ಪತ್ತನಂತಿಟ್ಟ: ಲಂಡನ್‌ನಲ್ಲಿ ಕೆಲಸ ಮಾಡುತ್ತಿರುವ ಕೇರಳ ಮೂಲದ ಮೂವರು ನರ್ಸ್‌ಗಳ ಮೇಲೆ ಬಸ್‌ನಲ್ಲಿ ಚಾಕು ತೋರಿಸಿ ಹಲ್ಲೆ ನಡೆಸಲಾಗಿದ್ದು, ಇದು ಜನಾಂಗೀಯ ದ್ವೇಷದ ದಾಳಿ ಎಂಬ ಶಂಕೆ ವ್ಯಕ್ತವಾಗಿದೆ. ಕೆಲಸಕ್ಕೆ ತೆರಳುತ್ತಿದ್ದ ವೇಳೆ ಬಸ್‌ನಲ್ಲೇ ಈ ಅನಿರೀಕ್ಷಿತ ಘಟನೆ ನಡೆದಿದ್ದು, ಪ್ರವಾಸಿಗರ ಮತ್ತು ಅನಿವಾಸಿ ಭಾರತೀಯರ ಸುರಕ್ಷತೆಯ ಬಗ್ಗೆ ಆತಂಕ ಮೂಡಿಸಿದೆ.
ಘಟನೆಯ ವಿವರ ಪತ್ತನಂತಿಟ್ಟ ಜಿಲ್ಲೆಯ ಸೋಬಿ ಮತ್ತು ಡೈಸಿ ಹಾಗೂ ಪುನಲೂರಿನ ಅಕ್ಷಿತಾ ದಾಳಿಗೆ ಒಳಗಾದ ನರ್ಸ್‌ಗಳು. ಭಾನುವಾರ ಬೆಳಿಗ್ಗೆ 7:30ರ ಸುಮಾರಿಗೆ ಇವರು ಕ್ರೊಯಿಡಾನ್‌ನಿಂದ ಬಸ್‌ನಲ್ಲಿ ಕೆಲಸಕ್ಕೆ ಹೋಗುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ಸ್ಥಳೀಯ ಮಹಿಳೆಯೊಬ್ಬಳು ಕೈಯಲ್ಲಿ ಚಾಕು ಹಿಡಿದು ಬಸ್‌ಗೆ ಏರಿದ್ದಾಳೆ. ವರದಿಗಳ ಪ್ರಕಾರ, ಆಕೆ ಉದ್ದೇಶಪೂರ್ವಕವಾಗಿ ಈ ಮೂವರು ಭಾರತೀಯ ನರ್ಸ್‌ಗಳನ್ನೇ ಗುರಿಯಾಗಿಸಿಕೊಂಡು ಹಲ್ಲೆ ನಡೆಸಿದ್ದಾಳೆ.
ಕಣ್ಣೆದುರೇ ನಡೆದ ಭೀಕರ ದೃಶ್ಯ ಹಲ್ಲೆಯ ವೇಳೆ ಸೋಬಿ ಅವರು ಕೇರಳದಲ್ಲಿರುವ ತಮ್ಮ ಪತಿ ಮತ್ತು ಮಕ್ಕಳೊಂದಿಗೆ ವಿಡಿಯೋ ಕಾಲ್‌ನಲ್ಲಿದ್ದರು. ಈ ದಾರುಣ ದೃಶ್ಯವನ್ನು ಅವರ ಕುಟುಂಬದವರು ನೇರ ಪ್ರಸಾರದಲ್ಲಿ ಕಂಡು ಆಘಾತಕ್ಕೊಳಗಾಗಿದ್ದಾರೆ. ಚಾಕು ಹಿಡಿದು ದಾಳಿ ಮಾಡಲು ಬಂದ ಮಹಿಳೆಯನ್ನು ತಡೆಯಲು ಹೋದಾಗ ಅಕ್ಷಿತಾ ಅವರ ಹೊಟ್ಟೆಗೆ ಒದೆಯಲಾಗಿದೆ. ಸೋಬಿ ಮತ್ತು ಡೈಸಿ ಅವರ ಮೇಲೆಯೂ ಆಕೆ ಹಲ್ಲೆ ನಡೆಸಿದ್ದಾಳೆ. ದಾಳಿಯ ವೇಳೆ ಆ ಮಹಿಳೆ “ಇಂಡಿಯನ್ಸ್” (ಭಾರತೀಯರು) ಎಂದು ಕಿರುಚುತ್ತಿದ್ದುದ್ದು ಜನಾಂಗೀಯ ದ್ವೇಷಕ್ಕೆ ಸಾಕ್ಷಿಯಾಗಿದೆ.
ಪ್ರಯಾಣಿಕರ ಸಾಹಸ ದಾಳಿಕೋರ ಮಹಿಳೆ ಮತ್ತಷ್ಟು ಅನಾಹುತ ಮಾಡುವ ಮೊದಲೇ ಬಸ್‌ನಲ್ಲಿದ್ದ ಇತರ ಪ್ರಯಾಣಿಕರು ಆಕೆಯನ್ನು ಹಿಡಿದು ನಿಯಂತ್ರಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಕೂಡಲೇ ಸ್ಥಳಕ್ಕೆ ಬಂದ ಪೊಲೀಸರು ಹಲ್ಲೆಗೊಳಗಾದ ನರ್ಸ್‌ಗಳನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಸದ್ಯ ಮೂವರೂ ಚಿಕಿತ್ಸೆ ಪಡೆಯುತ್ತಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿದುಬಂದಿದೆ.
ಪೊಲೀಸ್ ತನಿಖೆ ಚುರುಕು ಬ್ರಿಟಿಷ್ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ಇದೊಂದು ಜನಾಂಗೀಯ ಪ್ರೇರಿತ ದಾಳಿ ಎಂಬ ದೂರಿನ ಮೇರೆಗೆ ಆಯಾಮದಲ್ಲಿ ತನಿಖೆ ನಡೆಯುತ್ತಿದೆ. ವಿದೇಶದಲ್ಲಿ ಭಾರತೀಯರ ಮೇಲೆ ಇತ್ತೀಚೆಗೆ ನಡೆಯುತ್ತಿರುವ ಇಂತಹ ಘಟನೆಗಳು ಅನಿವಾಸಿ ಭಾರತೀಯ ಸಮುದಾಯದಲ್ಲಿ ಭೀತಿಯನ್ನು ಹುಟ್ಟುಹಾಕಿದೆ.
