆಸ್ ರೈಲಿನ ಮೇಲೆ ಕಲ್ಲು ತೂರಾಟ ನಡೆದಿದೆ. ಇದರಿಂದ ರೈಲಿನ A-1, B-2 ಮತ್ತು B-5 ಬೋಗಿಗಳ ಕಿಟಕಿ ಗಾಜುಗಳು ಒಡೆದಿವೆ ಎಂದು ಭಾರತೀಯ ರೈಲ್ವೆ ತಿಳಿಸಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವೀಡಿಯೊವೊಂದರಲ್ಲಿ, ರೈಲಿನೊಳಗೆ ಐವರು ಪ್ರಯಾಣಿಕರು ಒಟ್ಟಿಗೆ ಕುಳಿತಿರುವಾಗ ಇದ್ದಕ್ಕಿದ್ದಂತೆ ಕಿಟಕಿಗೆ ಕಲ್ಲು ಬಡಿದು ಗಾಜು ಪುಡಿಪುಡಿಯಾಗಿ, ಅದರ ಚೂರುಗಳು ಬೋಗಿಯೊಳಗೆ ಹರಡಿಕೊಳ್ಳುವುದನ್ನು ಕಾಣಬಹುದು.
ನಾವು ನಾಗ್ಪುರದಿಂದ ಮುಂಬೈಗೆ ಪ್ರಯಾಣಿಸುತ್ತಿದ್ದೆವು ಮತ್ತು ಊಟ ಮಾಡುತ್ತಿದ್ದಾಗ ಇದ್ದಕ್ಕಿದ್ದಂತೆ ಕಿಟಕಿ ಒಡೆಯಿತು ಎಂದು ಪ್ರಯಾಣಿಕರೊಬ್ಬರು ಹೇಳಿದ್ದಾರೆ.
ಆರ್ಪಿಎಫ್ (RPF) ಮತ್ತು ಜಿಆರ್ಪಿ (GRP)ಯಿಂದ ಶೋಧ ಕಾರ್ಯಾಚರಣೆ
ರಾತ್ರಿ ಸುಮಾರು 8:46 ರ ಸುಮಾರಿಗೆ ಘಟನೆಯ ಬಗ್ಗೆ ಮಾಹಿತಿ ಪಡೆದ ನಂತರ ರೈಲ್ವೆ ರಕ್ಷಣಾ ಪಡೆ (RPF) ಮತ್ತು ಸರ್ಕಾರಿ ರೈಲ್ವೆ ಪೊಲೀಸ್ (GRP) ಶೋಧ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದವು.
ಈ ಶೋಧನೆಯು ಬೋರ್ಖೇಡಿ-ಸಿಂಧಿ ವಿಭಾಗದ 803 ಮತ್ತು 796 ಕಿಲೋಮೀಟರ್ ಗಳ ನಡುವಿನ ಪ್ರದೇಶ ಹಾಗೂ ಹತ್ತಿರದ ಬೋರ್ಖೇಡಿ ಮತ್ತು ಬ್ರಾಹ್ಮಣಿ ಗ್ರಾಮಗಳನ್ನು ಒಳಗೊಂಡಿತ್ತು.
ಪೊಲೀಸರು ‘ಪೊಲೀಸ್ ಪಾಟೀಲ್’ (ಗ್ರಾಮ ಮಟ್ಟದ ಪೊಲೀಸ್ ಪ್ರತಿನಿಧಿ) ಮತ್ತು ಸ್ಥಳೀಯ ನಿವಾಸಿಗಳನ್ನು ವಿಚಾರಣೆ ನಡೆಸಿದರಾದರೂ, ಘಟನೆಗೆ ಸಂಬಂಧಿಸಿದ ಯಾವುದೇ ಶಂಕಿತ ವ್ಯಕ್ತಿ ಅಥವಾ ನಿರ್ದಿಷ್ಟ ಸಾಕ್ಷ್ಯಗಳು ಲಭ್ಯವಾಗಲಿಲ್ಲ.
ಹೊರಗಿನಿಂದ ಕಲ್ಲು ಎಸೆಯಲಾಗಿದೆ ಎಂದು ಅಧಿಕಾರಿಗಳ ಹೇಳಿಕೆ
ರೈಲ್ವೆ ಅಧಿಕಾರಿಗಳ ಪ್ರಕಾರ, ರಾತ್ರಿ ಸುಮಾರು 8:27 ರ ಸುಮಾರಿಗೆ ಹೊರಗಿನಿಂದ ಯಾವುದೋ ವಸ್ತು ಅಥವಾ ಕಲ್ಲು ರೈಲಿನ ಕಿಟಕಿಗಳಿಗೆ ಬಡಿದಿದೆ ಎಂಬುದನ್ನು ಭದ್ರತಾ ಸಿಬ್ಬಂದಿ ಮತ್ತು ಪ್ರಯಾಣಿಕರು ದೃಢಪಡಿಸಿದ್ದಾರೆ.
ಈ ಘಟನೆಯಲ್ಲಿ ಯಾವುದೇ ಪ್ರಯಾಣಿಕರಿಗೆ ಗಾಯಗಳಾಗಿಲ್ಲ.
ಶನಿವಾರ ನಸುಕಿನ ಜಾವ 2:55 ಕ್ಕೆ, ರೈಲ್ವೆ ಕಾಯಿದೆಯ ಸೆಕ್ಷನ್ 153 ರ ಅಡಿಯಲ್ಲಿ ಅಪರಿಚಿತ ವ್ಯಕ್ತಿಯ ವಿರುದ್ಧ ಪ್ರಕರಣ (ಕ್ರೈಮ್ ಸಂಖ್ಯೆ 325/2026) ದಾಖಲಿಸಲಾಗಿದೆ.
ತನಿಖೆ ಮುಂದುವರಿಕೆ
ಕಲ್ಲನ್ನು ಎಲ್ಲಿಂದ ಎಸೆಯಲಾಗಿದೆ ಎಂಬುದರ ನಿಖರವಾದ ಸ್ಥಳವನ್ನು ಪತ್ತೆಹಚ್ಚಲು ರೈಲ್ವೆ ಅಧಿಕಾರಿಗಳು ತನಿಖೆಯನ್ನು ಮುಂದುವರಿಸಿದ್ದಾರೆ.
ಮಾದಕವಸ್ತು ಕಳ್ಳಸಾಗಣೆ ತಡೆ ಘಟಕದಲ್ಲಿದ್ದ ಪಂಜಾಬ್ ಪೊಲೀಸ್ ಇನ್ಸ್ ಪೆಕ್ಟರ್ ಅರೆಸ್ಟ್: 3 ಕೆಜಿ ಹೆರಾಯಿನ್, 6 ಗನ್, 17 ಗುಂಡು, 6 ಮೊಬೈಲ್ ವಶಕ್ಕೆ
ಫಿರೋಜ್ಪುರ(ಪಂಜಾಬ್): ಮಾದಕವಸ್ತು ಕಳ್ಳಸಾಗಣೆ ತಡೆ ಘಟಕದಲ್ಲಿದ್ದ ಪಂಜಾಬ್ ಪೊಲೀಸ್ ಇನ್ಸ್ಪೆಕ್ಟರ್ 3 ಕೆಜಿ ಹೆರಾಯಿನ್ ಮತ್ತು 6 ಬಂದೂಕುಗಳೊಂದಿಗೆ ಸಿಕ್ಕಿಬಿದ್ದಿದ್ದಾರೆ.
ಮಾದಕವಸ್ತು ಕಳ್ಳಸಾಗಣೆ ತಡೆಗಟ್ಟುವ ‘ಕೌಂಟರ್ ಇಂಟೆಲಿಜೆನ್ಸ್’ ವಿಭಾಗದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಪಂಜಾಬ್ ಪೊಲೀಸ್ ಇನ್ಸ್ಪೆಕ್ಟರ್ ಒಬ್ಬರನ್ನು ಫಿರೋಜ್ಪುರದಲ್ಲಿ ಬಂಧಿಸಲಾಗಿದೆ. ಅವರ ಕಾರಿನಿಂದ 3.350 ಕೆಜಿ ಹೆರಾಯಿನ್, ಆರು ಪಿಸ್ತೂಲ್ಗಳು ಮತ್ತು ಮದ್ದುಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ಶನಿವಾರ ತಿಳಿಸಿದ್ದಾರೆ.
ಆರೋಪಿಯನ್ನು ಇನ್ಸ್ಪೆಕ್ಟರ್ ಬಲದೇವ್ ಸಿಂಗ್ ಎಂದು ಗುರುತಿಸಲಾಗಿದೆ. ಮಾದಕವಸ್ತುಗಳು ಮತ್ತು ಅಕ್ರಮ ಶಸ್ತ್ರಾಸ್ತ್ರಗಳ ಸಾಗಣೆಯ ಬಗ್ಗೆ ಬಂದ ಖಚಿತ ಮಾಹಿತಿಯ ಮೇರೆಗೆ ಪೊಲೀಸರು ಫಿರೋಜ್ಪುರ-ಮೊಗಾ ರಸ್ತೆಯಲ್ಲಿ ಅವರನ್ನು ತಡೆದು ವಶಕ್ಕೆ ಪಡೆದರು.
ಪೊಲೀಸರ ಪ್ರಕಾರ, ಘಲ್ ಖುರ್ದ್ ಪೊಲೀಸ್ ಠಾಣೆಯ ಎಸ್ಹೆಚ್ಒ (ಠಾಣಾಧಿಕಾರಿ) ಅವರಿಗೆ ಸೆಪ್ಟೆಂಬರ್ 26 ರಂದು ಮಾಹಿತಿ ಲಭಿಸಿತ್ತು. ಕೌಂಟರ್ ಇಂಟೆಲಿಜೆನ್ಸ್ ವಿಭಾಗದ ಫರೀದ್ಕೋಟ್ ಘಟಕದಲ್ಲಿ ನಿಯೋಜಿತರಾಗಿದ್ದ ಸಿಂಗ್, ತಮ್ಮ ‘ಆಡಿ'(Audi) ಕಾರಿನಲ್ಲಿ ಮಾದಕವಸ್ತುಗಳು ಮತ್ತು ಅಕ್ರಮ ಶಸ್ತ್ರಾಸ್ತ್ರಗಳನ್ನು ಸಾಗಿಸುತ್ತಿದ್ದರು ಎಂದು ತಿಳಿದುಬಂದಿತ್ತು.
ಈ ಮಾಹಿತಿಯ ಆಧಾರದ ಮೇಲೆ, ಪೊಲೀಸರು ತಪಾಸಣಾ ಕೇಂದ್ರವನ್ನು (ಚೆಕ್ಪಾಯಿಂಟ್) ಸ್ಥಾಪಿಸಿ ವಾಹನವನ್ನು ತಡೆದು ಸಿಂಗ್ ಅವರನ್ನು ಬಂಧಿಸಿದರು.
3 ಕೆಜಿ ಹೆರಾಯಿನ್, ಶಸ್ತ್ರಾಸ್ತ್ರಗಳು ಮತ್ತು ಮದ್ದುಗುಂಡುಗಳ ವಶ
ಕಾರಿನ ಶೋಧದ ವೇಳೆ ಪೊಲೀಸರು 3.350 ಕೆಜಿ ಹೆರಾಯಿನ್, ಆರು ಪಿಸ್ತೂಲ್ ಗಳು, ನಾಲ್ಕು ಹೆಚ್ಚುವರಿ ಮ್ಯಾಗಜೀನ್ಗಳು ಮತ್ತು 17 ಜೀವಂತ ಗುಂಡುಗಳನ್ನು(live cartridges) ವಶಪಡಿಸಿಕೊಂಡರು. ಜೊತೆಗೆ ಆರು ಮೊಬೈಲ್ ಫೋನ್ಗಳು ಮತ್ತು ವಾಹನವನ್ನೂ ಜಪ್ತಿ ಮಾಡಲಾಯಿತು.
