ಕ್ಯಾನ್ಸರ್‌ನಿಂದ ತಂದೆ ಸಾವು, ಕಷ್ಟಗಳ ನಡುವೆ ಅರಳಿದ ಪ್ರತಿಭೆ: ಐಐಟಿ ಪ್ರವೇಶ ಪರೀಕ್ಷೆಯಲ್ಲಿ ಒಡಿಶಾ ಬಡ ಯುವಕನ ಐತಿಹಾಸಿಕ ಸಾಧನೆ

ದೇವರು ಎಲ್ಲೆಡೆ ಇರಲು ಸಾಧ್ಯವಿಲ್ಲದ ಕಾರಣ ತಾಯಿಯನ್ನು ಸೃಷ್ಟಿಸಿದ ಎನ್ನಲಾಗುತ್ತದೆ. ಈ ಮಾತಿಗೆ ನಿಜವಾದ ಅರ್ಥ ನೀಡುವಂತಹ ಘಟನೆಯೊಂದು ಒಡಿಶಾದಲ್ಲಿ ನಡೆದಿದೆ. ತಂದೆಯನ್ನು ಕಳೆದುಕೊಂಡು ಆರ್ಥಿಕ ಸಂಕಷ್ಟದಲ್ಲಿದ್ದರೂ, ತಾಯಿಯ ನಿರಂತರ ಪರಿಶ್ರಮ ಮತ್ತು ಮಗನ ಕಠಿಣ ಶ್ರಮದಿಂದಾಗಿ ಒಡಿಶಾದ ಯುವಕ ಜಿಗರ್ ನಾಯಕ್ ಅತ್ಯಂತ ಕಠಿಣವಾದ ಐಐಟಿ-ಜೇಇಇ ಅಡ್ವಾನ್ಸ್ಡ್ ಪರೀಕ್ಷೆಯಲ್ಲಿ ಅತ್ಯುತ್ತಮ ಶ್ರೇಯಾಂಕದೊಂದಿಗೆ ತೇರ್ಗಡೆಯಾಗಿದ್ದಾರೆ. ಈ ಮೂಲಕ ತಮ್ಮ ಗ್ರಾಮದಿಂದ ಐಐಟಿಗೆ ಆಯ್ಕೆಯಾದ ಮೊದಲ ವಿದ್ಯಾರ್ಥಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಒಡಿಶಾದ ಗಂಜಾಂ ಜಿಲ್ಲೆಯ ಬಕಿಲಿಕೋನ ಗ್ರಾಮದ ಜಿಗರ್ ನಾಯಕ್ ಅವರ ಕುಟುಂಬ ಅತ್ಯಂತ ಬಡತನದಲ್ಲಿದೆ. 2020 ರವರೆಗೆ ಇವರ ತಂದೆ ಜುರಿನಾಥ್ ನಾಯಕ್ ಅವರು ಗುಜರಾತ್ ನ ಜವಳಿ ಕಾರ್ಖಾನೆಯೊಂದರಲ್ಲಿ ಕೆಲಸ ಮಾಡುತ್ತಾ ಇಡೀ ಕುಟುಂಬವನ್ನು ಮುನ್ನಡೆಸುತ್ತಿದ್ದರು. ಆದರೆ, ಇದ್ದಕ್ಕಿದ್ದಂತೆ ಅವರಿಗೆ ಕ್ಯಾನ್ಸರ್ ಇರುವುದು ಪತ್ತೆಯಾಯಿತು. ಚಿಕಿತ್ಸೆಗಾಗಿ ಕುಟುಂಬದ ಎಲ್ಲಾ ಉಳಿತಾಯದ ಹಣ ಖರ್ಚಾಯಿತು. ದುರದೃಷ್ಟವಶಾತ್ ಚಿಕಿತ್ಸೆ ಫಲಕಾರಿಯಾಗದೆ ತಂದೆ ಮೃತಪಟ್ಟರು. ಇದರಿಂದಾಗಿ ಕುಟುಂಬವು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿತು.

ತಂದೆಯ ಮರಣದ ನಂತರ ಜಿಗರ್ ಅವರ ವಿದ್ಯಾಭ್ಯಾಸ ಮುಂದುವರಿಸುವುದು ಅಸಾಧ್ಯವೆಂಬ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಆದರೆ ತಾಯಿ ಅಪೂರ್ವ ನಾಯಕ್ ಅವರು ಯಾವುದೇ ಕಾರಣಕ್ಕೂ ಮಗನ ಓದನ್ನು ನಿಲ್ಲಿಸಬಾರದು ಎಂದು ದೃಢ ನಿರ್ಧಾರ ಮಾಡಿದರು. ಇದಕ್ಕಾಗಿ ತಮ್ಮಲ್ಲಿದ್ದ ಅಲ್ಪಸ್ವಲ್ಪ ಚಿನ್ನಾಭರಣಗಳನ್ನು ಅಡವಿಟ್ಟು ಸಾಲ ಪಡೆದರು. ಜೊತೆಗೆ ದರ್ಜಿಯಾಗಿ (ಟೈಲರ್) ಕೆಲಸ ಮಾಡಲು ಪ್ರಾರಂಭಿಸಿದರು. ಬಟ್ಟೆ ಹೊಲಿಯುತ್ತಾ ಬಂದ ಆದಾಯದಲ್ಲಿ ಮನೆಯ ಖರ್ಚು ಹಾಗೂ ಮಗನ ಶಾಲಾ ಶುಲ್ಕವನ್ನು ಭರಿಸುತ್ತಾ ಕುಟುಂಬಕ್ಕೆ ಆಸರೆಯಾದರು.

ಜಿಗರ್ ನಾಯಕ್ ಅವರು 10ನೇ ತರಗತಿಯಲ್ಲಿದ್ದಾಗ ಸಾಮಾಜಿಕ ಜಾಲತಾಣಗಳ ಮೂಲಕ ಐಐಟಿ ಮತ್ತು ಜೇಇಇ ಪರೀಕ್ಷೆಗಳ ಬಗ್ಗೆ ತಿಳಿದುಕೊಂಡಿದ್ದರು. ತಮ್ಮದೇ ರೀತಿಯ ಹಿನ್ನೆಲೆಯುಳ್ಳ ಬಡ ವಿದ್ಯಾರ್ಥಿಗಳು ಈ ಪರೀಕ್ಷೆಯಲ್ಲಿ ಸಾಧನೆ ಮಾಡಿರುವುದನ್ನು ಕಂಡು ತಾವೂ ಸಹ ಐಐಟಿ ಸೇರಬೇಕೆಂಬ ಕನಸು ಕಂಡರು. ಅದಕ್ಕಾಗಿಯೇ ಕಷ್ಟಪಟ್ಟು ಓದಿ 10ನೇ ತರಗತಿಯಲ್ಲಿ ಶೇಕಡಾ 95 ಹಾಗೂ 12ನೇ ತರಗತಿಯಲ್ಲಿ ಶೇಕಡಾ 87 ರಷ್ಟು ಅಂಕಗಳನ್ನು ಗಳಿಸಿದರು.

ಬಳಿಕ ತಮ್ಮ ಕನಸನ್ನು ನನಸು ಮಾಡಿಕೊಳ್ಳಲು ರಾಜಸ್ಥಾನದ ಕೋಟಾ ನಗರದ ತರಬೇತಿ ಸಂಸ್ಥೆಯೊಂದಕ್ಕೆ ಸೇರಿದರು. ಕುಟುಂಬದ ಆರ್ಥಿಕ ಪರಿಸ್ಥಿತಿಯನ್ನು ಗಮನಿಸಿ ಸಂಸ್ಥೆಯು ಇವರಿಗೆ ಶುಲ್ಕದಲ್ಲಿ ವಿನಾಯಿತಿ ನೀಡಿತ್ತು. ಅಲ್ಲಿ ಎರಡು ವರ್ಷಗಳ ಕಾಲ ಶ್ರದ್ಧೆಯಿಂದ ತಯಾರಿ ನಡೆಸಿದ ಜಿಗರ್, ಜೇಇಇ ಅಡ್ವಾನ್ಸ್ಡ್ ಪರೀಕ್ಷೆಯಲ್ಲಿ 5474ನೇ ಆಲ್ ಇಂಡಿಯಾ ರ‍್ಯಾಂಕ್ (AIR) ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ತಮ್ಮ ಸಾಧನೆಯ ಕುರಿತು ಮಾತನಾಡಿರುವ ಜಿಗರ್, ನಾನು ಕೇವಲ ನನಗಾಗಿ ಮಾತ್ರವಲ್ಲದೆ ನನ್ನ ಇಡೀ ಕುಟುಂಬದ ಭವಿಷ್ಯಕ್ಕಾಗಿ ಶ್ರಮಿಸಿದ್ದೇನೆ. ಐಐಟಿ ಶಿಕ್ಷಣ ಮುಗಿಸಿದ ನಂತರ ನನ್ನ ತಾಯಿ ಮತ್ತೆ ಎಂದಿಗೂ ಕಷ್ಟಪಡದಂತೆ ನೋಡಿಕೊಳ್ಳಬೇಕು ಮತ್ತು 7ನೇ ತರಗತಿಯಲ್ಲಿ ಓದುತ್ತಿರುವ ನನ್ನ ತಮ್ಮನಿಗೆ ಯಾವುದೇ ತೊಂದರೆಯಿಲ್ಲದೆ ಉನ್ನತ ಶಿಕ್ಷಣ ಕೊಡಿಸಬೇಕು ಎಂಬುದೇ ನನ್ನ ಗುರಿಯಾಗಿದೆ ಎಂದು ಹೇಳಿದ್ದಾರೆ.