ಅಮೆರಿಕನ್ ಏರ್ಲೈನ್ಸ್ ವಿಮಾನದಲ್ಲಿ ಪ್ರಯಾಣಿಕನೊಬ್ಬ ಹಠಾತ್ತನೆ ರಂಪಾಟ ನಡೆಸಿ, ಸಹಪ್ರಯಾಣಿಕನ ಮೇಲೆ ಭೀಕರವಾಗಿ ಹಲ್ಲೆ ನಡೆಸಿದ ಘಟನೆ ನಡೆದಿದೆ. ಪರಿಸ್ಥಿತಿ ಕೈಮೀರಿದಾಗ ವಿಮಾನ ಸಿಬ್ಬಂದಿ ಹಾಗೂ ಇತರೆ ಪ್ರಯಾಣಿಕರು ಸೇರಿ ಆತನನ್ನು ಡಕ್ಟ್ ಟೇಪ್ (ಪ್ಲಾಸ್ಟಿಕ್ ಜಿಗುಟು ಪಟ್ಟಿ) ಮತ್ತು ಜಿಪ್ ಟೈಗಳಿಂದ ಸೀಟಿಗೆ ಕಟ್ಟಿಹಾಕಿದ ಪ್ರಸಂಗ ನಡೆದಿದೆ. ಈ ಕಲಾಪದಿಂದಾಗಿ ಡಲ್ಲಾಸ್-ಫೋರ್ಟ್ ವರ್ತ್ನಿಂದ ನ್ಯೂಯಾರ್ಕ್ನ ನೆವಾರ್ಕ್ಗೆ ಹೊರಟಿದ್ದ ವಿಮಾನವನ್ನು ಬಲ್ಟಿಮೋರ್ಗೆ ಡೈವರ್ಟ್ ಮಾಡಿ ತುರ್ತು ಲ್ಯಾಂಡಿಂಗ್ ಮಾಡಲಾಗಿದೆ.
ಘಟನೆಯ ವಿವರಗಳ ಪ್ರಕಾರ, ವಿಮಾನ ಟೇಕಾಫ್ ಆದ ಸುಮಾರು ಎರಡು ಗಂಟೆಗಳ ನಂತರ ಈ ಹೈಡ್ರಾಮಾ ಪ್ರಾರಂಭವಾಗಿದೆ. ಯಾವುದೇ ಮುನ್ಸೂಚನೆಯಿಲ್ಲದೆ ಏಕಾಏಕಿ ಕೂಗಾಡಲು ಪ್ರಾರಂಭಿಸಿದ ಪ್ರಯಾಣಿಕ, ತನ್ನ ಪಕ್ಕದ ಸೀಟಿನಲ್ಲಿದ್ದ ವ್ಯಕ್ತಿಯ ಕತ್ತು ಹಿಸುಕಿ ಹಲ್ಲೆ ನಡೆಸಲು ಯತ್ನಿಸಿದ್ದಾನೆ. ಇದನ್ನು ಗಮನಿಸಿದ ನಿವೃತ್ತ ಕಾನೂನು ಜಾರಿ ಅಧಿಕಾರಿ ಜುವಾನ್ ಮೆಜಿಯಾ ಮತ್ತು ಸಹಪ್ರಯಾಣಿಕ ರಿಚರ್ಡ್ ಓಲೆನಿಕ್ ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಹಲ್ಲೆಗೊಳಗಾಗುತ್ತಿದ್ದ ವ್ಯಕ್ತಿಯನ್ನು ರಕ್ಷಿಸಿದ್ದಾರೆ.
ಸನ್ನಿವೇಶ ಗಂಭೀರವಾಗುತ್ತಿದ್ದಂತೆ ವಿಮಾನ ಸಿಬ್ಬಂದಿ ನೀಡಿದ ಜಿಪ್ ಟೈಗಳು ಮತ್ತು ಡಕ್ಟ್ ಟೇಪ್ ಬಳಸಿ, ರಂಪಾಟ ಮಾಡುತ್ತಿದ್ದ ಪ್ರಯಾಣಿಕನ ಕೈಗಳು ಹಾಗೂ ದೇಹವನ್ನು ಸೀಟಿಗೆ ಬಿಗಿಯಾಗಿ ಸುತ್ತಿ ಬಂಧಿಸಲಾಯಿತು. ಇದಕ್ಕೂ ಮುನ್ನ ಆತ ಗಗನಸಖಿಯರ ಮೇಲೆ ಜನಾಂಗೀಯ ನಿಂದನೆ ಹಾಗೂ ಅಸಭ್ಯ ಪದ ಬಳಸಿ ಧಮ್ಕಿ ಹಾಕಿದ್ದ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ವಿಮಾನದಲ್ಲಿದ್ದವರ ಭದ್ರತೆಯ ದೃಷ್ಟಿಯಿಂದ ಪೈಲಟ್ಗಳು ತಕ್ಷಣವೇ ವಿಮಾನವನ್ನು ಬಲ್ಟಿಮೋರ್ನತ್ತ ತಿರುಗಿಸಿ ಲ್ಯಾಂಡ್ ಮಾಡಿದರು.
ವಿಮಾನ ನೆಲಕ್ಕಿಳಿಯುತ್ತಿದ್ದಂತೆಯೇ ಸ್ಥಳೀಯ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದಿದ್ದಾರೆ. ಬಳಿಕ ವಿಮಾನವು ನೆವಾರ್ಕ್ಗೆ ತನ್ನ ಪ್ರಯಾಣವನ್ನು ಮುಂದುವರಿಸಿದೆ. ಘಟನೆ ಕುರಿತು ಪ್ರತಿಕ್ರಿಯಿಸಿರುವ ಅಮೆರಿಕನ್ ಏರ್ಲೈನ್ಸ್, ಪ್ರಯಾಣಿಕರ ಮತ್ತು ಸಿಬ್ಬಂದಿಯ ಸುರಕ್ಷತೆಗೆ ನಮ್ಮ ಮೊದಲ ಆದ್ಯತೆಯಾಗಿದ್ದು, ಯಾವುದೇ ರೀತಿಯ ಹಿಂಸಾಚಾರವನ್ನು ಸಹಿಸುವುದಿಲ್ಲ ಎಂದು ಹೇಳಿದೆ. ಸದ್ಯ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಎಫ್ಬಿಐ) ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಆರೋಪಿಯ ವಿರುದ್ಧ ಫೆಡರಲ್ ಕಾನೂನಿನಡಿ ದೂರು ದಾಖಲಿಸಲು ತನಿಖೆ ಕೈಗೆತ್ತಿಕೊಂಡಿದೆ.
