ಬೇಸಿಗೆಯಲ್ಲಿ ಮನೆಯಲ್ಲೇ ಬೆಳೆಯಿರಿ ತಾಜಾ ಪುದೀನಾ: ಇಲ್ಲಿದೆ ಸುಲಭವಾದ ಸ್ಟೆಪ್-ಬೈ-ಸ್ಟೆಪ್ ಗೈಡ್

ಬೇಸಿಗೆ ಬಂತೆಂದರೆ ಸಾಕು, ನಮ್ಮ ಬಾಯಾರಿಕೆಗೆ ಮಜ್ಜಿಗೆ, ಲಿಂಬೆ ಪಾನಕ ಅಥವಾ ಪುದೀನಾ ಚಟ್ನಿ ನೆನಪಾಗುತ್ತದೆ. ಅಂಗಡಿಯಿಂದ ತರುವ ಪುದೀನಾ ಒಂದು ದಿನದಲ್ಲೇ ಬಾಡಿಹೋಗುತ್ತದೆ. ಯಾಕೆ ನೀವೇ ಸ್ವತಃ ಪುದೀನಾ ಬೆಳೆಯಬಾರದು? ನಮ್ಮ ದಿನನಿತ್ಯದ ಅಡುಗೆಯಲ್ಲಿ ಪುದೀನಾ, ಕೊತ್ತಂಬರಿಯಂತಹ ಸೊಪ್ಪುಗಳು ಇಲ್ಲದಿದ್ದರೆ ರುಚಿಯೇ ಬರುವುದಿಲ್ಲ. ಆದರೆ, ಮಾರುಕಟ್ಟೆಯಿಂದ ತಂದ ಸೊಪ್ಪುಗಳು ಫ್ರಿಡ್ಜ್‌ನಲ್ಲಿಟ್ಟರೂ ಮರುದಿನವೇ ಬಾಡಿಹೋಗುತ್ತವೆ. ಈ ಸಮಸ್ಯೆಗೆ ಬೆಸ್ಟ್ ಪರಿಹಾರವೆಂದರೆ, ಅವನ್ನು ನಿಮ್ಮ ಮನೆಯಲ್ಲೇ ಬೆಳೆಸುವುದು

ಆಶ್ಚರ್ಯಪಡಬೇಡಿ, ಇದಕ್ಕೆ ನೀವು ತೋಟಗಾರಿಕೆ ತಜ್ಞರಾಗಿರಬೇಕಿಲ್ಲ. ಸಣ್ಣ ಮಡಕೆ, ಸ್ವಲ್ಪ ಮಣ್ಣು, ನೀರು ಮತ್ತು ನಿಮ್ಮಲ್ಲಿರುವ ಅಲ್ಪ ಸ್ವಲ್ಪ ತಾಳ್ಮೆ ಇದ್ದರೆ ಸಾಕು, ನಿಮ್ಮ ಅಡುಗೆಮನೆಯ ಕಿಟಕಿಯಲ್ಲೇ ತಾಜಾ ಸೊಪ್ಪಿನ ತೋಟವನ್ನು ಸೃಷ್ಟಿಸಬಹುದು

ಹಂತ-ಹಂತದ ವಿಧಾನ (Step-by-Step Guide)

1.ಆರೋಗ್ಯಕರ ಕಾಂಡಗಳ ಆಯ್ಕೆ:ಅಂಗಡಿಯಿಂದ ತಂದ ಪುದೀನಾದಲ್ಲಿ ಹಸಿರಾಗಿರುವ ಹಾಗೂ ಸ್ವಲ್ಪ ದಪ್ಪವಿರುವ ಕಾಂಡಗಳನ್ನು ಆರಿಸಿ. ಅವುಗಳ ಕೆಳಭಾಗದ ಎಲೆಗಳನ್ನು ಕತ್ತರಿಸಿ, ಕೇವಲ ಮೇಲ್ಭಾಗದ ಎಲೆಗಳನ್ನು ಮಾತ್ರ ಉಳಿಸಿ.

2.ಅಲೋವೆರಾ ಮ್ಯಾಜಿಕ್ (ಬೇರು ಬಿಡಲು):ಕಾಂಡವನ್ನು ಮಣ್ಣಿಗೆ ನೆಡುವ ಮೊದಲು, ಅದರ ಕೆಳಭಾಗವನ್ನು ತಾಜಾ ಅಲೋವೆರಾ ಜೆಲ್‌ನಲ್ಲಿ ಅದ್ದಿ. ಅಲೋವೆರಾ ನೈಸರ್ಗಿಕ ರೂಟಿಂಗ್ ಹಾರ್ಮೋನ್ ಆಗಿ ಕೆಲಸ ಮಾಡುತ್ತದೆ. ಇದು ಬೇಗ ಬೇರು ಬಿಡಲು ಸಹಾಯ ಮಾಡುತ್ತದೆ ಮತ್ತು ಗಿಡಕ್ಕೆ ಸೋಂಕು ತಾಗದಂತೆ ತಡೆಯುತ್ತದೆ.

3.ಮಣ್ಣಿನ ಮಿಶ್ರಣ ಹೇಗಿರಬೇಕು?:50% ಸಾಮಾನ್ಯ ಮಣ್ಣು, 30% ಕೋಕೋ ಪೀಟ್ (Coco Peat) ಮತ್ತು 20% ಸಾವಯವ ಗೊಬ್ಬರವನ್ನು ಸೇರಿಸಿ ಮಿಶ್ರಣ ಮಾಡಿ.ಪುದೀನಾಗೆ ಮಣ್ಣಿನಲ್ಲಿ ತೇವಾಂಶ ಇರಬೇಕು, ಆದರೆ ನೀರು ನಿಲ್ಲಬಾರದು. ಕುಂಡದ ತಳಭಾಗದಲ್ಲಿ ನೀರಿನ ಬಸಿದು ಹೋಗಲು ಸಣ್ಣ ರಂಧ್ರಗಳಿವೆಯೇ ಎಂದು ಖಚಿತಪಡಿಸಿಕೊಳ್ಳಿ.

4.ನೆಡುವ ವಿಧಾನ:ಸಿದ್ಧಪಡಿಸಿದ ಮಣ್ಣಿನ ಕುಂಡದಲ್ಲಿ 2-3 ಇಂಚು ಆಳಕ್ಕೆ ಕಾಂಡವನ್ನು ನೆಡಿ. ಒಮ್ಮೆ ನೀರು ಹಾಕಿ, ಗಿಡವನ್ನು ನೇರ ಬಿಸಿಲಿನಲ್ಲಿ ಇಡಬೇಡಿ.

ನಿರ್ವಹಣೆ ಹೇಗೆ? (Pro-Tips)

ಬಿಸಿಲಿನ ಪ್ರಮಾಣ: ಪುದೀನಾ ಅತಿಯಾದ ಬಿಸಿಲಿಗೆ ಬಾಡಿಹೋಗುತ್ತದೆ. ಪ್ರತಿದಿನ ಬೆಳಿಗ್ಗೆ ಅಥವಾ ಸಂಜೆಯ ಬಿಸಿಲು ಬೀಳುವ ಜಾಗದಲ್ಲಿ ಕುಂಡವಿಡಿ. ಮಧ್ಯಾಹ್ನದ ಕಠಿಣ ಬಿಸಿಲು ಗಿಡಕ್ಕೆ ಬೇಡ.

ನೀರಿನ ನಿರ್ವಹಣೆ: ಮಣ್ಣು ಒಣಗಿದಂತೆ ಕಂಡುಬಂದಾಗ ಮಾತ್ರ ನೀರು ಸಿಂಪಡಿಸಿ. ಅತಿಯಾಗಿ ನೀರು ಹಾಕಿದರೆ ಕಾಂಡ ಕೊಳೆತು ಹೋಗುತ್ತದೆ.

ಗಿಡ ಕತ್ತರಿಸುವುದು (Pruning): ಗಿಡ ಬೆಳೆದಂತೆಲ್ಲಾ ಮೇಲ್ಭಾಗದ ಎಲೆಗಳನ್ನು ಕತ್ತರಿಸುತ್ತಾ ಬನ್ನಿ. ಹೀಗೆ ಮಾಡುವುದರಿಂದ ಗಿಡ ಪಕ್ಕಕ್ಕೆ ಅಗಲವಾಗಿ ಬೆಳೆದು ಹೆಚ್ಚು ಎಲೆಗಳನ್ನು ನೀಡುತ್ತದೆ.

ಗೊಬ್ಬರದ ಅವಶ್ಯಕತೆ: ಗಿಡ ಚಿಗುರಿದ 15-20 ದಿನಗಳ ನಂತರ, ಸಣ್ಣ ಪ್ರಮಾಣದಲ್ಲಿ ವರ್ಮಿಕಾಂಪೋಸ್ಟ್ ಅಥವಾ ಮನೆಬಳಕೆಯ ಈರುಳ್ಳಿ ಸಿಪ್ಪೆಯ ಗೊಬ್ಬರವನ್ನು ಹಾಕಬಹುದು.

3-4 ವಾರಗಳಲ್ಲಿ ಪುದೀನಾ ಎಲೆಗಳು ದೊಡ್ಡದಾಗುತ್ತವೆ. ಆಗ ಅಗತ್ಯವಿರುವಂತೆ ಎಲೆಗಳನ್ನು ಕೊಯ್ದು ಬಳಸಬಹುದು