ಲಾಪತಾ ಲೇಡೀಸ್ ಸಿನಿಮಾ ಖ್ಯಾತಿಯ ಯುವ ನಟಿ ನಿತಾಂಶೀ ಗೋಯಲ್ ಅವರು ತಮ್ಮ ನಟನೆಯ ಜೊತೆಗೆ ಸೌಂದರ್ಯದಿಂದಲೂ ಸಿನಿಪ್ರಿಯರ ಮನಗೆದ್ದಿದ್ದಾರೆ. ಮುಂಬರುವ ಫ್ಯಾಷನ್ ಲೋಕದಲ್ಲೂ ತಮ್ಮ ಮಣ್ಣಿನ ಸೊಗಡಿನ ಜೊತೆಗೆ ಮಾಡರ್ನ್ ಲುಕ್ ಮೂಲಕ ಸದ್ದು ಮಾಡುತ್ತಿರುವ ಅವರು, ಇತ್ತೀಚೆಗೆ ನಡೆದ ಲ್ಯಾಕ್ಮೆ ಫ್ಯಾಷನ್ ವೀಕ್ 2026ರಲ್ಲಿ ಪ್ರಸಿದ್ಧ ಡಿಸೈನರ್ ಸುನೀತ್ ವರ್ಮಾ ಅವರ ರ‍್ಯಾಂಪ್ ವಾಕ್ ಮಾಡಿ ಎಲ್ಲರ ಗಮನ ಸೆಳೆದಿದ್ದಾರೆ.
ಈ ಪ್ರತಿಷ್ಠಿತ ಫ್ಯಾಷನ್ ಕಾರ್ಯಕ್ರಮದಲ್ಲಿ ನಟಿ ನಿತಾಂಶೀ ಗೋಯಲ್ ವೈನ್ ಬಣ್ಣದ ಫಿಶ್‌ಟೇಲ್ ಲೆಹೆಂಗಾ ಧರಿಸಿ ರ‍್ಯಾಂಪ್ ಮೇಲೆ ಹೆಜ್ಜೆ ಹಾಕಿದರು. ಸಾಂಪ್ರದಾಯಿಕ ಅಂದ ಹಾಗೂ ಮಾಡರ್ನ್ ಲುಕ್ ಎರಡರ ಮಿಶ್ರಣದಂತಿದ್ದ ಈ ಉಡುಗೆಯು ಅತ್ಯಂತ ಆಕರ್ಷಕವಾಗಿತ್ತು. ಮುಂಭಾಗದಲ್ಲಿ ವಿಶೇಷವಾದ ಡ್ರೇಪ್ ಹೊಂದಿರುವ ಸ್ಟ್ರಾಪ್‌ಲೆಸ್ ಬ್ಲೌಸ್ ಹಾಗೂ ಹೈ ವೇಸ್ಟ್ ಬಳಿ ಬಿಗಿಯಾಗಿ ಕೆಳಗೆ ಫ್ಲೇರ್ ಆಗುವ ಫಿಶ್‌ಟೇಲ್ ಶೈಲಿಯ ಸ್ಕರ್ಟ್ ಅವರ ಸುಂದರ ಮೈಕಟ್ಟಿಗೆ ಹೇಳಿ ಮಾಡಿಸಿದಂತಿತ್ತು. ಉಡುಗೆಯ ಪೂರ್ತಿ ದೊಡ್ಡ ಗಾತ್ರದ ಮೆಟಾಲಿಕ್ ಹಾಗೂ ಪ್ಲಮ್ ಬಣ್ಣದ ಸೀಕ್ವೆನ್ಸ್ ಹಾಗೂ ಟೆಕ್ಸ್ಚರ್ ವರ್ಕ್ ಮಾಡಲಾಗಿತ್ತು. ಕೈಗಳಿಗೆ ಭಾರವಾದ ಆಕ್ಸಿಡೈಸ್ಡ್ ಮೆಟಾಲಿಕ್ ಕಡಗಗಳನ್ನು ಧರಿಸುವ ಮೂಲಕ ಉಡುಗೆಯ ಅಂದವನ್ನು ಮತ್ತಷ್ಟು ಹೆಚ್ಚಿಸಲಾಗಿತ್ತು.
ಮೇಕಪ್ ವಿಚಾರದಲ್ಲಿ ನಟಿ ಅತ್ಯಂತ ಸಿಂಪಲ್ ಆಗಿ ಕಾಣಿಸಿಕೊಳ್ಳಲು ಇಷ್ಟಪಟ್ಟರು. ಗುಲಾಬಿ ಬಣ್ಣದ ಬ್ಲಶ್, ಡ್ರೆಸ್‌ಗೆ ಮ್ಯಾಚ್ ಆಗುವ ಬೆರ್ರಿ ಟೋನ್ ಲಿಪ್‌ಸ್ಟಿಕ್ ಹಾಗೂ ಕಣ್ಣುಗಳಿಗೆ ಮೃದುವಾದ ಐಶ್ಯಾಡೋ ಬಳಸಲಾಗಿತ್ತು. ಇನ್ನು ಕೇಶವಿನ್ಯಾಸದ ವಿಷಯದಲ್ಲಿ ಮಧ್ಯದಲ್ಲಿ ಬಾಚಿಕೊಂಡು ಮುಕ್ತವಾಗಿ ಬಿಟ್ಟಿದ್ದ ಹಾಲೀವೂಡ್ ಶೈಲಿಯ ಕರ್ಲ್ಸ್ ಕೂದಲು ಅವರ ಒಟ್ಟಾರೆ ಲುಕ್ ಅನ್ನು ಪರಿಪೂರ್ಣಗೊಳಿಸಿತ್ತು.
ಖ್ಯಾತ ಡಿಸೈನರ್ ಸುನೀತ್ ವರ್ಮಾ ಅವರು ಈ ಬಾರಿಯ ಲ್ಯಾಕ್ಮೆ ಫ್ಯಾಷನ್ ವೀಕ್‌ನಲ್ಲಿ ತಮ್ಮ ಹೊಸ ಬ್ರ್ಯಾಂಡ್ ಆದ ಕಾಶಿ ಕಲೆಕ್ಷನ್ ಅನ್ನು ಪ್ರದರ್ಶಿಸಿದರು. ಕಾಶಿ ನಗರದ ಆಧ್ಯಾತ್ಮಿಕ ವಾತಾವರಣ, ಸಾಂಪ್ರದಾಯಿಕ ಹಿನ್ನೆಲೆ ಹಾಗೂ ಗಂಗಾನದಿಯ ತೀರದಲ್ಲಿ ಗೋಚರಿಸುವ ಬೆಳಕಿನ ವಿನ್ಯಾಸದಿಂದ ಸ್ಫೂರ್ತಿಗೊಂಡು ಈ ಉಡುಪುಗಳನ್ನು ವಿನ್ಯಾಸಗೊಳಿಸಲಾಗಿದೆ. ಕೆಂಪು, ನೇರಳೆ, ಮರೂನ್ ಮತ್ತು ಕಪ್ಪು ಬಣ್ಣದ ಛಾಯೆಗಳು ಈ ಕಲೆಕ್ಷನ್‌ನ ಪ್ರಮುಖ ವಿಶೇಷತೆಯಾಗಿದ್ದು, ಆಧುನಿಕ ಶೈಲಿಯಲ್ಲಿ ಭಾರತೀಯ ಕರಕುಶಲತೆಯನ್ನು ಜಗತ್ತಿಗೆ ಸಾರುವಂತಿತ್ತು.
