ಲೇ-ಆಫ್ ಟು ಸಕ್ಸಸ್: ಕೆಲಸ ಹೋದರೂ ಧೃತಿಗೆಡದ ಬೆಂಗಳೂರು ಯುವಕನ ಸ್ಪೂರ್ತಿದಾಯಕ ಪಯಣ

ಬೆಂಗಳೂರು: ಐಟಿ ಲೋಕದಲ್ಲಿ ಇಂದು ‘ಲೇ-ಆಫ್’ (Layoff) ಎಂಬ ಪದ ಕೇಳಿದರೆ ಸಾಕು ಎಂತಹ ಅನುಭವೀ ಉದ್ಯೋಗಿಗಳೂ ಬೆಚ್ಚಿಬೀಳುತ್ತಾರೆ. ಆದರೆ ಬೆಂಗಳೂರಿನ ಯುವ ಸಾಫ್ಟ್‌ವೇರ್ ಎಂಜಿನಿಯರ್ ಒಬ್ಬರು ತಮಗೆ ಎದುರಾದ ಉದ್ಯೋಗ ನಷ್ಟದ ಸಂಕಷ್ಟವನ್ನು ಎದುರಿಸಿದ ರೀತಿ ಮಾತ್ರ ಇಡೀ ಐಟಿ ವಲಯಕ್ಕೆ ಮಾದರಿಯಾಗಿದೆ. ₹32 ಲಕ್ಷದ ಪ್ಯಾಕೇಜ್ ಹೊಂದಿದ್ದ ಕೆಲಸ ಕೇವಲ ಐದೇ ತಿಂಗಳಲ್ಲಿ ಕೈಬಿಟ್ಟರೂ, ಪ್ಯಾನಿಕ್ ಆಗುವ ಬದಲು ಅವರು ರೂಪಿಸಿದ ‘ಸ್ಮಾರ್ಟ್ ಪ್ಲಾನ್’ ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಐದೇ ತಿಂಗಳಲ್ಲಿ ಎದುರಾದ ಲೇ-ಆಫ್ ಆಘಾತ

ಬೆಂಗಳೂರಿನ ಪ್ರತಿಷ್ಠಿತ ಪ್ರಾಡಕ್ಟ್ ಕಂಪನಿಯೊಂದರಲ್ಲಿ ₹32 ಲಕ್ಷ (CTC) ವಾರ್ಷಿಕ ಪ್ಯಾಕೇಜ್‌ನೊಂದಿಗೆ ಸೈಫ್ಟ್‌ವೇರ್ ಡೆವಲಪರ್ (SDE-1) ಆಗಿ ಈ ಯುವಕ ವೃತ್ತಿಜೀವನ ಆರಂಭಿಸಿದ್ದರು. ಆದರೆ, ದುರದೃಷ್ಟವಶಾತ್ ಕಂಪನಿಯ ಆರ್ಥಿಕ ಮರುಜೋಡಣೆಯ ಭಾಗವಾಗಿ ನಡೆದ ಉದ್ಯೋಗ ಕಡಿತದಲ್ಲಿ ಇವರೂ ಕೆಲಸ ಕಳೆದುಕೊಳ್ಳಬೇಕಾಯಿತು. ಕೆಲಸಕ್ಕೆ ಸೇರಿ ಕೇವಲ 5 ತಿಂಗಳಾಗಿದ್ದ ಕಾರಣ ಈ ಸುದ್ದಿ ಯಾರಿಗಾದರೂ ಶಾಕ್ ನೀಡುವಂತದ್ದೇ ಆಗಿತ್ತು.

ಆರ್ಥಿಕ ಭದ್ರತೆ ನೀಡಿದ ₹8 ಲಕ್ಷದ ‘ಸೆವೆರೆನ್ಸ್ ಪ್ಯಾಕೇಜ್’
ಕೆಲಸದಿಂದ ತೆಗೆದುಹಾಕಿದ ಸಂದರ್ಭದಲ್ಲಿ ಕಂಪನಿಯು ಅವರಿಗೆ 3 ತಿಂಗಳ ಮುಂಗಡ ಸಂಬಳ, ರಜೆಗಳ ನಗದೀಕರಣ ಮತ್ತು ಸ್ಟಾಕ್ ಬೆನಿಫಿಟ್‌ಗಳನ್ನು ಒಳಗೊಂಡ ‘ಸೆವೆರೆನ್ಸ್ ಪ್ಯಾಕೇಜ್’ ನೀಡಿತು. ತೆರಿಗೆ ಕಡಿತದ ನಂತರ ಅವರ ಕೈಗೆ ಸುಮಾರು ₹8 ಲಕ್ಷ ಹಣ ಬಂತು. ಇದು ಅವರಿಗೆ ಮುಂದಿನ ಕೆಲಸ ಹುಡುಕುವವರೆಗೆ ಯಾವುದೇ ಆರ್ಥಿಕ ಒತ್ತಡವಿಲ್ಲದೆ ಬದುಕಲು ಧೈರ್ಯ ನೀಡಿತು.

ನನ್ನ ಮುಂದಿನ ಕೆಲಸ ಹುಡುಕಲು ಅವರೇ ಸಂಬಳ ನೀಡ್ತಿದ್ದಾರೆ

ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಆ ಯುವಕನ ಅದ್ಭುತ ಮೈಂಡ್‌ಸೆಟ್. ಸಾಮಾನ್ಯವಾಗಿ ಕೆಲಸ ಹೋದಾಗ ಹತಾಶರಾಗುವವರ ನಡುವೆ ಇವರು, “ನನ್ನ ಮುಂದಿನ ಕೆಲಸ ಹುಡುಕಲು ಕಂಪನಿಯೇ ನನಗೆ ಹಣ ಪಾವತಿಸುತ್ತಿದೆ” (They are paying me to find my next job) ಎಂದು ಧನಾತ್ಮಕವಾಗಿ ಯೋಚಿಸಿದರು. ಈ ಪಾಸಿಟಿವ್ ಆಲೋಚನೆಯೇ ಅವರನ್ನು ಕಾರ್ಯಪ್ರವೃತ್ತರನ್ನಾಗಿ ಮಾಡಿತು.

ಯಶಸ್ಸಿನ ಹಿಂದಿರುವ ಆ 4 ‘ಸ್ಮಾರ್ಟ್’ ಸೂತ್ರಗಳು:
ತಕ್ಷಣದ ತಯಾರಿ: ಕೆಲಸ ಹೋದ ಮಾರನೇ ದಿನವೇ ಕುಳಿತು ರೆಸ್ಯೂಮ್ ಅಪ್‌ಡೇಟ್ ಮಾಡಿದರು. ಸಮಯ ವ್ಯರ್ಥ ಮಾಡದೆ ಮಾರುಕಟ್ಟೆಗೆ ಸಿದ್ಧರಾದರು.

ನೆಟ್‌ವರ್ಕಿಂಗ್ ಬಲ: ತಮ್ಮ ಹಿರಿಯ ಸಹೋದ್ಯೋಗಿಗಳು ಮತ್ತು ಪರಿಚಯಸ್ಥರನ್ನು ಸಂಪರ್ಕಿಸಿ ‘ರೆಫರಲ್’ ಕೇಳಲು ಶುರುಮಾಡಿದರು.

ಸ್ಪಷ್ಟ ಗುರಿ (Focus): ಗಾಬರಿಯಲ್ಲಿ ಹೊಸ ಕೌಶಲ್ಯಗಳನ್ನು ಕಲಿಯಲು ಹೋಗುವ ಬದಲು, ತಮಗೆ ಈಗಾಗಲೇ ಚೆನ್ನಾಗಿ ತಿಳಿದಿರುವ ಎರಡು ‘ಟೆಕ್ ಸ್ಟಾಕ್‌’ಗಳ ಮೇಲೆ ಹೆಚ್ಚು ಹಿಡಿತ ಸಾಧಿಸಿದರು.

ಸ್ಥಿರ ಪ್ರಯತ್ನ: ಉದ್ಯೋಗ ಹುಡುಕಾಟವನ್ನು ಪೂರ್ಣಾವಧಿ ಕೆಲಸದಂತೆ ಪರಿಗಣಿಸಿ, ಪ್ರತಿ ವಾರ ತಪ್ಪದೇ 12 ರಿಂದ 15 ಕಂಪನಿಗಳಿಗೆ ಅರ್ಜಿ ಸಲ್ಲಿಸುತ್ತಿದ್ದರು.

ನೆಟ್ಟಿಗರ ಮೆಚ್ಚುಗೆ
X (ಟ್ವಿಟ್ಟರ್) ನಲ್ಲಿ ಸಾಕ್ಷಿ ಎಂಬುವವರು ಈ ಕಥೆಯನ್ನು ಹಂಚಿಕೊಂಡಿದ್ದು, ಸಾವಿರಾರು ಜನರು ಟೆಕ್ಕಿಯ ಧೈರ್ಯವನ್ನು ಮೆಚ್ಚಿದ್ದಾರೆ. “ಭಾವನಾತ್ಮಕವಾಗಿ ಕುಸಿಯುವ ಬದಲು, ಬುದ್ಧಿವಂತಿಕೆಯಿಂದ ಪ್ರತಿಕ್ರಿಯಿಸುವುದು ಅಂದರೆ ಇದೇ,” ಎಂದು ಬಳಕೆದಾರರೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಕೌಶಲ್ಯ ಮತ್ತು ಆತ್ಮವಿಶ್ವಾಸವಿದ್ದರೆ ಯಾವುದೇ ಸಂಕಷ್ಟವನ್ನು ಎದುರಿಸಬಹುದು ಎಂಬುದಕ್ಕೆ ಈ ಯುವಕನೇ ಸಾಕ್ಷಿ.

ಲೇ-ಆಫ್ ಎಂಬುದು ವೃತ್ತಿಜೀವನದ ಅಂತ್ಯವಲ್ಲ. ಅದು ನಿಮ್ಮನ್ನು ಮತ್ತೊಂದು ದೊಡ್ಡ ಅವಕಾಶಕ್ಕೆ ಸಿದ್ಧಪಡಿಸುವ ಒಂದು ಸಣ್ಣ ವಿರಾಮವಷ್ಟೇ ಎಂಬ ಸಂದೇಶವನ್ನು ಈ ಕಥೆ ನೀಡುತ್ತದೆ.