ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಫೆಬ್ರವರಿ 3 ಒಂದು ಮರೆಯಲಾಗದ ದಿನ. ಸರಿಯಾಗಿ ಎಂಟು ವರ್ಷಗಳ ಹಿಂದೆ, ಅಂದರೆ 2018ರ ಫೆಬ್ರವರಿ 3ರಂದು ನ್ಯೂಜಿಲೆಂಡ್ನಲ್ಲಿ ನಡೆದ ಐಸಿಸಿ ಅಂಡರ್-19 ವಿಶ್ವಕಪ್ ಫೈನಲ್ನಲ್ಲಿ ಆಸ್ಟ್ರೇಲಿಯಾವನ್ನು ಮಣಿಸಿದ ಟೀಮ್ ಇಂಡಿಯಾ, ನಾಲ್ಕನೇ ಬಾರಿಗೆ ವಿಶ್ವ ಚಾಂಪಿಯನ್ ಪಟ್ಟಕ್ಕೇರಿತ್ತು. ಅಂದು ರಾಹುಲ್ ದ್ರಾವಿಡ್ ಮಾರ್ಗದರ್ಶನದಲ್ಲಿ ಪೃಥ್ವಿ ಶಾ ನೇತೃತ್ವದ ಯುವ ಪಡೆ ಇಡೀ ವಿಶ್ವದ ಗಮನ ಸೆಳೆದಿತ್ತು.
ಅಂದು ನಡೆದ ಫೈನಲ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಆಸ್ಟ್ರೇಲಿಯಾವನ್ನು ಭಾರತದ ಬೌಲರ್ಗಳಾದ ಇಶಾನ್ ಪೊರೆಲ್, ಶಿವ ಸಿಂಗ್, ಕಮಲೇಶ್ ನಾಗರಕೋಟಿ ಮತ್ತು ಅನುಕುಲ್ ರಾಯ್ ತಲಾ ಎರಡು ವಿಕೆಟ್ ಪಡೆಯುವ ಮೂಲಕ ಕೇವಲ 216 ರನ್ಗಳಿಗೆ ಕಟ್ಟಿಹಾಕಿದ್ದರು. ಬಳಿಕ ಗುರಿ ಬೆನ್ನಟ್ಟಿದ ಭಾರತಕ್ಕೆ ಆರಂಭಿಕ ಆಟಗಾರ ಮನ್ಜೋತ್ ಕಾಲ್ರಾ ಅಜೇಯ ಶತಕ (101 ರನ್) ಬಾರಿಸಿ 8 ವಿಕೆಟ್ಗಳ ಭರ್ಜರಿ ಜಯ ತಂದುಕೊಟ್ಟಿದ್ದರು.
ಅಂದಿನ ಚಾಂಪಿಯನ್ ಆಟಗಾರರು ಈಗ ಎಲ್ಲಿದ್ದಾರೆ?
ಈ ವಿಶ್ವಕಪ್ ಗೆಲುವು ಭಾರತೀಯ ಕ್ರಿಕೆಟ್ಗೆ ಹಲವಾರು ತಾರೆಗಳನ್ನು ನೀಡಿತು. ಅಂದು ಫೈನಲ್ ಆಡಿದ್ದ ಹನ್ನೊಂದು ಮಂದಿಯಲ್ಲಿ ಐವರು ಈಗಾಗಲೇ ಹಿರಿಯರ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದಾರೆ.
ಶುಬ್ಮನ್ ಗಿಲ್: ಈ ತಂಡದ ಅತಿ ದೊಡ್ಡ ಯಶಸ್ಸಿನ ಕಥೆ ಎಂದರೆ ಅದು ಶುಬ್ಮನ್ ಗಿಲ್. ಪ್ರಸ್ತುತ ಭಾರತೀಯ ಟೆಸ್ಟ್ ಮತ್ತು ಏಕದಿನ ತಂಡದ ನಾಯಕನಾಗಿ ಬೆಳೆದಿರುವ ಗಿಲ್, ಅಂತರಾಷ್ಟ್ರೀಯ ಕ್ರಿಕೆಟ್ನಲ್ಲಿ 6,000ಕ್ಕೂ ಹೆಚ್ಚು ರನ್ ಗಳಿಸಿ ವಿಶ್ವದ ಶ್ರೇಷ್ಠ ಬ್ಯಾಟರ್ಗಳಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ.
ಪೃಥ್ವಿ ಶಾ: ವಿಶ್ವಕಪ್ ಗೆದ್ದ ನಾಯಕ ಪೃಥ್ವಿ ಶಾ ಟೆಸ್ಟ್ ಮತ್ತು ಏಕದಿನ ಪಂದ್ಯಗಳಲ್ಲಿ ಮಿಂಚಿದರೂ, ಪ್ರಸ್ತುತ ತಂಡದಿಂದ ಹೊರಗುಳಿದಿದ್ದಾರೆ ಮತ್ತು ರಾಷ್ಟ್ರೀಯ ತಂಡಕ್ಕೆ ಮರಳಲು ಕಠಿಣ ಪ್ರಯತ್ನ ನಡೆಸುತ್ತಿದ್ದಾರೆ.
ಅಭಿಷೇಕ್ ಶರ್ಮಾ: ಅಂದು ಆಲ್ರೌಂಡರ್ ಆಗಿದ್ದ ಅಭಿಷೇಕ್ ಇಂದು ಟಿ20 ಕ್ರಿಕೆಟ್ನ ಅತ್ಯಂತ ಅಪಾಯಕಾರಿ ಬ್ಯಾಟರ್. ಐಪಿಎಲ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಮತ್ತು ಭಾರತ ತಂಡದ ಪರ ಸ್ಪೋಟಕ ಬ್ಯಾಟಿಂಗ್ ಮೂಲಕ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ.
ಅರ್ಷದೀಪ್ ಸಿಂಗ್: ಅಂದು ಫೈನಲ್ ಆಡದಿದ್ದರೂ, ಇಂದು ಭಾರತದ ವೈಟ್-ಬಾಲ್ ಕ್ರಿಕೆಟ್ನ ಅನಿವಾರ್ಯ ಬೌಲರ್ ಆಗಿ ಅರ್ಷದೀಪ್ ಬೆಳೆದಿದ್ದಾರೆ.
ರಿಯಾನ್ ಪರಾಗ್ ಮತ್ತು ಶಿವಂ ಮಾವಿ: ರಿಯಾನ್ ಪರಾಗ್ ಐಪಿಎಲ್ ಮೂಲಕ ಭಾರತ ತಂಡಕ್ಕೆ ಪದಾರ್ಪಣೆ ಮಾಡಿದ್ದರೆ, ವೇಗಿ ಶಿವಂ ಮಾವಿ ಕೂಡ ಟಿ20 ಸರಣಿಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದಾರೆ.
ಇನ್ನುಳಿದಂತೆ ಮನ್ಜೋತ್ ಕಾಲ್ರಾ, ಕಮಲೇಶ್ ನಾಗರಕೋಟಿ, ಇಶಾನ್ ಪೊರೆಲ್ ಮತ್ತು ಹರ್ವಿಕ್ ದೇಸಾಯಿ ದೇಶೀಯ ಕ್ರಿಕೆಟ್ ಮತ್ತು ಐಪಿಎಲ್ನಲ್ಲಿ ಸಕ್ರಿಯವಾಗಿದ್ದಾರೆ. ಒಟ್ಟಿನಲ್ಲಿ ದ್ರಾವಿಡ್ ಗರಡಿಯಲ್ಲಿ ಪಳಗಿದ ಈ ಯುವ ತಾರೆಗಳು ಇಂದು ಭಾರತೀಯ ಕ್ರಿಕೆಟ್ನ ಆಸ್ತಿಯಾಗಿದ್ದಾರೆ.
