ಮಕ್ಕಳ ಅಂದವನ್ನು ಹೆಚ್ಚಿಸಲು ಮತ್ತು ದೃಷ್ಟಿಯಿಂದ ರಕ್ಷಿಸಲು ಕಣ್ಣಿಗೆ ಕಾಡಿಗೆ ಹಚ್ಚುವುದು ಭಾರತೀಯರಲ್ಲಿ ಶತಮಾನಗಳಿಂದ ನಡೆದುಬಂದ ಸಂಪ್ರದಾಯ. ಕಾಡಿಗೆ ಹಚ್ಚುವುದರಿಂದ ಕಣ್ಣುಗಳು ದೊಡ್ಡದಾಗಿ ಕಾಣುತ್ತವೆ ಹಾಗೂ ಮಗುವಿಗೆ ಯಾವುದೇ ಕೆಟ್ಟ ದೃಷ್ಟಿ ತಗುಲುವುದಿಲ್ಲ ಎಂಬುದು ತಲೆಮಾರುಗಳ ನಂಬಿಕೆ. ಆದರೆ, ಪವಿತ್ರವೆಂದು ಭಾವಿಸುವ ಈ ಸಂಪ್ರದಾಯ ಇಂದು ಮಕ್ಕಳ ಪಾಲಿಗೆ ಆರೋಗ್ಯದ ಸಂಕಷ್ಟವಾಗಿ ಪರಿಣಮಿಸುತ್ತಿದೆ ಹೌದು ನಾವು ಪ್ರೀತಿಯಿಂದ ಮಗುವಿನ ಕಣ್ಣಿಗೆ ಹಚ್ಚುವ ಕಾಡಿಗೆಯ ಹಿಂದೆ ಅಡಗಿರುವ ಆಘಾತಕಾರಿ ಸತ್ಯವೊಂದನ್ನು ಆಧುನಿಕ ವೈದ್ಯಕೀಯ ವಿಜ್ಞಾನವು ಬಯಲಿಗೆಳೆದಿದೆ
ಇತ್ತೀಚೆಗೆ ಉತ್ತರ ಪ್ರದೇಶದ ಜೌನ್‌ಪುರದಲ್ಲಿ ಕಾಡಿಗೆ ಹಚ್ಚಿದ ಕಾರಣದಿಂದ ಹಲವು ಮಕ್ಕಳ ಕಣ್ಣುಗಳಲ್ಲಿ ವಿಪರೀತ ಉರಿ, ಊತ ಮತ್ತು ಸೋಂಕು ಕಾಣಿಸಿಕೊಂಡ ಪ್ರಕರಣಗಳು ವರದಿಯಾಗಿವೆ.ಈ ಬಗ್ಗೆ ಮಕ್ಕಳ ತಜ್ಞರಾದ ಡಾ. ಗುಂಜನ್ ಪಟೇಲ್ ಅವರು ನೀಡಿದ ಮಹತ್ವದ ಎಚ್ಚರಿಕೆಗಳು ಇಲ್ಲಿವೆ:
ಮಾರುಕಟ್ಟೆಯ ಕಾಡಿಗೆ ಏಕೆ ಅಪಾಯಕಾರಿ?
ಡಾ. ಗುಂಜನ್ ಪಟೇಲ್ ಅವರ ಪ್ರಕಾರ ಇಂದು ಮಾರುಕಟ್ಟೆಯಲ್ಲಿ ಲಭ್ಯವಿರುವ ಬಹುತೇಕ ಕಾಡಿಗೆಗಳು ಶುದ್ಧವಾಗಿಲ್ಲ. ಅವುಗಳಲ್ಲಿ ಈ ಕೆಳಗಿನ ಹಾನಿಕಾರಕ ಅಂಶಗಳಿರುತ್ತವೆ:
ಕಾರ್ಬನ್ ಮತ್ತು ಸೀಸ (Lead): ಇವು ಕಣ್ಣಿನ ದೃಷ್ಟಿಯ ಮೇಲೆ ಗಂಭೀರ ಪರಿಣಾಮ ಬೀರುತ್ತವೆ.
ವಿಷಕಾರಿ ರಾಸಾಯನಿಕಗಳು: ಮಗುವಿನ ಸೂಕ್ಷ್ಮ ಚರ್ಮವು ಈ ರಾಸಾಯನಿಕಗಳನ್ನು ಹೀರಿಕೊಂಡಾಗ ಅಲರ್ಜಿ ಉಂಟಾಗುತ್ತದೆ.
ಕಾಡಿಗೆಯಿಂದಾಗುವ ಆರೋಗ್ಯ ಸಮಸ್ಯೆಗಳು:
ಕೆಮಿಕಲ್ ಮಿಶ್ರಿತ ಕಾಡಿಗೆಯನ್ನು ಬಳಸುವುದರಿಂದ ಮಕ್ಕಳಿಗೆ ಈ ಕೆಳಗಿನ ತೊಂದರೆಗಳು ಎದುರಾಗಬಹುದು:
ಕಣ್ಣಿನಲ್ಲಿ ಸದಾ ನೀರು ಬರುವುದು: ಕಣ್ಣೀರಿನ ನಾಳಗಳು ಮುಚ್ಚಿಹೋಗುವುದರಿಂದ ಈ ಸಮಸ್ಯೆ ಕಾಡುತ್ತದೆ.
ಕಣ್ಣು ಕೆಂಪಾಗುವುದು ಮತ್ತು ಊತ: ಪದೇ ಪದೇ ಕಣ್ಣು ಉಜ್ಜುವುದರಿಂದ ಸೋಂಕು ತೀವ್ರಗೊಳ್ಳುತ್ತದೆ.
ಕಣ್ಣಿನ ರೆಪ್ಪೆಗಳ ಮೇಲೆ ಗುಳ್ಳೆಗಳು: ಬ್ಯಾಕ್ಟೀರಿಯಾ ಸೋಂಕಿನಿಂದ ರೆಪ್ಪೆಗಳ ಮೇಲೆ ನೋವಿನಿಂದ ಕೂಡಿದ ಗುಳ್ಳೆಗಳಾಗಬಹುದು.
ದೃಷ್ಟಿ ದೋಷ: ದೀರ್ಘಕಾಲದ ಬಳಕೆಯು ಕಣ್ಣಿನ ಕಪ್ಪುಕಣ್ಣು (Cornea) ಮೇಲೆ ಪರಿಣಾಮ ಬೀರಬಹುದು ಮತ್ತು ದೃಷ್ಟಿ ದುರ್ಬಲಗೊಳ್ಳುವ ಸಾಧ್ಯತೆ ಇರುತ್ತದೆ.
ಒಂದು ವರ್ಷದೊಳಗಿನ ಮಕ್ಕಳಿಗೆ ಕಟ್ಟುನಿಟ್ಟಿನ ನಿಷೇಧ
ಒಂದು ವರ್ಷದೊಳಗಿನ ಶಿಶುಗಳ ಚರ್ಮ ಮತ್ತು ಕಣ್ಣಿನ ನರಗಳು ಅತ್ಯಂತ ಮೃದುವಾಗಿರುತ್ತವೆ. ಆದ್ದರಿಂದ:
ಯಾವುದೇ ಕಾರಣಕ್ಕೂ ಮಾರುಕಟ್ಟೆಯ ಕಾಡಿಗೆಯನ್ನು ಶಿಶುಗಳಿಗೆ ಬಳಸಬಾರದು.
ಸಂಪ್ರದಾಯಕ್ಕಿಂತ ಮಗುವಿನ ಆರೋಗ್ಯಕ್ಕೆ ಹೆಚ್ಚಿನ ಆದ್ಯತೆ ನೀಡಬೇಕು.
ಕಣ್ಣಿನ ಸ್ವಚ್ಛತೆಗಾಗಿ ಕೇವಲ ಶುದ್ಧವಾದ ಬಟ್ಟೆ ಮತ್ತು ಕಾಯಿಸಿ ಆರಿಸಿದ ನೀರನ್ನು ಮಾತ್ರ ಬಳಸಿ.
