ದೇಹದ ತೂಕ ಇಳಿಸಿಕೊಳ್ಳಲು ಜಿಮ್ನಲ್ಲಿ ಗಂಟೆಗಟ್ಟಲೆ ಬೆವರು ಹರಿಸುವುದು, ಕಠಿಣ ಡಯಟ್ ಮಾಡುವುದು ಸಹಜ. ಆದರೆ, ಕೇವಲ ನಾಲ್ಕೇ ನಾಲ್ಕು ನಿಮಿಷಗಳ ಸುಲಭ ಕಸರತ್ತಿನಿಂದ ಒಂದೇ ವಾರದಲ್ಲಿ ಬರೋಬ್ಬರಿ 5 ಕೆಜಿ ತೂಕ ಇಳಿಸಬಹುದು ಎಂಬ ವಿಡಿಯೋವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಜಪಾನ್ ಮೂಲದ ಈ ವಿಡಿಯೋ ಸದ್ಯ ನೆಟ್ಟಿಗರಲ್ಲಿ ಬಿಸಿಬಿಸಿ ಚರ್ಚೆಗೆ ಗ್ರಾಸವಾಗಿದೆ.
ಏನಿದು 4 ನಿಮಿಷದ ಮ್ಯಾಜಿಕ್ ವರ್ಕೌಟ್? ಸಾಮಾಜಿಕ ಮಾಧ್ಯಮವಾದ ‘ಎಕ್ಸ್’ (ಟ್ವಿಟರ್)ನಲ್ಲಿ ಹಂಚಿಕೊಳ್ಳಲಾಗಿರುವ ಈ ವಿಡಿಯೋದಲ್ಲಿ ಯಾವುದೇ ಜಿಮ್ ಉಪಕರಣಗಳು ಅಥವಾ ಡಂಬಲ್ಸ್ಗಳ ಸಹಾಯವಿಲ್ಲದೆ ಮನೆಯಲ್ಲೇ ಮಾಡಬಹುದಾದ ಕೆಲವೇ ಕೆಲವು ಸರಳ ವ್ಯಾಯಾಮಗಳನ್ನು ತೋರಿಸಲಾಗಿದೆ. ಬಿಡುವಿಲ್ಲದ ದಿನಚರಿ ಹೊಂದಿರುವವರು ದಿನಕ್ಕೆ ಕೇವಲ 4 ನಿಮಿಷಗಳ ಕಾಲ ಈ ದಿನಚರಿಯನ್ನು ಸತತ 7 ದಿನ ಪಾಲಿಸಿದರೆ 5 ಕೆಜಿವರೆಗೂ ತೂಕ ಇಳಿಸಿಕೊಳ್ಳಬಹುದು ಎಂದು ವಿಡಿಯೋದಲ್ಲಿ ಹೇಳಿಕೊಳ್ಳಲಾಗಿದೆ. ಈ ಪೋಸ್ಟ್ಗೆ ಈಗಾಗಲೇ 70 ಲಕ್ಷಕ್ಕೂ (7 ಮಿಲಿಯನ್) ಅಧಿಕ ವೀಕ್ಷಣೆಗಳು ಹಾಗೂ 83,000ಕ್ಕೂ ಹೆಚ್ಚು ಲೈಕ್ಗಳು ಹರಿದುಬಂದಿವೆ.
ನೆಟ್ಟಿಗರಲ್ಲಿ ಶುರುವಾಯ್ತು ಪರ-ವಿರೋಧ ಚರ್ಚೆ: ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಎರಡು ಬಣಗಳಾಗಿ ವಿಭಜನೆಗೊಂಡಿದ್ದಾರೆ. ಒಂದು ಬಣವು ಇದನ್ನು ಬೆಂಬಲಿಸಿದ್ದು, “ಏನೂ ವ್ಯಾಯಾಮ ಮಾಡದೆ ದಿನವಿಡೀ ಕೂರುವುದಕ್ಕಿಂತ ಕನಿಷ್ಠ 4 ನಿಮಿಷವಾದರೂ ದೇಹವನ್ನು ದಂಡಿಸುವುದು ಒಳ್ಳೆಯದು. ಆರಂಭಿಸಲು ಇದು ಅತ್ಯುತ್ತಮ ಹಾಗೂ ಸುಲಭ ವಿಧಾನ” ಎಂದು ಕಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, “ಇತ್ತೀಚಿನ ಪಾಪ್ ಹಾಡುಗಳಿಗಿಂತ ಇದು ಉದ್ದವಿದೆ, ಏನೇ ಇರಲಿ ಆರಂಭಿಸುವುದೇ ಮುಖ್ಯ, ಫಲಿತಾಂಶ ನೋಡೋಣ” ಎಂದು ಸಕಾರಾತ್ಮಕವಾಗಿ ಪ್ರತಿಕ್ರಿಯಿಸಿದ್ದಾರೆ.
ಆದರೆ, ಇನ್ನೊಂದು ಬಣವು ಈ ಅವಾಸ್ತವಿಕ ವಾದವನ್ನು ತಳ್ಳಿಹಾಕಿದೆ. “ಕೇವಲ ನಾಲ್ಕು ನಿಮಿಷಗಳ ವ್ಯಾಯಾಮದಿಂದ ವಾರಕ್ಕೆ 5 ಕೆಜಿ ಇಳಿಸಲು ಸಾಧ್ಯವೇ ಇಲ್ಲ. ತೂಕ ಇಳಿಕೆಯಲ್ಲಿ ಆಹಾರ ಪದ್ಧತಿ (ಡಯಟ್) ಮುಖ್ಯ ಪಾತ್ರ ವಹಿಸುತ್ತದೆ. ಇದು ಕೇವಲ ಪ್ರಚಾರದ ಗಿಮಿಕ್ ಅಷ್ಟೇ,” ಎಂದು ಹಲವರು ಕಿಡಿಕಾರಿದ್ದಾರೆ. “ಜನರು ಕಠಿಣ ವ್ಯಾಯಾಮ ಮಾಡುವುದನ್ನು ಬಿಟ್ಟು ಇಂತಹ ಶಾರ್ಟ್ಕಟ್ಗಳ ಬೆನ್ನತ್ತುತ್ತಾರೆ” ಎಂದು ಮತ್ತೊಬ್ಬ ಬಳಕೆದಾರರು ವ್ಯಂಗ್ಯವಾಡಿದ್ದಾರೆ.
ವೈದ್ಯಕೀಯ ಹಾಗೂ ತಜ್ಞರ ಅಭಿಪ್ರಾಯವೇನು? ಆರೋಗ್ಯ ತಜ್ಞರ ಪ್ರಕಾರ, ಕೇವಲ 4 ನಿಮಿಷಗಳ ವ್ಯಾಯಾಮದಿಂದ ಒಂದೇ ವಾರದಲ್ಲಿ 5 ಕೆಜಿ ತೂಕ ಇಳಿಯುತ್ತದೆ ಎಂಬುದು ವೈಜ್ಞಾನಿಕವಾಗಿ ಸಾಬೀತಾಗಿಲ್ಲ. ತೂಕ ಇಳಿಕೆ ಎಂಬುದು ಪ್ರತಿಯೊಬ್ಬ ವ್ಯಕ್ತಿಯ ದೇಹ ಪ್ರಕೃತಿ, ಸೇವಿಸುವ ಆಹಾರ, ನಿದ್ರೆ, ದೈಹಿಕ ಚಟುವಟಿಕೆಗಳು ಹಾಗೂ ಒಟ್ಟಾರೆ ಆರೋಗ್ಯ ಸ್ಥಿತಿಯ ಮೇಲೆ ಅವಲಂಬಿತವಾಗಿರುತ್ತದೆ. ಅತಿಯಾದ ನಿರೀಕ್ಷೆಗಳನ್ನು ಇಟ್ಟುಕೊಂಡು ಇಂತಹ ಸರಳ ವ್ಯಾಯಾಮಗಳನ್ನು ಮಾಡುವ ಬದಲು, ನಿಯಮಿತ ವ್ಯಾಯಾಮ ಮತ್ತು ಸಮತೋಲಿತ ಆಹಾರ ಶೈಲಿಯನ್ನು ರೂಢಿಸಿಕೊಳ್ಳುವುದೇ ಆರೋಗ್ಯಕ್ಕೆ ಉತ್ತಮ ಎಂದು ತಜ್ಞರು ಕಿವಿಮಾತು ಹೇಳಿದ್ದಾರೆ.
