ಬೆಂಗಳೂರು: ನಮ್ಮ ಮನೆಗಳಲ್ಲಿ ಅನಾದಿ ಕಾಲದಿಂದಲೂ ಜೀರ್ಣಕ್ರಿಯೆ ಹೆಚ್ಚಿಸಲು ಜೀರಿಗೆ, ಓಂಕಾಳು (ಅಜ್ವೈನ್) ಹಾಗೂ ಸೋಂಫು (ಬೆಂಗಳೂರು ಸೋಂಫು) ಬಳಸುವ ಸಾಂಪ್ರದಾಯಿಕ ಪದ್ಧತಿ ಇದೆ. ಇತ್ತೀಚಿನ ದಿನಗಳಲ್ಲಿ ಈ ಮೂರೂ ಪದಾರ್ಥಗಳನ್ನು ನೀರಿಗೆ ಹಾಕಿ ಕುದಿಸಿ ತಯಾರಿಸುವ ಹೆಲ್ತ್ ಡ್ರಿಂಕ್ ಜೀರ್ಣಾಂಗ ವ್ಯೂಹವನ್ನು ಸುಸ್ಥಿತಿಯಲ್ಲಿಡಲು ಸಕತ್ ಫೇಮಸ್ ಆಗಿದೆ.ಆದರೆ, ನೈಸರ್ಗಿಕ ಮನೆಮದ್ದೇ ಆದರೂ ಇದನ್ನು ಯಾವಾಗ, ಎಷ್ಟು ಹಾಗೂ ಹೇಗೆ ಸೇವಿಸಬೇಕು ಎನ್ನುವುದನ್ನು ತಿಳಿಯುವುದು ಅತ್ಯಗತ್ಯ.
ಖಾಲಿ ಹೊಟ್ಟೆಯಲ್ಲಿ ಸೇವನೆಯಿಂದ ಪ್ರಯೋಜನ
ಬೆಳಗಿನ ಜಾವ ಹೊಟ್ಟೆ ಖಾಲಿ ಇದ್ದಾಗ ಈ ಕಷಾಯ ಅಥವಾ ನೀರನ್ನು ಸೇವಿಸುವುದರಿಂದ ಕರುಳಿನ ಸಕ್ರಿಯತೆ ಹೆಚ್ಚುತ್ತದೆ. ಜೀರಿಗೆ, ಓಂಕಾಳು ಮತ್ತು ಸೋಂಫಿನಲ್ಲಿರುವ ಜೈವಿಕ ಸಕ್ರಿಯ ಸಂಯುಕ್ತಗಳು ದೇಹಕ್ಕೆ ಬೇಗನೆ ಹೀರಿಕೊಳ್ಳಲ್ಪಡುತ್ತವೆ.
ಅಜೀರ್ಣ, ಗ್ಯಾಸ್ಟ್ರಿಕ್ ಸಮಸ್ಯೆಗೆ ಪರಿಹಾರ
ಹೊಟ್ಟೆ ಉಬ್ಬರ, ಗ್ಯಾಸ್ಟ್ರಿಕ್ ಹಾಗೂ ಆಮ್ಲೀಯತೆ ತೊಂದರೆಯಿಂದ ಬಳಲುತ್ತಿರುವವರಿಗೆ ಈ ನೀರು ಉತ್ತಮ ನೈಸರ್ಗಿಕ ಶಮನಕಾರಿ.
ಓಂಕಾಳಿನ ಶಕ್ತಿ: ಓಂಕಾಳಿನಲ್ಲಿರುವ ಥೈಮೋಲ್ ಮತ್ತು ಕಾರ್ವಾಕ್ರೋಲ್ ಸಂಯುಕ್ತಗಳು ಜೀರ್ಣಕಾರಿ ಕಿಣ್ವಗಳನ್ನು ಸಕ್ರಿಯಗೊಳಿಸುತ್ತವೆ. ಅಲ್ಲದೆ, ದೇಹದಲ್ಲಿ ಅನಗತ್ಯ ಬ್ಯಾಕ್ಟೀರಿಯಾಗಳು ಬೆಳೆಯದಂತೆ ತಡೆಯುತ್ತವೆ.
ಚಯಾಪಚಯ ವೃದ್ಧಿ ಹಾಗೂ ತೂಕ ನಷ್ಟ
ಈ ನೈಸರ್ಗಿಕ ಪಾನೀಯವು ದೇಹದ ಚಯಾಪಚಯ ಕ್ರಿಯೆಯನ್ನು ವೇಗಗೊಳಿಸುತ್ತದೆ.
ನಾರಿನಂಶ (Fiber) ಹಾಗೂ ಆಂಟಿಆಕ್ಸಿಡೆಂಟ್ಗಳಿಂದ ಕೂಡಿರುವ ಈ ಮಿಶ್ರಣವು ದಿನವಿಡೀ ಪದೇ ಪದೇ ಹಸಿವಾಗುವುದನ್ನು ನಿಯಂತ್ರಿಸುತ್ತದೆ.
ಜೀರಿಗೆಯಲ್ಲಿ ಉರಿಯೂತ ನಿರೋಧಕ (Anti-inflammatory) ಗುಣಗಳಿದ್ದು, ದೇಹದಲ್ಲಿ ಅನಗತ್ಯ ಕ್ಯಾಲೊರಿ ಹಾಗೂ ಕೊಬ್ಬು ಕರಗಿಸಲು ಸಹಕರಿಸುತ್ತದೆ.
ರಕ್ತದಲ್ಲಿನ ಸಕ್ಕರೆ ಪ್ರಮಾಣ ನಿಯಂತ್ರಣ
ಕೆಲವು ಸಂಶೋಧನೆಗಳ ಪ್ರಕಾರ, ಜೀರಿಗೆ ನೀರು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ಆದರೆ, ಮಧುಮೇಹ ಹೊಂದಿರುವವರು ಇದನ್ನು ಕೇವಲ ಪೂರಕವಾಗಿ ಬಳಸಬೇಕೇ ವಿನಃ ವೈದ್ಯರು ನೀಡಿದ ಸಕ್ಕರೆ ಕಾಯಿಲೆ ಔಷಧಿಗಳನ್ನು ಸಂಪೂರ್ಣವಾಗಿ ನಿಲ್ಲಿಸಬಾರದು.
ಯಾರು ಎಚ್ಚರಿಕೆ ವಹಿಸಬೇಕು?
ನೈಸರ್ಗಿಕ ಮನೆಮದ್ದು ಎಲ್ಲರಿಗೂ ಒಂದೇ ರೀತಿ ಒಗ್ಗುವುದಿಲ್ಲ. ಕೆಳಗಿನ ಸಮಸ್ಯೆಯಿರುವವರು ಈ ನೀರನ್ನು ಸೇವಿಸುವ ಮುನ್ನ ತುಸು ಜಾಗರೂಕರಾಗಿರಬೇಕು:
ಗರ್ಭಿಣಿಯರು: ಗರ್ಭಾವಸ್ಥೆಯಲ್ಲಿ ಯಾವುದೇ ಕಷಾಯಗಳನ್ನು ಅತಿಯಾಗಿ ಸೇವಿಸುವ ಮುನ್ನ ವೈದ್ಯರ ಸಲಹೆ ಕಡ್ಡಾಯ.
ತೀವ್ರ ಆಸಿಡಿಟಿ / ಆಸಿಡ್ ರಿಫ್ಲಕ್ಸ್ ಇದ್ದವರು: ಓಂಕಾಳು ಮತ್ತು ಜೀರಿಗೆಯ ಪ್ರಭಾವ ಕೆಲವು ದೇಹಪ್ರಕೃತಿಗೆ ಉರಿ ಉಂಟುಮಾಡಬಹುದು.
ಮಸಾಲ ಪದಾರ್ಥಗಳ ಅಲರ್ಜಿ ಇದ್ದವರು: ಮಸಾಲೆ ಪದಾರ್ಥಗಳು ಒಗ್ಗದಿದ್ದಲ್ಲಿ ಹೊಟ್ಟೆಯಲ್ಲಿ ಉರಿ ಕಂಡುಬರಬಹುದು.
ನಿರಂತರ ಔಷಧಿಯಲ್ಲಿದ್ದವರು: ಸಕ್ಕರೆ ಕಾಯಿಲೆ ಅಥವಾ ರಕ್ತದೊತ್ತಡಕ್ಕೆ ಪ್ರಬಲ ಮಾತ್ರೆಗಳನ್ನು ತೆಗೆದುಕೊಳ್ಳುವವರು ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
