ನಿಮ್ಮ ಕುಡಿಯುವ ನೀರು ನಿಜವಾಗಿಯೂ ಸುರಕ್ಷಿತವೇ? ಮನೆಯಲ್ಲೇ ಗುಣಮಟ್ಟ ಪರೀಕ್ಷೆ ಮಾಡಿ

ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಕಲುಷಿತ ನೀರು ಸೇವಿಸಿ ಕನಿಷ್ಠ 15 ಜನರು ಸಾವನ್ನಪ್ಪಿದ್ದಾರೆ ಮತ್ತು ಹಲವರು ಗಂಭೀರ ಸ್ಥಿತಿಯಲ್ಲಿದ್ದಾರೆ. ವರದಿಗಳ ಪ್ರಕಾರ, ಆ ಭಾಗಕ್ಕೆ ಕಳೆದ ಕೆಲವು ಸಮಯದಿಂದ ಕಲುಷಿತ ನೀರು ಸರಬರಾಜಾಗುತ್ತಿತ್ತು, ಇದನ್ನು ಅರಿಯದ ನಿವಾಸಿಗಳು ಆ ನೀರನ್ನು ಸೇವಿಸಿ ತೀವ್ರವಾಗಿ ಅನಾರೋಗ್ಯಕ್ಕೆ ಒಳಗಾಗಿದ್ದಾರೆ.

ಮನೆಯಲ್ಲೇ ನೀರಿನ ಗುಣಮಟ್ಟವನ್ನು ಪರೀಕ್ಷಿಸಲು ವಾಟರ್ ಟೆಸ್ಟಿಂಗ್ ಕಿಟ್‌ಗಳನ್ನು ಬಳಸಲು ತಜ್ಞರು ಶಿಫಾರಸು ಮಾಡುತ್ತಾರೆ. ಈ ಕಿಟ್‌ಗಳು ನೀರಿನಲ್ಲಿರುವ ಕಲುಷಿತ ಅಂಶಗಳನ್ನು ಪತ್ತೆಹಚ್ಚುವುದಲ್ಲದೆ, ಗಂಭೀರ ಕಾಯಿಲೆಗಳನ್ನು ತಡೆಗಟ್ಟಲು ಸಹಾಯ ಮಾಡುತ್ತವೆ. ಆದರೆ, ನಿಖರವಾದ ಫಲಿತಾಂಶಕ್ಕಾಗಿ ಇವುಗಳನ್ನು ಸರಿಯಾಗಿ ಬಳಸುವುದು ಅತ್ಯಗತ್ಯ.

ಯಾವ ವಾಟರ್ ಟೆಸ್ಟಿಂಗ್ ಕಿಟ್ ಉತ್ತಮ?

• ಕೋಲಿಫಾರ್ಮ್ ಮತ್ತು ಇ-ಕೋಲಿ ಟೆಸ್ಟ್ ಕಿಟ್ (Coliform and E. coli Test Kit): ಈ ಕಿಟ್ ಅತ್ಯಂತ ವಿಶ್ವಾಸಾರ್ಹವಾಗಿದ್ದು, ಶೇಕಡಾ 90 ರಷ್ಟು ನಿಖರವಾದ ಫಲಿತಾಂಶ ನೀಡುತ್ತದೆ. ಇದು ನೀರಿನಲ್ಲಿ ಒಳಚರಂಡಿ ಮಿಶ್ರಣದಿಂದ ಉಂಟಾಗುವ ಬ್ಯಾಕ್ಟೀರಿಯಾಗಳನ್ನು ಪತ್ತೆಹಚ್ಚುತ್ತದೆ. ಪರೀಕ್ಷೆಯ 18-24 ಗಂಟೆಗಳ ನಂತರ ಫಲಿತಾಂಶ ತಿಳಿಯುತ್ತದೆ.
• ಕ್ಲೋರಿನ್ ಟೆಸ್ಟಿಂಗ್ ಕಿಟ್ (Chlorine Testing Kit): ನಗರಸಭೆ ಪೂರೈಸುವ ನೀರಿನಲ್ಲಿ ಕ್ರಿಮಿಗಳನ್ನು ಕೊಲ್ಲಲು ಸಾಮಾನ್ಯವಾಗಿ ಕ್ಲೋರಿನ್ ಬಳಸಲಾಗುತ್ತದೆ. ಈ ಕಿಟ್ ಕ್ಲೋರಿನ್ ಮಟ್ಟವನ್ನು ಅಳೆಯುತ್ತದೆ – ನೀರಿನಲ್ಲಿ ಕ್ಲೋರಿನ್ ಸಾಕಷ್ಟು ಪ್ರಮಾಣದಲ್ಲಿದ್ದರೆ, ಅದು ಕುಡಿಯಲು ಸುರಕ್ಷಿತವೆಂದು ಪರಿಗಣಿಸಲಾಗುತ್ತದೆ.
• ಟರ್ಬಿಡಿಟಿ ಟೆಸ್ಟ್ ಟ್ಯೂಬ್ (Turbidity Test Tube): ಮಳೆ ಅಥವಾ ಪೈಪ್‌ಲೈನ್ ಸೋರಿಕೆಯಿಂದಾಗಿ ನೀರು ಮಸುಕಾಗಿದ್ದರೆ (cloudiness) ಅದನ್ನು ಪರೀಕ್ಷಿಸಲು ಇದು ಸೂಕ್ತವಾಗಿದೆ. ನೀರು ಕೆಸರುಮಯವಾಗಿದೆಯೇ ಅಥವಾ ಅಶುದ್ಧವಾಗಿದೆಯೇ ಎಂಬುದನ್ನು ಇದು ಶೀಘ್ರವಾಗಿ ತೋರಿಸುತ್ತದೆ.

ಮನೆಯಲ್ಲಿ ಈ ಕಿಟ್‌ ಬಳಕೆ ಹೇಗೆ?

• ಮೊದಲಿಗೆ ಸ್ವಚ್ಛವಾದ ಪಾತ್ರೆಯಲ್ಲಿ ನೀರನ್ನು ಸಂಗ್ರಹಿಸಿ.
• ಕೋಲಿಫಾರ್ಮ್ ಕಿಟ್‌ಗಾಗಿ: ಕಿಟ್‌ನಲ್ಲಿರುವ ರಿಯಾಜೆಂಟ್ ಅನ್ನು ನೀರಿಗೆ ಸೇರಿಸಿ ಪಕ್ಕಕ್ಕಿಡಿ. 18-24 ಗಂಟೆಗಳ ನಂತರ ಬಣ್ಣದ ಬದಲಾವಣೆಯನ್ನು ಗಮನಿಸಿ.
• ಕ್ಲೋರಿನ್ ಕಿಟ್‌ಗಾಗಿ: ಪರೀಕ್ಷಾ ಪಟ್ಟಿ ಅಥವಾ ದ್ರಾವಣಕ್ಕೆ ಕೆಲವು ಹನಿ ನೀರನ್ನು ಸೇರಿಸಿ. ಬಣ್ಣ ಬದಲಾಗದಿದ್ದರೆ, ಆ ನೀರು ಸುರಕ್ಷಿತವಲ್ಲ ಎಂದು ಅರ್ಥ.
• ಟರ್ಬಿಡಿಟಿ ಟ್ಯೂಬ್‌ಗಾಗಿ: ಕೊಳವೆಯ ಮೂಲಕ ನೋಡಿ – ಕೆಳಭಾಗದಲ್ಲಿರುವ ಗುರುತು ಮಸುಕಾಗಿ ಕಂಡರೆ, ನೀರು ಕಲುಷಿತಗೊಂಡಿದೆ ಎಂದರ್ಥ.

ಟಿಡಿಎಸ್ ಮೀಟರ್ ಎಂದರೇನು?: ಟಿಡಿಎಸ್‌ ಎಂದರೆ Total Dissolved Solids ಮೀಟರ್ ನೀರಿನಲ್ಲಿ ಕರಗಿರುವ ಖನಿಜಗಳು ಮತ್ತು ಲವಣಗಳ ಪ್ರಮಾಣವನ್ನು ಅಳೆಯುತ್ತದೆ.

• TDS ಮಟ್ಟ 300 mg/L ಗಿಂತ ಕಡಿಮೆಯಿದ್ದರೆ ಅದು ಶುದ್ಧ ನೀರು.
• 300-600 mg/L ವರೆಗಿನ ನೀರು ಕುಡಿಯಲು ಯೋಗ್ಯವಾಗಿದೆ.
• 600 mg/L ಗಿಂತ ಹೆಚ್ಚಿದ್ದರೆ ಅದು ಕುಡಿಯಲು ಹಾನಿಕಾರಕವಾಗಬಹುದು.

ಇಂದೋರ್ ದುರಂತದ ಬಗ್ಗೆ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದು, ಇಂತಹ ಘಟನೆಗಳು ಮರುಕಳಿಸದಂತೆ ತಡೆಯಲು ದೇಶಾದ್ಯಂತ ಜನರು ತಮ್ಮ ಕುಡಿಯುವ ನೀರನ್ನು ಪರೀಕ್ಷಿಸಿಕೊಳ್ಳುವಂತೆ ಆರೋಗ್ಯ ತಜ್ಞರು ಒತ್ತಾಯಿಸಿದ್ದಾರೆ.