ನವದೆಹಲಿ: ಹಾವು ಕಡಿತದಿಂದ ಸಾವನ್ನಪ್ಪುವವರ ಸಂಖ್ಯೆಯಲ್ಲಿ ಕರ್ನಾಟಕ ಸತತ ಎರಡನೇ ವರ್ಷವೂ ದೇಶದಲ್ಲೇ ಮೊದಲ ಸ್ಥಾನದಲ್ಲಿದೆ. ಕೇಂದ್ರ ಸರ್ಕಾರ ಸಂಸತ್ತಿಗೆ ನೀಡಿದ ಮಾಹಿತಿಯ ಪ್ರಕಾರ, 2024ರಲ್ಲಿ 101 ಮಂದಿ ಹಾಗೂ 2025ರಲ್ಲಿ 160 ಮಂದಿ ಹಾವು ಕಡಿತದಿಂದ ಮೃತಪಟ್ಟಿದ್ದಾರೆ. ದೇಶದ ಇತರೆ ಯಾವುದೇ ರಾಜ್ಯದಲ್ಲಿ ಈ ಅವಧಿಯಲ್ಲಿ ಸಾವಿನ ಸಂಖ್ಯೆ 100ರ ಗಡಿ ದಾಟಿಲ್ಲ.
ಹಾವು ಕಡಿತದಿಂದಾಗುವ ಸಾವುಗಳಲ್ಲಿ ಕರ್ನಾಟಕ ಸತತ ಎರಡನೇ ವರ್ಷವೂ ದೇಶದಲ್ಲೇ ಮೊದಲ ಸ್ಥಾನ ಪಡೆದಿರುವುದು ಆತಂಕಕ್ಕೆ ಕಾರಣವಾಗಿದೆ. ಕೇಂದ್ರ ಸರ್ಕಾರ ಸಂಸತ್ತಿಗೆ ನೀಡಿದ ಮಾಹಿತಿಯ ಪ್ರಕಾರ, 2025ರಲ್ಲಿ ರಾಜ್ಯದಲ್ಲಿ 160 ಮಂದಿ ಹಾಗೂ 2024ರಲ್ಲಿ 101 ಮಂದಿ ಹಾವು ಕಡಿತಕ್ಕೆ ಬಲಿಯಾಗಿದ್ದು, ಗ್ರಾಮೀಣ ಮತ್ತು ಅರಣ್ಯ ಪ್ರದೇಶಗಳಲ್ಲಿ ಹಾವು-ಮಾನವ ಸಂಘರ್ಷ ಹೆಚ್ಚುತ್ತಿರುವ ಗಂಭೀರ ಚಿತ್ರಣವನ್ನು ಈ ಅಂಕಿಅಂಶಗಳು ಬಿಚ್ಚಿಟ್ಟಿವೆ.
ಹಾವು ಕಡಿತ ಪ್ರಕರಣಗಳ ಸಂಖ್ಯೆಯಲ್ಲಿ ಮಾತ್ರ ಪಶ್ಚಿಮ ಬಂಗಾಳ ಮೊದಲ ಸ್ಥಾನದಲ್ಲಿದ್ದು, 2025ರಲ್ಲಿ 27,471 ಪ್ರಕರಣಗಳು ದಾಖಲಾಗಿವೆ. ಕರ್ನಾಟಕದಲ್ಲಿ 16,805 ಹಾವು ಕಡಿತ ಪ್ರಕರಣಗಳು ದಾಖಲಾಗಿದ್ದು, ರಾಜ್ಯ ಎರಡನೇ ಸ್ಥಾನದಲ್ಲಿದೆ. 2024ರಲ್ಲಿಯೂ ಪಶ್ಚಿಮ ಬಂಗಾಳದಲ್ಲಿ 20,888 ಹಾಗೂ ಕರ್ನಾಟಕದಲ್ಲಿ 13,235 ಪ್ರಕರಣಗಳು ದಾಖಲಾಗಿದ್ದವು.2024ರಲ್ಲಿ ಕರ್ನಾಟಕದಲ್ಲಿ 101 ಮಂದಿ ಹಾಗೂ 2025ರಲ್ಲಿ 160 ಮಂದಿ ಹಾವು ಕಡಿತದಿಂದ ಮೃತಪಟ್ಟಿದ್ದಾರೆ.
ಕೇಂದ್ರ ಸರ್ಕಾರದ ಅಂಕಿಅಂಶಗಳು ಗ್ರಾಮೀಣ ಮತ್ತು ಅರಣ್ಯ ಪ್ರದೇಶಗಳಲ್ಲಿ ಹಾವು-ಮಾನವ ಸಂಘರ್ಷ ಹೆಚ್ಚುತ್ತಿರುವ ಆತಂಕಕಾರಿ ಚಿತ್ರಣವನ್ನು ಬಿಚ್ಚಿಟ್ಟಿವೆ. ಹಾವು ಕಡಿತದಿಂದಾಗುವ ಸಾವುಗಳನ್ನು ತಡೆಯಲು ತ್ವರಿತ ಚಿಕಿತ್ಸೆ, ಆಂಟಿ-ಸ್ನೇಕ್ ವೆನಮ್ (ASV) ಲಭ್ಯತೆ ಹಾಗೂ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವ ಅಗತ್ಯವಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಹಾವು ಕಚ್ಚಿದರೆ ಏನು ಮಾಡಬೇಕು.?
ಹಾವು ಕಚ್ಚಿದರೆ ಗಾಬರಿಯಾಗದೆ ತಕ್ಷಣ ಸರಿಯಾದ ಪ್ರಥಮ ಚಿಕಿತ್ಸೆ ನೀಡುವುದು ಅತ್ಯಂತ ಮುಖ್ಯ. ಈ ಕ್ರಮಗಳನ್ನು ಅನುಸರಿಸಿ:
- ತಕ್ಷಣ 108ಕ್ಕೆ ಕರೆ ಮಾಡಿ ಅಥವಾ ಸಮೀಪದ ಆಸ್ಪತ್ರೆಗೆ ಆದಷ್ಟು ಬೇಗ ಕರೆದೊಯ್ಯಿರಿ.
- ಕಚ್ಚಿಸಿಕೊಂಡ ವ್ಯಕ್ತಿಯನ್ನು ಶಾಂತವಾಗಿರಿಸಿ. ಹೆಚ್ಚು ಚಲಿಸಿದಷ್ಟೂ ವಿಷ ದೇಹದಲ್ಲಿ ಬೇಗ ಹರಡಬಹುದು.
- ಕಚ್ಚಿದ ಕೈ ಅಥವಾ ಕಾಲನ್ನು ಸಾಧ್ಯವಾದಷ್ಟು ಅಲುಗಾಡಿಸದೆ ನೇರವಾಗಿ ಇರಿಸಿ. ಅಗತ್ಯವಿದ್ದರೆ ಸ್ಪ್ಲಿಂಟ್‌ನಿಂದ ಸ್ಥಿರಗೊಳಿಸಿ.
- ಉಂಗುರ, ಬಳೆ, ಗಡಿಯಾರ ಅಥವಾ ಬಿಗಿಯಾದ ಬಟ್ಟೆಗಳನ್ನು ತೆಗೆದುಹಾಕಿ, ಏಕೆಂದರೆ ಊತ ಬರಬಹುದು.
- ಗಾಯವನ್ನು ನೀರಿನಿಂದ ಸ್ವಚ್ಛಗೊಳಿಸಿ, ಆದರೆ ಕತ್ತರಿಸುವುದು ಅಥವಾ ಒತ್ತುವುದು ಬೇಡ.
ಈ ತಪ್ಪುಗಳನ್ನು ಮಾಡಬೇಡಿ
- ಗಾಯವನ್ನು ಕತ್ತರಿಸಬೇಡಿ.
- ವಿಷವನ್ನು ಬಾಯಿಯಿಂದ ಹೀರುವ ಪ್ರಯತ್ನ ಮಾಡಬೇಡಿ.
- ಬಿಗಿಯಾಗಿ ಹಗ್ಗ ಅಥವಾ ಟೂರ್ನಿಕೇಟ್ ಕಟ್ಟಬೇಡಿ.
- ಐಸ್, ಮಣ್ಣು, ಎಣ್ಣೆ, ಗಿಡಮೂಲಿಕೆ ಅಥವಾ ಯಾವುದೇ ಮನೆಮದ್ದು ಹಚ್ಚಬೇಡಿ.
- ವೈದ್ಯರ ಸಲಹೆ ಇಲ್ಲದೆ ಔಷಧಿ ಕೊಡಬೇಡಿ.
ಆಸ್ಪತ್ರೆಗೆ ತಲುಪಿದ ಬಳಿಕ
- ವೈದ್ಯರು ಅಗತ್ಯವಿದ್ದರೆ ಆಂಟಿ-ಸ್ನೇಕ್ ವೆನಮ್ (ASV) ಚಿಕಿತ್ಸೆ ನೀಡುತ್ತಾರೆ.
- ಸಾಧ್ಯವಾದರೆ ಹಾವಿನ ಬಣ್ಣ, ಗಾತ್ರ ಅಥವಾ ಲಕ್ಷಣಗಳನ್ನು ಮಾತ್ರ ನೆನಪಿಟ್ಟುಕೊಳ್ಳಿ. ಹಾವನ್ನು ಹಿಡಿಯಲು ಅಥವಾ ಕೊಲ್ಲಲು ಪ್ರಯತ್ನಿಸಬೇಡಿ.
ಎಚ್ಚರಿಕೆ: ಹಾವು ವಿಷಕಾರಿಯೇ ಅಥವಾ ಅಲ್ಲವೇ ಎಂಬುದನ್ನು ಗುರುತಿಸಲು ಪ್ರಯತ್ನಿಸುವುದಕ್ಕಿಂತ, ಪ್ರತಿ ಹಾವು ಕಚ್ಚಿದ ಘಟನೆಯನ್ನು ತುರ್ತು ವೈದ್ಯಕೀಯ ಪರಿಸ್ಥಿತಿಯೆಂದು ಪರಿಗಣಿಸಿ ತಕ್ಷಣ ಆಸ್ಪತ್ರೆಗೆ ಹೋಗುವುದು ಸುರಕ್ಷಿತ.
