ವಿಶಾಲ್ ಚತುರ್ವೇದಿ ನಿರ್ದೇಶನದ ‘ಹನುಮಾನ್ ಅಂಶ’ ಸಿನಿಮಾ ಚಿತ್ರಮಂದಿರಗಳಲ್ಲಿ ಬಾಕ್ಸ್ ಆಫೀಸ್ ಗಳಿಕೆಯಲ್ಲಿ ಅಭೂತಪೂರ್ವ ಯಶಸ್ಸು ಕಾಣುತ್ತಿದೆ. ಪ್ರದರ್ಶನಾರಂಭಗೊಂಡು 52 ದಿನಗಳನ್ನು ಪೂರೈಸಿರುವ ಈ ಆಧ್ಯಾತ್ಮಿಕ ಕಥಾಹಂದರ ಹೊಂದಿರುವ ಚಿತ್ರವು, ಜಾಗತಿಕವಾಗಿ ₹400 ಕೋಟಿ ಗಳಿಕೆಯ ಮೈಲಿಗಲ್ಲನ್ನು ದಾಟಿದೆ.
ಭಾರತದಲ್ಲೇ ಈ ಸಿನಿಮಾ ಬರೋಬ್ಬರಿ ₹300 ಕೋಟಿಗೂ ಹೆಚ್ಚು ನಿವ್ವಳ ಗಳಿಕೆ ಕಂಡಿದೆ. ಎಂಟನೇ ವಾರದ ಭಾನುವಾರ (52ನೇ ದಿನ) ಚಿತ್ರದ ಗಳಿಕೆಯಲ್ಲಿ ಭಾರಿ ಏರಿಕೆ ಕಂಡುಬಂದಿದ್ದು, ಒಂದೇ ದಿನ ಭಾರತದಲ್ಲಿ ₹9 ಕೋಟಿ ನಿವ್ವಳ ಗಳಿಕೆ ಮಾಡಿದೆ. ಶನಿವಾರ ಗಳಿಸಿದ್ದ ₹6.50 ಕೋಟಿಗೆ ಹೋಲಿಸಿದರೆ ಭಾನುವಾರ ಶೇಕಡಾ 38.5 ರಷ್ಟು ಹೆಚ್ಚಿನ ಗಳಿಕೆ ದಾಖಲಾಗಿದೆ.
ಸಾಕ್ನಿಲ್ಕ್ (Sacnilk) ವರದಿಯ ಪ್ರಕಾರ, ಪ್ರಸ್ತುತ ಭಾರತದಲ್ಲಿ ಈ ಚಿತ್ರದ ಒಟ್ಟು ನಿವ್ವಳ ಗಳಿಕೆ ₹307.03 ಕೋಟಿಗೆ ತಲುಪಿದೆ. ಭಾರತದಲ್ಲಿನ ಒಟ್ಟು ಗ್ರಾಸ್ ಗಳಿಕೆ ₹362.70 ಕೋಟಿ ಹಾಗೂ ವಿದೇಶಿ ಮಾರುಕಟ್ಟೆಯಿಂದ ₹38.50 ಕೋಟಿ ಗಳಿಕೆಯಾಗಿದ್ದು, ಜಾಗತಿಕ ಮಟ್ಟದಲ್ಲಿ ಒಟ್ಟು ₹401.20 ಕೋಟಿ ಬಾಕ್ಸ್ ಆಫೀಸ್ ಗಳಿಕೆ ದಾಖಲಾಗಿದೆ.
ಬಾಲಿವುಡ್ನ ಈ ಸ್ಪಿರೈಚುಯಲ್ ಡ್ರಾಮಾ ಚಿತ್ರದಲ್ಲಿ ಶೋಭಿನಾವ್ ಸತ್ಯಾ ಮತ್ತು ವಿಹಾನ್ ಶೇಡ್ಗೆ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ. ಸ್ವಾತಂತ್ರ್ಯ ಪೂರ್ವ ಭಾರತದ ಹಿನ್ನೆಲೆಯಲ್ಲಿ ಸಾಗುವ ಈ ಚಿತ್ರವು, ಲಕ್ಷ್ಮಿ ನಾರಾಯಣ್ ಎಂಬ ಬಾಲಕನ ಬಾಲ್ಯದ ಜೀವನ, ತಾಯಿಯನ್ನು ಕಳೆದುಕೊಂಡ ನಂತರ ದೇವರ ಹುಡುಕಾಟದಲ್ಲಿ ಆತ ನಡೆಸುವ ಪಯಣ ಹಾಗೂ ಮುಂದೆ ಆತ ‘ನೀಮ್ ಕರೋಲಿ ಬಾಬಾ’ ಆಗಿ ರೂಪಾಂತರಗೊಳ್ಳುವ ರೋಚಕ ಆಧ್ಯಾತ್ಮಿಕ ಪಯಣವನ್ನು ಆಧರಿಸಿದೆ.
