ಬಾಲ್ಯದಲ್ಲಿ ತಿನ್ನುವ ಜಂಕ್ ಫುಡ್ ನಿಮ್ಮ ಮಗುವಿನ ಮೆದುಳನ್ನೇ ಬದಲಾಯಿಸುತ್ತೆ: ಜೀವನಪೂರ್ತಿ ಕಾಡಲಿದೆ ಮರೆವಿನ ಸಮಸ್ಯೆ

ಲಂಡನ್: ಬಾಲ್ಯದಲ್ಲಿ ಅತಿಯಾಗಿ ಪಿಜ್ಜಾ, ಬರ್ಗರ್, ಚಿಪ್ಸ್‌ನಂತಹ ಜಂಕ್ ಫುಡ್ ತಿನ್ನುವುದರಿಂದ ಮೆದುಳಿನ ರಚನೆ ಮತ್ತು ಹಸಿವನ್ನು ನಿಯಂತ್ರಿಸುವ ಭಾಗಗಳು ಜೀವನಪೂರ್ತಿ ಬದಲಾಗುತ್ತವೆ ಎಂಬ ಶಾಕಿಂಗ್ ಸತ್ಯ ಇತ್ತೀಚಿನ ಅಧ್ಯಯನದಿಂದ ಹೊರಬಿದ್ದಿತ್ತು. ದೊಡ್ಡವರಾದ ಮೇಲೆ ಎಷ್ಟೇ ಹೆಲ್ದೀ ಫುಡ್ ತಿಂದರೂ ಈ ಹಾನಿ ಸರಿಯಾಗುವುದಿಲ್ಲ ಎಂದು ವಿಜ್ಞಾನಿಗಳು ಕಳವಳ ವ್ಯಕ್ತಪಡಿಸಿದ್ದರು.

ಆದರೆ, ಈಗ ಜಂಕ್ ಫುಡ್ ಪ್ರಿಯರಿಗೆ ಮತ್ತು ಪೋಷಕರಿಗೆ ಸಮಾಧಾನ ತರುವಂತಹ ಬಿಗ್ ಅಪ್ಡೇಟ್ ಒಂದನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ ನಮ್ಮ ಕರುಳಿನಲ್ಲಿರುವ ಕೆಲವು ಪ್ರಯೋಜನಕಾರಿ ಬ್ಯಾಕ್ಟೀರಿಯಾಗಳು (Beneficial Gut Bacteria) ಮತ್ತು ಪ್ರೀಬಯೋಟಿಕ್ ಫೈಬರ್‌ಗಳು (Prebiotic Fibres) ಜಂಕ್ ಫುಡ್‌ನಿಂದ ಮೆದುಳಿನ ಮೇಲಾಗಿರುವ ದೀರ್ಘಕಾಲದ ದುಷ್ಪರಿಣಾಮಗಳನ್ನು ಭಾಗಶಃ ಸರಿಪಡಿಸುವ ಅದ್ಭುತ ಸಾಮರ್ಥ್ಯವನ್ನು ಹೊಂದಿವೆ ಎಂದು ಐರ್ಲೆಂಡ್‌ನ ಯುನಿವರ್ಸಿಟಿ ಕಾಲೇಜ್ ಕಾರ್ಕ್ (UCC) ನ ನೂತನ ಸಂಶೋಧನೆ ತಿಳಿಸಿದೆ

ಮೆದುಳಿನ ‘ಹೈಪೋಥಾಲಮಸ್’ ಮೇಲಾಗುತ್ತೆ ಜಂಕ್ ಫುಡ್ ಅಟ್ಯಾಕ್

ಜಾಗತಿಕ ವಿಜ್ಞಾನ ನಿಯತಕಾಲಿಕೆ ‘ನೇಚರ್ ಕಮ್ಯುನಿಕೇಷನ್ಸ್’ (Nature Communications) ನಲ್ಲಿ ಪ್ರಕಟವಾದ ಈ ಅಧ್ಯಯನದ ಪ್ರಕಾರ, ಬಾಲ್ಯದಲ್ಲಿ ಸಕ್ಕರೆ ಮತ್ತು ಕೊಬ್ಬಿನಾಂಶವಿರುವ ಅತಿಯಾದ ಕ್ಯಾಲೊರಿ ಆಹಾರ ಸೇವಿಸುವುದರಿಂದ ಅದು ಹಸಿವು ಮತ್ತು ಶಕ್ತಿಯ ಸಮತೋಲನವನ್ನು ನಿಯಂತ್ರಿಸುವ ಮೆದುಳಿನ ಮುಖ್ಯ ಭಾಗವಾದ ‘ಹೈಪೋಥಾಲಮಸ್’ (Hypothalamus) ನ ಕಾರ್ಯವೈಖರಿಯನ್ನು ಏರುಪೇರು ಮಾಡುತ್ತದೆ.

ಯುಸಿಸಿ ಮೂಲದ ಪ್ರಮುಖ ಸಂಶೋಧನಾ ಸಂಸ್ಥೆಯಾದ ‘ಎಪಿಸಿ ಮೈಕ್ರೋಬಯೋಮ್’ (APC Microbiome) ಇಲಿಗಳ ಮಾದರಿಯನ್ನು ಬಳಸಿ ನಡೆಸಿದ ಪ್ರಯೋಗದಲ್ಲಿ, ಅನಾರೋಗ್ಯಕರ ಆಹಾರ ಪದ್ಧತಿಯನ್ನು ನಿಲ್ಲಿಸಿ ದೇಹದ ತೂಕವು ಮತ್ತೆ ನಾರ್ಮಲ್ ಸ್ಥಿತಿಗೆ ಬಂದ ಮೇಲೂ ಮೆದುಳಿನ ಈ ಹಾನಿ ಹಾಗೇ ಉಳಿದುಕೊಂಡಿರುವುದು ಪತ್ತೆಯಾಗಿತ್ತು. ಇದು ಭವಿಷ್ಯದಲ್ಲಿ ತೀವ್ರ ಬೊಜ್ಜು (Obesity) ಮತ್ತು ಮರೆವಿನ ಸಮಸ್ಯೆಗೆ ಕಾರಣವಾಗುತ್ತದೆ.

ಡ್ಯಾಮೇಜ್ ಆದ ಮೆದುಳನ್ನು ರಿಪೇರಿ ಮಾಡಲಿದೆ ಕರುಳಿನ ಬ್ಯಾಕ್ಟೀರಿಯಾ

ಮೆದುಳಿನ ಈ ಗುಪ್ತ ಹಾಗೂ ದೀರ್ಘಕಾಲದ ಪರಿಣಾಮಗಳನ್ನು ತಡೆಯಲು ವಿಜ್ಞಾನಿಗಳು ಕರುಳಿನ ಮೈಕ್ರೋಬಯೋಮ್ (Gut Microbiome) ಅನ್ನು ಗುರಿಯಾಗಿಸಿಕೊಂಡು ಹೊಸ ಚಿಕಿತ್ಸೆಯನ್ನು ಪರೀಕ್ಷಿಸಿದರು. ಇದಕ್ಕಾಗಿ ಒಂದು ವಿಶೇಷ ಪ್ರಯೋಜನಕಾರಿ ಬ್ಯಾಕ್ಟೀರಿಯಾದ ತಳಿ ಮತ್ತು ಪ್ರೀಬಯೋಟಿಕ್ ಫೈಬರ್‌ಗಳನ್ನು ಬಳಸಲಾಯಿತು:

Bifidobacterium longum APC1472: ಈ ಪ್ರೋಬಯೋಟಿಕ್ ಬ್ಯಾಕ್ಟೀರಿಯಾ ತಳಿಯು ಒಟ್ಟಾರೆ ಕರುಳಿನ ಮೈಕ್ರೋಬಯೋಮ್ ಮೇಲೆ ಸಣ್ಣ ಬದಲಾವಣೆಗಳನ್ನು ಮಾಡುವ ಮೂಲಕ, ಜಂಕ್ ಫುಡ್‌ನಿಂದ ಹಾನಿಗೊಳಗಾಗಿದ್ದ ಆಹಾರದ ನಡವಳಿಕೆಯನ್ನು ಮೆದುಳಿನಲ್ಲಿ ಗಮನಾರ್ಹವಾಗಿ ಸುಧಾರಿಸಿದೆ!

FOS ಮತ್ತು GOS ಮಿಶ್ರಣ: ಫ್ರಕ್ಟೋ-ಒಲಿಗೋಸ್ಯಾಕರೈಡ್ಸ್ (FOS) ಹಾಗೂ ಗ್ಯಾಲಕ್ಟೋ-ಒಲಿಗೋಸ್ಯಾಕರೈಡ್ಸ್ (GOS) ನಂತಹ ಪ್ರೀಬಯೋಟಿಕ್ ಮಿಶ್ರಣಗಳು ಕರುಳಿನಾದ್ಯಂತ ವ್ಯಾಪಕವಾದ ಸಕಾರಾತ್ಮಕ ಬದಲಾವಣೆಗಳನ್ನು ಉಂಟುಮಾಡಿ ಮೆದುಳಿನ ಆರೋಗ್ಯವನ್ನು ಮರುಸ್ಥಾಪಿಸಲು ನೆರವಾಗಿವೆ.

ನಿಮ್ಮ ಆಹಾರದಲ್ಲಿ ಇವು ಹೆಚ್ಚಿರಲಿ

ಮೆದುಳಿನ ಹಾನಿಯನ್ನು ತಡೆಯುವ ಈ ಪ್ರೀಬಯೋಟಿಕ್ ಫೈಬರ್‌ಗಳು ನೈಸರ್ಗಿಕವಾಗಿ ನಮ್ಮ ಅಡುಗೆಮನೆಯಲ್ಲಿ ಸಿಗುವ ಈ ಕೆಳಗಿನ ಆಹಾರ ಪದಾರ್ಥಗಳಲ್ಲಿ ಸಮೃದ್ಧವಾಗಿವೆ:

ಈರುಳ್ಳಿ ಮತ್ತು ಬೆಳ್ಳುಳ್ಳಿ

ಲೀಕ್ಸ್ ಮತ್ತು ಆಸ್ಪ್ಯಾರಗಸ್ (ಶತಾವರಿ)

ಬಾಳೆಹಣ್ಣುಗಳು

“ನಮ್ಮ ಸಂಶೋಧನೆಯು ನಾವು ಬಾಲ್ಯದಲ್ಲಿ ಏನು ತಿನ್ನುತ್ತೇವೆ ಎಂಬುದು ಎಷ್ಟು ಮುಖ್ಯ ಎಂಬುದನ್ನು ತೋರಿಸುತ್ತದೆ. ಬಾಲ್ಯದ ಆಹಾರ ಪದ್ಧತಿಯು ಕೇವಲ ತೂಕದ ಮೂಲಕ ತಕ್ಷಣವೇ ಕಣ್ಣಿಗೆ ಕಾಣಿಸದ ಕೆಲವು ಗುಪ್ತ ಪರಿಣಾಮಗಳನ್ನು ಮೆದುಳಿನ ಮೇಲೆ ಬೀರುತ್ತದೆ. ಆದರೆ ಕರುಳಿನ ಮೈಕ್ರೋಬಯೋಟಾವನ್ನು ಮಾರ್ಪಡಿಸುವುದರಿಂದ ಈ ದೀರ್ಘಕಾಲದ ದುಷ್ಪರಿಣಾಮಗಳನ್ನು ಕಡಿಮೆ ಮಾಡಬಹುದು,” ಎಂದು ಈ ಅಧ್ಯಯನದ ಪ್ರಮುಖ ಲೇಖಕಿ ಡಾ. ಕ್ರಿಸ್ಟಿನಾ ಕ್ಯುಸ್ಟಾ-ಮಾರ್ಟಿ ತಿಳಿಸಿದ್ದಾರೆ.

ಪೋಷಕರು ಇಂದಿನಿಂದಲೇ ಮಕ್ಕಳ ಆಹಾರ ಕ್ರಮದಲ್ಲಿ ನೈಸರ್ಗಿಕ ಪ್ರೀಬಯೋಟಿಕ್ ಆಹಾರಗಳನ್ನು ಸೇರಿಸುವ ಮೂಲಕ ಅವರ ಮೆದುಳಿನ ಭವಿಷ್ಯದ ಆರೋಗ್ಯವನ್ನು ಕಾಪಾಡಬಹುದಾಗಿದೆ.