ಇತ್ತೀಚಿನ ದಿನಗಳಲ್ಲಿ ಮೌಂಜಾರೊ ಅಂತಹ ತೂಕ ಇಳಿಸುವ ಔಷಧಿಗಳ ಬಳಕೆ ಹೆಚ್ಚಾಗುತ್ತಿದೆ. ಇವು ದೇಹದ ತೂಕವನ್ನು ಕಡಿಮೆ ಮಾಡಲು ಸಹಕಾರಿಯಾಗಿದ್ದರೂ, ಇವುಗಳ ಬಳಕೆಯಿಂದ ಚರ್ಮದ ಕಾಂತಿ ಕುಂದುವುದು ಮತ್ತು ಕೂದಲು ಉದುರುವಂತಹ ಸಮಸ್ಯೆಗಳು ಎದುರಾಗುವ ಸಾಧ್ಯತೆ ಇರುತ್ತದೆ. ಈ ಬಗ್ಗೆ ದೆಹಲಿಯ ಹೆಸರಾಂತ ಚರ್ಮರೋಗ ತಜ್ಞರಾದ ಡಾ. ಗುರ್ವೀನ್ ವಾರೈಚ್ ಗಾರೇಕರ್ ಅವರು ಕೆಲವು ಪ್ರಮುಖ ಎಚ್ಚರಿಕೆಗಳನ್ನು ಮತ್ತು ಸಲಹೆಗಳನ್ನು ನೀಡಿದ್ದಾರೆ.
ತೂಕ ಇಳಿಕೆಯ ಪ್ರಕ್ರಿಯೆಯಲ್ಲಿ ದೇಹದ ಆಂತರಿಕ ಬದಲಾವಣೆಗಳು ಬಾಹ್ಯ ಸೌಂದರ್ಯದ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಮತ್ತು ಅದನ್ನು ಹೇಗೆ ತಡೆಗಟ್ಟಬಹುದು ಎಂಬ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಪೋಷಕಾಂಶಗಳ ಕೊರತೆಯಾಗದಂತೆ ಎಚ್ಚರವಹಿಸಿ ದೇಹದ ತೂಕ ವೇಗವಾಗಿ ಕಡಿಮೆಯಾದಾಗ ಕೂದಲು ಉದುರುವಿಕೆ ಸಾಮಾನ್ಯ ಸಮಸ್ಯೆಯಾಗಿ ಕಾಡುತ್ತದೆ. ಇದನ್ನು ತಡೆಗಟ್ಟಲು ದೇಹದಲ್ಲಿ ವಿಟಮಿನ್ ಬಿ12, ವಿಟಮಿನ್ ಡಿ, ಕ್ಯಾಲ್ಸಿಯಂ ಮತ್ತು ಫೆರಿಟಿನ್ ಪ್ರಮಾಣ ಸಮತೋಲನದಲ್ಲಿರುವುದು ಬಹಳ ಮುಖ್ಯ. ಮೌಂಜಾರೊ ಚಿಕಿತ್ಸೆ ಆರಂಭಿಸುವ ಮುನ್ನವೇ ರಕ್ತ ಪರೀಕ್ಷೆ ಮಾಡಿಸಿಕೊಂಡು ಈ ಪೋಷಕಾಂಶಗಳ ಮಟ್ಟವನ್ನು ಸರಿಪಡಿಸಿಕೊಳ್ಳುವುದು ಉತ್ತಮ.
ಪ್ರೋಟೀನ್ ಮತ್ತು ಹೈಡ್ರೇಶನ್ ಅಗತ್ಯ ಚರ್ಮದ ಬಿಗಿತವನ್ನು ಕಾಪಾಡಿಕೊಳ್ಳಲು ಪ್ರೋಟೀನ್ ಪ್ರಮುಖ ಪಾತ್ರ ವಹಿಸುತ್ತದೆ. ಪ್ರತಿ ಕೆಜಿ ತೂಕಕ್ಕೆ 1 ಗ್ರಾಂ ನಷ್ಟು ಪ್ರೋಟೀನ್ ಅನ್ನು ದೈನಂದಿನ ಆಹಾರದಲ್ಲಿ ಸೇರಿಸಿಕೊಳ್ಳಬೇಕು. ಇದು ಚರ್ಮ ಜೋತುಬೀಳುವುದನ್ನು ಮತ್ತು ಸ್ಟ್ರೆಚ್ ಮಾರ್ಕ್ಸ್ ಆಗುವುದನ್ನು ನಿಯಂತ್ರಿಸುತ್ತದೆ. ಇದರ ಜೊತೆಗೆ ದಿನಕ್ಕೆ ಕನಿಷ್ಠ ಎರಡರಿಂದ ಮೂರು ಲೀಟರ್ ನೀರು ಕುಡಿಯುವುದು ಚರ್ಮದ ತೇವಾಂಶವನ್ನು ಕಾಯ್ದುಕೊಳ್ಳಲು ಸಹಕಾರಿ.
ಕೂದಲಿನ ಮೇಲೆ ರಾಸಾಯನಿಕ ಪ್ರಯೋಗ ಬೇಡ ಔಷಧಿ ಸೇವನೆಯ ಅವಧಿಯಲ್ಲಿ ಕೂದಲಿಗೆ ಕೆರಾಟಿನ್ ಅಥವಾ ಸ್ಮೂತ್ನಿಂಗ್ನಂತಹ ಯಾವುದೇ ಕೃತಕ ಚಿಕಿತ್ಸೆಗಳನ್ನು ನೀಡಬಾರದು. ಇದು ಕೂದಲಿನ ದೃಢತೆಯನ್ನು ಇನ್ನಷ್ಟು ಕಡಿಮೆ ಮಾಡಬಹುದು. ಬದಲಾಗಿ ತಜ್ಞರ ಸಲಹೆಯ ಮೇರೆಗೆ ಕೂದಲಿನ ಆರೋಗ್ಯ ವೃದ್ಧಿಸುವ ಸಪ್ಲಿಮೆಂಟ್ಸ್ ಬಳಸಬಹುದು.
ವ್ಯಾಯಾಮದ ಕ್ರಮದಲ್ಲಿರಲಿ ಬದಲಾವಣೆ ತೂಕ ಇಳಿಸುವಾಗ ಕೇವಲ ಕಾರ್ಡಿಯೋ ವ್ಯಾಯಾಮ ಮಾಡುವುದರಿಂದ ಚರ್ಮ ಸಡಿಲಗೊಳ್ಳುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ವೇಟ್ ಟ್ರೈನಿಂಗ್ ಅಥವಾ ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮಗಳಿಗೆ ಹೆಚ್ಚು ಆದ್ಯತೆ ನೀಡಬೇಕು. ಇದು ದೇಹಕ್ಕೆ ಉತ್ತಮ ಆಕಾರ ನೀಡುವ ಜೊತೆಗೆ ಚರ್ಮದ ಸೌಂದರ್ಯವನ್ನೂ ಕಾಪಾಡುತ್ತದೆ.
ಸನ್ ಸ್ಕ್ರೀನ್ ಮತ್ತು ರೆಟಿನಾಯ್ಡ್ ಬಳಕೆ ಮುಖದ ಕಾಂತಿಯನ್ನು ಕಾಯ್ದುಕೊಳ್ಳಲು ಪ್ರತಿದಿನ ಸನ್ ಸ್ಕ್ರೀನ್ ಬಳಸುವುದು ಅನಿವಾರ್ಯ. ಅದರೊಂದಿಗೆ ರಾತ್ರಿ ವೇಳೆ ರೆಟಿನಾಯ್ಡ್ ಅನ್ವಯಿಸುವುದು ಚರ್ಮದ ರಚನೆಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಒಂದು ವೇಳೆ ಅತಿಯಾದ ಕೂದಲು ಉದುರುವಿಕೆ ಅಥವಾ ಚರ್ಮದ ಅಲರ್ಜಿ ಕಂಡುಬಂದಲ್ಲಿ ವಿಳಂಬ ಮಾಡದೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
