ಉತ್ತರ ಪ್ರದೇಶದ ರಾಜಧಾನಿ ಲಕ್ನೋದ ಅತ್ಯಂತ ಜನನಿಬಿಡ ಪ್ರದೇಶವಾದ ಹಜರತ್ಗಂಜ್ ಛೇದಕದಲ್ಲಿ ಹೊಸ ವರ್ಷದ ಆಚರಣೆಯ ವೇಳೆ ಪೊಲೀಸ್ ಅಧಿಕಾರಿಯೊಬ್ಬರೇ ಮದ್ಯದ ಅಮಲಿನಲ್ಲಿ ರಂಪಾಟ ಮಾಡಿರುವ ಆಘಾತಕಾರಿ ಘಟನೆ ನಡೆದಿದೆ. ಮದ್ಯ ಸೇವಿಸಿ ಕಾರು ಚಲಾಯಿಸಿದ್ದಲ್ಲದೆ, ಕರ್ತವ್ಯದಲ್ಲಿದ್ದ ಹಿರಿಯ ಅಧಿಕಾರಿಗಳ ಜೊತೆಯೇ ಈತ ಉದ್ಧಟತನ ತೋರಿದ್ದಾನೆ.
ಘಟನೆಯ ವಿವರ: ಬುಧವಾರ ತಡರಾತ್ರಿ ಸುಮಾರು 12:30ರ ಸುಮಾರಿಗೆ ಸಂಚಾರ ದಟ್ಟಣೆ ನಿಯಂತ್ರಿಸಲು ಹಜರತ್ಗಂಜ್ನಲ್ಲಿ ಪೊಲೀಸರು ಬ್ಯಾರಿಕೇಡ್ಗಳನ್ನು ಅಳವಡಿಸಿದ್ದರು. ಈ ವೇಳೆ ಖಾಸಗಿ ಕಾರಿನಲ್ಲಿ ಬಂದ ಸಬ್-ಇನ್ಸ್ಪೆಕ್ಟರ್ ಅಮಿತ್ ಜೈಸ್ವಾಲ್, ಪೊಲೀಸರು ಸೂಚಿಸಿದ ಮಾರ್ಗ ಬದಲಾವಣೆಯನ್ನು (Diversion) ಪಾಲಿಸಲು ನಿರಾಕರಿಸಿದರು.
ಜೀವಕ್ಕೆ ಅಪಾಯ ತಂದ ಪೊಲೀಸ್ ಅಧಿಕಾರಿ: ಟ್ರಾಫಿಕ್ ಪೊಲೀಸರ ಜೊತೆ ವಾಗ್ವಾದ ನಡೆಸಿದ ಅಮಿತ್, ಏಕಾಏಕಿ ಕಾರನ್ನು ವೇಗವಾಗಿ ಚಲಾಯಿಸಿ ಬ್ಯಾರಿಕೇಡ್ಗಳಿಗೆ ಗುದ್ದಿಸಿದ್ದಾರೆ. ಈ ವೇಳೆ ಅಲ್ಲಿ ಕರ್ತವ್ಯದಲ್ಲಿದ್ದ ಸಿಐ ಅಶುತೋಷ್ ತ್ರಿಪಾಠಿ ಅವರು ಕೂದಲೆಳೆ ಅಂತರದಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ನಂತರ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ ಮುಂದೆ ಮತ್ತೊಂದು ಬ್ಯಾರಿಕೇಡ್ಗೆ ಕಾರು ಬಲವಾಗಿ ಡಿಕ್ಕಿ ಹೊಡೆದಿದೆ.
ಡಿಸಿಪಿ ಜೊತೆಗೇ ವಾಗ್ವಾದ: ಪೊಲೀಸರು ಕಾರನ್ನು ಸುತ್ತುವರಿದು ಚಾಲಕನನ್ನು ಹೊರಗೆಳೆದಾಗ ಆತ ಬಾರಾಬಂಕಿ ಪೊಲೀಸ್ ಲೈನ್ಸ್ನಲ್ಲಿ ಕೆಲಸ ಮಾಡುತ್ತಿರುವ ಸಬ್-ಇನ್ಸ್ಪೆಕ್ಟರ್ ಎಂಬುದು ತಿಳಿದುಬಂದಿದೆ. ಸ್ಥಳಕ್ಕೆ ಟ್ರಾಫಿಕ್ ಡಿಸಿಪಿ ಕಮಲೇಶ್ ದೀಕ್ಷಿತ್ ಅವರು ಬಂದಾಗ, ಅಮಿತ್ ಜೈಸ್ವಾಲ್ ಅವರಿಗೂ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕಿದ್ದಾನೆ. ಕಾರಿನಲ್ಲಿ ಮದ್ಯದ ಬಾಟಲಿಗಳು ಪತ್ತೆಯಾಗಿದ್ದು, ಅಧಿಕಾರಿ ಪೂರ್ಣವಾಗಿ ಅಮಲಿನಲ್ಲಿರುವುದು ದೃಢಪಟ್ಟಿದೆ.
ಕಠಿಣ ಕ್ರಮಕ್ಕೆ ಆದೇಶ: ಆರೋಪಿ ಅಮಿತ್ ಜೈಸ್ವಾಲ್ನನ್ನು ಬಂಧಿಸಿ ಹಜರತ್ಗಂಜ್ ಪೊಲೀಸ್ ಠಾಣೆಗೆ ಕರೆದೊಯ್ಯಲಾಗಿದೆ. ವೈದ್ಯಕೀಯ ಪರೀಕ್ಷೆಯ ನಂತರ ಆತನ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸಲಾಗಿದ್ದು, ಇಲಾಖಾ ತನಿಖೆಗೂ ಆದೇಶಿಸಲಾಗಿದೆ. “ಯಾರೇ ಆಗಲಿ ಕಾನೂನಿಗಿಂತ ಮಿಗಿಲಲ್ಲ” ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿದ್ದಾರೆ.
