2025ರ ಅಂತ್ಯದಲ್ಲಿ ಇಂಡಿಗೋ ವಿಮಾನಯಾನ ಸಂಸ್ಥೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿ ಮಾಡಿತ್ತು. ಈಗ ಚಳಿಗಾಲದ ವೇಳಾಪಟ್ಟಿಯಲ್ಲಿ ಇಂಡಿಗೋ ಶೇ 10ರಷ್ಟು ಕಡಿತವನ್ನು ಘೋಷಣೆ ಮಾಡಿದೆ. ಇದರಿಂದಾಗಿ ವಿವಿಧ ವಿಮಾನ ನಿಲ್ದಾಣದಲ್ಲಿ ಸ್ಲಾಟ್ಗಳು ಖಾಲಿಯಾಗಿವೆ.
ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯ ಜನವರಿ 22ರಂದು ಆದೇಶವೊಂದನ್ನು ಹೊರಡಿಸಿದೆ. ಇಂಡಿಗೋ ಚಳಿಗಾಲದ ವೇಳಾಪಟ್ಟಿಯ ಶೇಕಡಾ 10ರಷ್ಟು ಕಡಿತ ಘೋಷಣೆ ಬಳಿಕ ಖಾಲಿಯಾದ ವಿಮಾನ ನಿಲ್ದಾಣದ ಸ್ಲಾಟ್ ಮರುಹಂಚಿಕೆ ಮಾಡಲು ಸ್ಲಾಟ್-ಸಮನ್ವಯ ಸಮಿತಿಯನ್ನು ರಚಿಸಿದೆ.
ಜಂಟಿ ಕಾರ್ಯದರ್ಶಿ (ವಿಮಾನ ನಿಲ್ದಾಣಗಳು) ರುಬಿನಾ ಅಲಿ ಅಧ್ಯಕ್ಷತೆಯ ಸಮಿತಿಯು ತನ್ನ ಮೊದಲ ಸಭೆಯಲ್ಲಿ ಸ್ಲಾಟ್ ಬಯಸುವ ವಿಮಾನಯಾನ ಸಂಸ್ಥೆಗಳಿಗೆ ಮಾನದಂಡಗಳನ್ನು ನಿಗದಿಪಡಿಸಿದೆ. ಹೆಚ್ಚುವರಿ ವಿಮಾನ, ಪೈಲಟ್ಗಳು, ಕ್ಯಾಬಿನ್ ಸಿಬ್ಬಂದಿ ನಿಯೋಜಿಸಲು ಸಾಧ್ಯವಾಗುವವರಿಗೆ ಮಾತ್ರ ಆದ್ಯತೆ ನೀಡಲಾಗುವುದು ಎಂದು ಸ್ಪಷ್ಟಪಡಿಸಿದೆ.
ಸದ್ಯ ಸಂಚಾರ ನಡೆಸುತ್ತಿರುವ ವಿಮಾನಗಳನ್ನು ಬದಲಾಯಿಸುವುದು ಸಾಕಾಗುವುದಿಲ್ಲ. ವಿಮಾನಯಾನ ಸಂಸ್ಥೆಗಳು ಸಿಬ್ಬಂದಿ ರೋಸ್ಟರ್ಗೆ ಪುರಾವೆಗಳನ್ನು ಒದಗಿಸಬೇಕು ಮತ್ತು ನಿರ್ವಹಣಾ ಸಂಪನ್ಮೂಲಗಳನ್ನು ಮರುಹೊಂದಿಸಬೇಕು ಅಥವಾ ಹೊಸದಾಗಿ ನಿಗದಿಪಡಿಸಿದ ಯಾವುದೇ ಸ್ಥಳಗಳನ್ನು ಕಳೆದುಕೊಳ್ಳಲು ಸಿದ್ಧವಿರಬೇಕಿದೆ.
ಹೊಸ ವಿಮಾನ ಕರ್ತವ್ಯ ಮಿತಿ ನಿಯಮಗಳು ಜಾರಿಯಾದಾಗ ಇಂಡಿಗೋ ಸಂಕಷ್ಟಕ್ಕೆ ಸಿಲುಕಿತು. ಹಲವು ವಿಮಾನಗಳು ರದ್ದುಗೊಂಡವು. ಪ್ರಯಾಣ ವಿಳಂಬವಾಯಿತು. 2026ರ ಬೇಸಿಗೆಗೆ ಮುಂಚಿತವಾಗಿ ಅಂತರರಾಷ್ಟ್ರೀಯ ಸಂಪರ್ಕಗಳನ್ನು ಗಮನದಲ್ಲಿಟ್ಟುಕೊಂಡು ಇಂತಹ ಘಟನೆಯ ಪುನರಾವರ್ತನೆಯನ್ನು ತಪ್ಪಿಸಲು ಸಮಿತಿ ಮುಂದಾಗಿದೆ.
ಯಾವ-ಯಾವ ಸಂಸ್ಥೆಗಳು?; ಏರ್ ಇಂಡಿಯಾ, ವಿಸ್ತಾರಾ ಮತ್ತು ಅಕಾರ್ಶ್ ಏರ್ಗಳಂತಹ ಇಂಡಿಗೋ ಪ್ರತಿಸ್ಪರ್ಧಿಗಳಿಗೆ ಸ್ಲಾಟ್ಗಳನ್ನು ಮರುಹೊಂದಿಸುವ ಮೂಲಕ, ಅಧಿಕಾರಿಗಳು ಈ ವರ್ಷದ ಮಾರ್ಚ್ನಲ್ಲಿ ಬೆಂಗಳೂರಿನಲ್ಲಿ ನಡೆಯುವ ಜಿ-20 ವಾಣಿಜ್ಯ ಸಚಿವರ ಶೃಂಗಸಭೆಗೆ ಮುಂಚಿತವಾಗಿ ಎಲ್ಲಾ ವ್ಯವಸ್ಥೆಯನ್ನು ಪುನರ್ ಸ್ಥಾಪಿಸುವ ಗುರಿ ಹೊಂದಿದ್ದಾರೆ.
ವಿಮಾನಯಾನ ಸಂಸ್ಥೆಗಳು ತಮ್ಮ ವೇಳಾಪಟ್ಟಿಯನ್ನು ತ್ವರಿತವಾಗಿ ಮರುಹೊಂದಿಸುವಾಗ, ಪ್ರಯಾಣಿಕರ ಹಿತವನ್ನ ಕಾಪಾಡಬೇಕು. ಕಾಗದ ಪತ್ರಗಳ ಪರಿಶೀಲನೆ, ನೈಜ-ಸಮಯದ ಟ್ರ್ಯಾಕಿಂಗ್ ವ್ಯವಸ್ಥೆಯನ್ನು ಮಾಡಬೇಕಿದೆ. ಕೊನೆಯ ನಿಮಿಷದ ಪ್ರಯಾಣದ ಶಿಫ್ಟ್ಗಳ ಬದಲಾವಣೆ ಪ್ರಯಾಣಿಕರ ಮೇಲೆ ಪರಿಣಾಮ ಬೀರಬಾರದು ಎಂದು ನಿರ್ದೇಶನ ನೀಡಲಾಗಿದೆ.
ದೇಶಿಯ ಪ್ರಯಾಣಿಕರ ಹಿತವನ್ನು ಕಾಪಾಡಬೇಕು. ಸುಗಮವಾದ ಪ್ರಯಾಣದ ನೀತಿಗಳನ್ನು ರೂಪಿಸಬೇಕು. ದೆಹಲಿ-ಜೈಪುರ ಅಥವಾ ಮುಂಬೈ-ಪುಣೆಯಂತಹ ಮೆಟ್ರೋ ವಲಯಗಳಲ್ಲಿ ಸಂಚಾರ ನಡೆಸುವ ಪ್ರಯಾಣಿಕರ ಹಿತ ಕಾಯಬೇಕು. ದೀರ್ಘಾವಧಿಯಲ್ಲಿ ವಿಮಾನ ಕಾರ್ಯಾಚರಣೆಯಲ್ಲಿ ಯಾವುದೇ ತೊಂದರೆಯಾಗದಂತೆ ವಿಶ್ವಾಸಾರ್ಹತೆಯನ್ನು ನೀಡಬೇಕಿದೆ.
ವಿಮಾನಯಾನ ಸಂಸ್ಥೆಗಳು ನಿಗಮಗಳು ಪ್ರಕಟಿಸಿದ ಸ್ಲಾಟ್ ಪಟ್ಟಿಗಳನ್ನು ಟ್ರ್ಯಾಕ್ ಮಾಡಬೇಕು. ಯಾವುದೇ ಸಂದರ್ಭದಲ್ಲಿ ಹೆಚ್ಚುವರಿ ವಿಮಾನ, ಪೈಲೆಟ್, ಕ್ಯಾಬಿನ್ ಸಿಬ್ಬಂದಿ ಒದಗಿಸಬೇಕಿದೆ ಎಂದು ಖಡಕ್ ಸೂಚನೆ ನೀಡಲಾಗಿದೆ.
ಪ್ರಯಾಣಿಕ ಸ್ನೇಹಿಯಾಗಿ ಹೊಸ ಸ್ಲಾಟ್ಗಳನ್ನು ಹಂಚಿಕೆ ಮಾಡಲು ತೀರ್ಮಾನಿಸಲಾಗಿದ್ದು, ವಿವಿಧ ಏರ್ಪೋರ್ಟ್ಗಳಲ್ಲಿನ ಇಂಡಿಗೋ ವಿಮಾನಯಾನ ಸಂಸ್ಥೆಯ ಸ್ಲಾಟ್ಗಳು ಯಾರ ಪಾಲಾಗಲಿವೆ? ಎಂದು ಕಾದು ನೋಡಬೇಕಿದೆ.
