ಹೈದರಾಬಾದ್: ನಾಯಿಯ ಪ್ರೀತಿ ಪ್ರೀತಿಯ ಅತ್ಯಂತ ಶುದ್ಧ ರೂಪ ಎಂಬ ಮಾತಿಗೆ ಹೈದರಾಬಾದ್ನ ದಿವ್ಯಾ ಮತ್ತು ಜಾನ್ ದಂಪತಿ ಜೀವಂತ ಉದಾಹರಣೆಯಾಗಿ ನಿಂತಿದ್ದಾರೆ. ವೃತ್ತಿ ಬದುಕಿನ ಹಿನ್ನೆಲೆಯಲ್ಲಿ ಆಸ್ಟ್ರೇಲಿಯಾಕ್ಕೆ ವಲಸೆ ಹೋದ ಈ ದಂಪತಿ ತಮ್ಮ ಪ್ರೀತಿಯ ಸಾಕುನಾಯಿ ಸ್ಕೈ (Sky) ನನ್ನು ಬಿಟ್ಟಿರಲಾರದೆ ಬರೋಬ್ಬರಿ 15 ಲಕ್ಷ ರೂಪಾಯಿ ಖರ್ಚು ಮಾಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಹೈದರಾಬಾದ್ನ ದಂಪತಿಗಳು ತಮ್ಮ ಪ್ರೀತಿಯ ಸಾಕುನಾಯಿ ‘ಸ್ಕೈ’ (Sky) ನನ್ನು ಆಸ್ಟ್ರೇಲಿಯಾಕ್ಕೆ ಕರೆದೊಯ್ಯಲು ಸುಮಾರು 15 ಲಕ್ಷ ರೂಪಾಯಿ ಖರ್ಚು ಮಾಡಿದ ಹೃದಯಸ್ಪರ್ಶಿ ಕಥೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಮತ್ತು ಮೆಚ್ಚುಗೆಗೆ ಪಾತ್ರವಾಗಿದೆ.
ಏನಿದು ಘಟನೆ?
ದಿವ್ಯಾ ಮತ್ತು ಜಾನ್ ದಂಪತಿಗೆ ಹೈದರಾಬಾದ್ನಿಂದ ಆಸ್ಟ್ರೇಲಿಯಾಕ್ಕೆ ಸ್ಥಳಾಂತರಗೊಳ್ಳುವ ಅವಕಾಶ ಸಿಕ್ಕಾಗ, ಅವರಿಗೆ ಎದುರಾದ ದೊಡ್ಡ ಸವಾಲು ತಮ್ಮ ನೆಚ್ಚಿನ ನಾಯಿ ಸ್ಕೈ. ಆಸ್ಟ್ರೇಲಿಯಾದ ಕಟ್ಟುನಿಟ್ಟಾದ ನಿಯಮಗಳ ಪ್ರಕಾರ ಭಾರತದಿಂದ ನೇರವಾಗಿ ಸಾಕುಪ್ರಾಣಿಗಳನ್ನು ಕರೆದೊಯ್ಯಲು ಅವಕಾಶವಿಲ್ಲ. ಭಾರತವು ರೇಬಿಸ್ ಮುಕ್ತ ದೇಶವಲ್ಲದ ಕಾರಣ ಅಲ್ಲಿಗೆ ಹೋಗುವ ಮುನ್ನ ನಾಯಿಗಳು ಆರು ತಿಂಗಳ ಕಾಲ ಯಾವುದಾದರೊಂದು ರೇಬಿಸ್ ಮುಕ್ತ ದೇಶದಲ್ಲಿ ವಾಸಿಸುವುದು ಕಡ್ಡಾಯವಾಗಿತ್ತು.
ಸವಾಲಾದ ಹಣ ಮತ್ತು ಸಮಯ
ಈ ಸುದೀರ್ಘ ಪ್ರಕ್ರಿಯೆಗೆ ವಿಮಾನ ಪ್ರಯಾಣ ವೀಸಾ ವ್ಯಾಕ್ಸಿನೇಷನ್ ಮತ್ತು ಬೋರ್ಡಿಂಗ್ ಸೇರಿ ಸುಮಾರು 14 ರಿಂದ 16 ಲಕ್ಷ ರೂಪಾಯಿ ವೆಚ್ಚವಾಗುತ್ತಿತ್ತು. ಒಂದು ನಾಯಿಗಾಗಿ ಇಷ್ಟೊಂದು ಹಣ ಏಕೆ? ಅದರ ಬದಲು ಅಲ್ಲಿಗೆ ಹೋದ ಮೇಲೆ ಹೊಸ ನಾಯಿಯನ್ನೇ ದತ್ತು ಪಡೆಯಬಹುದಲ್ಲ? ಎಂದು ಅನೇಕರು ಸಲಹೆ ನೀಡಿದ್ದರು.ಆದರೆ ದಿವ್ಯಾ ಮತ್ತು ಜಾನ್ ದಂಪತಿಗೆ ಸ್ಕೈ ಕೇವಲ ಪ್ರಾಣಿಯಾಗಿರಲಿಲ್ಲ ಅವರ ಕುಟುಂಬದ ಅವಿಭಾಜ್ಯ ಸದಸ್ಯನಾಗಿದ್ದ.ಹಣವನ್ನು ಮತ್ತೆ ಗಳಿಸಬಹುದು ಆದರೆ ಅವನ ಮೇಲಿರುವ ಪ್ರೀತಿಯನ್ನಲ್ಲ ಎಂದು ದಂಪತಿಗಳು ಈ ಸವಾಲನ್ನು ಸ್ವೀಕರಿಸಿದರು
https://www.instagram.com/reel/DTXP3eCkZCl/?utm_source=ig_web_copy_link
6 ತಿಂಗಳ ಭಾವನಾತ್ಮಕ ಹೋರಾಟ
ತಮ್ಮ ಪಯಣದ ಮೊದಲ ಹಂತವಾಗಿ ದಿವ್ಯಾ ಮತ್ತು ಜಾನ್ ದಂಪತಿ ಸ್ಕೈ ಜೊತೆ ದುಬೈಗೆ ತೆರಳಿದರು. ಹೊಸ ಪರಿಸರಕ್ಕೆ ಅವನು ಹೊಂದಿಕೊಳ್ಳಲಿ ಎಂಬ ಉದ್ದೇಶದಿಂದ ಮೊದಲ ಒಂದು ತಿಂಗಳು ಅವನ ಜೊತೆಗೇ ಕಾಲ ಕಳೆದರು. ಆದರೆ ಆಸ್ಟ್ರೇಲಿಯಾದ ಕಠಿಣ ನಿಯಮಗಳ ಪ್ರಕಾರ ಸ್ಕೈ ಮುಂದಿನ ಆರು ತಿಂಗಳುಗಳ ಕಾಲ ದುಬೈನ ಪ್ರತ್ಯೇಕ ಬೋರ್ಡಿಂಗ್ ಕೇಂದ್ರದಲ್ಲೇ ಇರಬೇಕಾಯಿತು.
ಅನಿವಾರ್ಯವಾಗಿ ಅವನನ್ನು ಅಲ್ಲಿಯೇ ಬಿಟ್ಟು ಆಸ್ಟ್ರೇಲಿಯಾಕ್ಕೆ ಹೋದ ದಂಪತಿಗಳಿಗೆ ಅದು ಅತೀ ದೊಡ್ಡ ಕಷ್ಟದ ಸಮಯವಾಗಿತ್ತು. ಪ್ರತಿದಿನ ವಿಡಿಯೋ ಕಾಲ್ ಮೂಲಕ ಅವನ ಮುಖ ನೋಡುವುದು ಮತ್ತು ಕ್ಷೇಮ ವಿಚಾರಿಸುವುದೇ ಅವರಿಗೆ ಸಮಾಧಾನ ನೀಡುವ ಏಕೈಕ ದಾರಿಯಾಗಿತ್ತು. ಆ ಆರು ತಿಂಗಳುಗಳು ನಮಗೆ ಒಂದು ಯುಗದಂತೆ ಭಾಸವಾದವು ಎಂದು ಅವರು ತಮ್ಮ ವಿರಹದ ನೋವನ್ನು ಹಂಚಿಕೊಂಡಿದ್ದಾರೆ
ಸುಖಾಂತ್ಯ ಕಂಡ ಪಯಣ:
ಸುದೀರ್ಘ 190 ದಿನಗಳ ಕಾಲದ ಕಾಯುವಿಕೆ ಮತ್ತು ಅನಿವಾರ್ಯ ಅಗಲಿಕೆಯ ನಂತರ, ಅಂತಿಮವಾಗಿ ಸ್ಕೈ ಎಲ್ಲಾ ಕಾನೂನು ಪ್ರಕ್ರಿಯೆಗಳನ್ನು ಪೂರೈಸಿ ಆಸ್ಟ್ರೇಲಿಯಾದಲ್ಲಿ ತನ್ನ ಪೋಷಕರನ್ನು ಸೇರಿಕೊಂಡಿದ್ದಾನೆ. ಸ್ಕೈ ತನ್ನನ್ನು ನೋಡಿ ಓಡಿಬಂದ ಆ ಕ್ಷಣ ದಂಪತಿಗಳ ಪಾಲಿಗೆ ಇಡೀ ಪ್ರಪಂಚವೇ ಸಿಕ್ಕಷ್ಟು ಸಂತೋಷ ತಂದಿತ್ತು.
ಈ ಭಾವುಕ ಮರುಮಿಲನದ ವಿಡಿಯೋವನ್ನು ಕಹಾನಿ ಆಫ್ ಟೇಲ್ಸ್ ಎಂಬ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ದಿವ್ಯಾ ಮತ್ತು ಜಾನ್ ಹಣವನ್ನು ಯಾವತ್ತಿದ್ದರೂ ಮತ್ತೆ ಸಂಪಾದಿಸಬಹುದು, ಆದರೆ ನಮ್ಮ ಸ್ಕೈ ಮೇಲಿರುವ ಪ್ರೀತಿಯನ್ನು ಯಾವುದರಿಂದಲೂ ತುಂಬಲು ಸಾಧ್ಯವಿಲ್ಲ. ನಮಗೆ ಅವನು ಕೇವಲ ನಾಯಿಯಲ್ಲ ನಮ್ಮ ಸ್ವಂತ ಮಗು ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. ಅವರ ಈ ಅಚಲ ಪ್ರೀತಿಯ ಮಾತುಗಳು ಈಗ ಲಕ್ಷಾಂತರ ಜನರ ಕಣ್ಣಾಲಿಗಳನ್ನು ತೇವಗೊಳಿಸಿವೆ
ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾದ ಮೆಚ್ಚುಗೆ:
ಈ ಕಥೆಯನ್ನು ನೋಡಿದ ನೆಟ್ಟಿಗರು ದಂಪತಿಗಳ ಬದ್ಧತೆಯನ್ನು ಶ್ಲಾಘಿಸಿದ್ದಾರೆ:
ಇದು ನಿಜವಾದ ಪ್ರೀತಿ. ಸಾಕುಪ್ರಾಣಿಗಳು ಕುಟುಂಬದ ಸದಸ್ಯರೇ ಹೊರತು ಅಲಂಕಾರಿಕ ವಸ್ತುಗಳಲ್ಲ.
ಮತ್ತೊಂದು ನಾಯಿ ತಗೊಳ್ಳಿ ಎನ್ನುವವರಿಗೆ ಪ್ರಾಣಿಗಳ ಜೊತೆಗಿನ ಬಾಂಧವ್ಯದ ಬೆಲೆ ತಿಳಿಯದು.
ಸ್ಕೈ ತುಂಬಾ ಅದೃಷ್ಟವಂತ ಇಂತಹ ಪೋಷಕರು ಸಿಗಲು ಪುಣ್ಯ ಮಾಡಿರಬೇಕು.
