ಬ್ಲೇಡ್ನ ತುಂಡುಗಳನ್ನು ನುಂಗಿಬಿಟ್ಟರೆ ಪರಿಸ್ಥಿತಿ ಎಷ್ಟು ಭಯಾನಕವಾಗಬಹುದು ಎಂಬುದನ್ನು ಊಹಿಸುವುದೇ ಕಷ್ಟ. ಹೈದರಾಬಾದ್ನ ಬಾಲಕನೊಬ್ಬ ಬರೋಬ್ಬರಿ ನಾಲ್ಕು ಬ್ಲೇಡ್ ತುಂಡುಗಳನ್ನು ನುಂಗಿ ಸಾವಿನ ಅಂಚಿಗೆ ತಲುಪಿದ್ದ. ಆದರೆ ಆಸ್ಪತ್ರೆಯ ವೈದ್ಯರು ನಡೆಸಿದ ಯಶಸ್ವಿ ಚಿಕಿತ್ಸೆಯಿಂದ ಬಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.
ಜೀವನ್ಮರಣದ ಸ್ಥಿತಿಯಲ್ಲಿ ತುರ್ತಾಗಿ ಆಸ್ಪತ್ರೆಗೆ ದಾಖಲಾಗಿದ್ದ ಬಾಲಕನಿಗೆ ಉಸ್ಮಾನಿಯಾ ಜನರಲ್ ಆಸ್ಪತ್ರೆಯ ವೈದ್ಯರು ಮರುಜೀವ ನೀಡಿದ್ದಾರೆ. ಮಾನಸಿಕ ಸಮಸ್ಯೆಗಳಿಂದಾಗಿ ನಾಲ್ಕು ಹರಿತವಾದ ಬ್ಲೇಡ್ ತುಂಡುಗಳನ್ನು ನುಂಗಿದ್ದ ಬಾಲಕನಿಗೆ ಯಾವುದೇ ಶಸ್ತ್ರಚಿಕಿತ್ಸೆ ನಡೆಸದೆ, ಅತ್ಯಾಧುನಿಕ ಎಂಡೋಸ್ಕೋಪಿ ವಿಧಾನದಿಂದ ಅವುಗಳನ್ನು ಹೊರತೆಗೆದು ವೈದ್ಯರು ತಮ್ಮ ವೈದ್ಯಕೀಯ ಪರಿಣತಿಯನ್ನು ಮೆರೆದಿದ್ದಾರೆ.
ಹೈದರಾಬಾದ್ನ ಈ ಬಾಲಕ ಮಾನಸಿಕ ಸಮಸ್ಯೆಯಿಂದಾಗಿ ಇತ್ತೀಚೆಗೆ ವಿವೇಚನೆ ಕಳೆದುಕೊಂಡು ನಾಲ್ಕು ಬ್ಲೇಡ್ ತುಂಡುಗಳನ್ನು ನುಂಗಿದ್ದ. ಸೆಪ್ಟೆಂಬರ್ 3ರ ರಾತ್ರಿ ಏಕಾಏಕಿ ತೀವ್ರ ಹೊಟ್ಟೆನೋವು ಹಾಗೂ ಅಸ್ವಸ್ಥತೆ ಕಾಣಿಸಿಕೊಂಡಿದ್ದರಿಂದ ಕುಟುಂಬಸ್ಥರು ಆತಂಕಗೊಂಡಿದ್ದರು. ಪರಿಸ್ಥಿತಿ ಗಂಭೀರವಾಗುತ್ತಿದ್ದಂತೆ ಯಾವುದೇ ವಿಳಂಬ ಮಾಡದೆ ಬಾಲಕನನ್ನು ಉಸ್ಮಾನಿಯಾ ಆಸ್ಪತ್ರೆಯ ತುರ್ತು ಚಿಕಿತ್ಸಾ ವಿಭಾಗಕ್ಕೆ ದಾಖಲಿಸಲಾಯಿತು.
ವೈದ್ಯರು ಕೂಡಲೇ ಬಾಲಕನಿಗೆ ಎಕ್ಸ್ರೇ ಹಾಗೂ ತುರ್ತು ಸ್ಕ್ಯಾನಿಂಗ್ ಪರೀಕ್ಷೆಗಳನ್ನು ನಡೆಸಿದರು. ಈ ಪರೀಕ್ಷೆಗಳಲ್ಲಿ ಆಘಾತಕಾರಿ ವಿಚಾರ ಬೆಳಕಿಗೆ ಬಂದಿದೆ. ಬಾಲಕನ ಜೀರ್ಣಾಂಗದಲ್ಲಿ ಮೂರು ಬ್ಲೇಡ್ ತುಂಡುಗಳು ಇರುವುದು ಕಂಡುಬಂದರೆ, ಮತ್ತೊಂದು ಹರಿತವಾದ ತುಂಡು ಈಗಾಗಲೇ ಜೀರ್ಣಾಂಗವನ್ನು ದಾಟಿ ಕರುಳಿನತ್ತ ಜಾರಿರುವುದು ಪತ್ತೆಯಾಯಿತು.
ಬ್ಲೇಡ್ ತುಂಡುಗಳು ಸ್ವಲ್ಪವೇ ಚಲಿಸಿದರೂ ಒಳಗಿನ ಅಂಗಗಳಿಗೆ ಹಾನಿಯಾಗಿ, ತೀವ್ರ ಆಂತರಿಕ ರಕ್ತಸ್ರಾವ ಸಂಭವಿಸಿ ಬಾಲಕನ ಜೀವಕ್ಕೆ ಅಪಾಯ ಎದುರಾಗುವ ಸಾಧ್ಯತೆ ಇತ್ತು ಎಂದು ವೈದ್ಯರು ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಗ್ಯಾಸ್ಟ್ರೋಎಂಟರಾಲಜಿ ವಿಭಾಗದ ಮುಖ್ಯಸ್ಥ ಡಾ. ಬಿ. ರಮೇಶ್ಕುಮಾರ್ ನೇತೃತ್ವದ ತಜ್ಞ ವೈದ್ಯರ ತಂಡ ಚಿಕಿತ್ಸೆಗೆ ಮುಂದಾಯಿತು. ಸಾಮಾನ್ಯವಾಗಿ ಇಂತಹ ಸಂಕೀರ್ಣ ಪ್ರಕರಣಗಳಲ್ಲಿ ಹೊಟ್ಟೆಯನ್ನು ತೆರೆದು ಓಪನ್ ಸರ್ಜರಿ ನಡೆಸಲಾಗುತ್ತದೆ. ಆದರೆ ಬಾಲಕನ ಚಿಕ್ಕ ವಯಸ್ಸು ಹಾಗೂ ಶಸ್ತ್ರಚಿಕಿತ್ಸೆಯಿಂದ ಉಂಟಾಗಬಹುದಾದ ಗಂಭೀರ ಅಪಾಯಗಳನ್ನು ಪರಿಗಣಿಸಿದ ವೈದ್ಯರು ಮಹತ್ವದ ನಿರ್ಧಾರ ಕೈಗೊಂಡರು.
ಶಸ್ತ್ರಚಿಕಿತ್ಸೆ ನಡೆಸದೆ ಅತ್ಯಾಧುನಿಕ ಅಪ್ಪರ್ ಜಿಐ ಎಂಡೋಸ್ಕೋಪಿ ವಿಧಾನದ ಮೂಲಕವೇ ಬ್ಲೇಡ್ ತುಂಡುಗಳನ್ನು ಹೊರತೆಗೆಯಲು ವೈದ್ಯರು ನಿರ್ಧರಿಸಿದರು.
ಅನ್ನನಾಳ ಹಾಗೂ ಜೀರ್ಣಾಂಗದ ಸೂಕ್ಷ್ಮ ಗೋಡೆಗಳಿಗೆ ಯಾವುದೇ ಸಣ್ಣ ಗಾಯವೂ ಆಗದಂತೆ ಮತ್ತು ಆಂತರಿಕ ರಕ್ತಸ್ರಾವವಾಗದಂತೆ ವೈದ್ಯರು ವಿಶೇಷ ವೈದ್ಯಕೀಯ ಉಪಕರಣಗಳ ನೆರವಿನಿಂದ ಅತ್ಯಂತ ಎಚ್ಚರಿಕೆಯಿಂದ ಚಿಕಿತ್ಸೆ ನಡೆಸಿದರು. ಹೊಟ್ಟೆಯಲ್ಲಿದ್ದ ಬ್ಲೇಡ್ ತುಂಡುಗಳನ್ನು ಒಂದೊಂದಾಗಿ ಎಂಡೋಸ್ಕೋಪಿ ಮೂಲಕ ಸುರಕ್ಷಿತವಾಗಿ ಹೊರತೆಗೆಯಲಾಯಿತು.
ಅತ್ಯಂತ ಸಂಕೀರ್ಣವಾದ ಈ ವೈದ್ಯಕೀಯ ಪ್ರಕ್ರಿಯೆ ಯಶಸ್ವಿಯಾಗಿದ್ದು, ಬಾಲಕ ಸ್ವಲ್ಪದರಲ್ಲೇ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಸದ್ಯ ಬಾಲಕ ವೇಗವಾಗಿ ಚೇತರಿಸಿಕೊಳ್ಳುತ್ತಿದ್ದಾನೆ ಎಂದು ಡಾ. ಬಿ. ರಮೇಶ್ಕುಮಾರ್ ತಿಳಿಸಿದ್ದಾರೆ.
ಸಮಯಪ್ರಜ್ಞೆಯಿಂದ ಕಾರ್ಯನಿರ್ವಹಿಸಿ ತಮ್ಮ ಮಗನಿಗೆ ಮರುಜೀವ ನೀಡಿದ ಉಸ್ಮಾನಿಯಾ ಆಸ್ಪತ್ರೆಯ ವೈದ್ಯರ ತಂಡಕ್ಕೆ ಬಾಲಕನ ಪೋಷಕರು ಕಣ್ಣೀರಿನೊಂದಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
