ಟೀಮ್ ಇಂಡಿಯಾದ ಆಲ್ ರೌಂಡರ್ ಆಟಗಾರ ಹಾರ್ದಿಕ್ ಪಾಂಡ್ಯ ತಮ್ಮ ವಿಭಿನ್ನ ಶೈಲಿ ಮತ್ತು ಫ್ಯಾಷನ್ ಸೆನ್ಸ್ ಮೂಲಕವೇ ಹೆಚ್ಚಾಗಿ ಸುದ್ದಿಯಲ್ಲಿರುತ್ತಾರೆ. ಇದೀಗ ಅವರು ತಮ್ಮ ಹೊಸ ಲುಕ್ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದ್ದಾರೆ. ಸಂಪೂರ್ಣವಾಗಿ ಬೋಳು ತಲೆಯೊಂದಿಗೆ ಕಾಣಿಸಿಕೊಂಡಿರುವ ಪಾಂಡ್ಯ ಅವರ ಫೋಟೋಗಳು ವೈರಲ್ ಆಗಿದ್ದು, ಇದರ ಜೊತೆಗೆ ಅವರು ಧರಿಸಿರುವ ಅತ್ಯಂತ ಐಷಾರಾಮಿ ವಾಚ್ ನೆಟ್ಟಿಗರ ಗಮನ ಸೆಳೆದಿದೆ.
ತಮ್ಮ ಹೊಸ ಲುಕ್ನೊಂದಿಗೆ ಹಾರ್ದಿಕ್ ಪಾಂಡ್ಯ ಅತ್ಯಂತ ದುಬಾರಿ ‘ರಿಚರ್ಡ್ ಮಿಲೆ RM 67-02’ ಮಾದರಿಯ ವಾಚ್ ಧರಿಸಿರುವುದು ಕಂಡುಬಂದಿದೆ. ಕೇವಲ 32 ಗ್ರಾಂ ತೂಕವಿರುವ ಈ ವಿಶೇಷ ಸ್ಪೋರ್ಟ್ಸ್ ವಾಚ್ ಕಾರ್ಬನ್ ಟಿಪಿಟಿ ತಂತ್ರಜ್ಞಾನ ಮತ್ತು ಟೈಟಾನಿಯಂನಿಂದ ತಯಾರಾಗಿದೆ. ಅತ್ಯಂತ ಹಗುರ ಹಾಗೂ ಗಟ್ಟಿಮುಟ್ಟಾದ ಈ ಕೈಗಡಿಯಾರದ ಮೌಲ್ಯ ಸುಮಾರು 4.5 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ. ಐಷಾರಾಮಿ ವಾಚ್ಗಳ ಸಂಗ್ರಹಕ್ಕೆ ಹೆಸರಾಗಿರುವ ಪಾಂಡ್ಯ ಅವರ ಈ ಲುಕ್ ಕ್ರೀಡಾಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.
ಹಾರ್ದಿಕ್ ಪಾಂಡ್ಯ ಅವರ ಈ ಹೊಸ ಬೋಳು ತಲೆಯ ಲುಕ್ ಕೇವಲ ಫ್ಯಾಷನ್ಗಾಗಿ ಮಾಡಿಕೊಂಡಿದ್ದಲ್ಲ. ತಿರುಮಲದ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನಕ್ಕೆ ಭೇಟಿ ನೀಡಿದ್ದ ಅವರು ದೇವರಿಗೆ ಮುಡಿ ನೀಡಿ ಪ್ರಾರ್ಥನೆ ಸಲ್ಲಿಸಿದ್ದರು. ತಮ್ಮ ಗೆಳತಿ ಮಹಿಕಾ ಶರ್ಮಾ ಅವರೊಂದಿಗೆ ತಿರುಪತಿಗೆ ತೆರಳಿದ್ದ ಪಾಂಡ್ಯ, ದೇವರ ಮೇಲಿನ ಭಕ್ತಿ ಹಾಗೂ ನಂಬಿಕೆಯಿಂದ ಈ ಸಾಂಪ್ರದಾಯಿಕ ಮುಂಡನ ಸೇವೆಯನ್ನು ನೆರವೇರಿಸಿದ್ದಾರೆ. ಈ ಧಾರ್ಮಿಕ ಕಾರ್ಯದ ನಂತರವೇ ಅವರು ಈ ಹೊಸ ರೂಪದಲ್ಲಿ ಕಾಣಿಸಿಕೊಂಡಿದ್ದಾರೆ.
