ಪ್ರಮುಖ ಅಂತರರಾಷ್ಟ್ರೀಯ ವಾಹನ ತಯಾರಿಕಾ ದಿಗ್ಗಜ ಜಿಎಮ್ (General Motors ) ಡೆಟ್ರಾಯಿಟ್‌ನಲ್ಲಿರುವ ತನ್ನ ಪ್ರಮುಖ ಅಸೆಂಬ್ಲಿ ಘಟಕದಲ್ಲಿ ತೆಗೆದುಕೊಂಡಿರುವ ಒಂದು ಸಂಚಲನಕಾರಿ ನಿರ್ಧಾರ ತೀವ್ರ ವಿವಾದಕ್ಕೆ ಕಾರಣವಾಗಿದೆ.
ಅಮೆರಿಕದ ವಾಹನ ತಯಾರಿಕಾ ಸಂಸ್ಥೆಯಾದ ಜನರಲ್ ಮೋಟಾರ್ಸ್ (GM) ತನ್ನ Factory ZERO ಘಟಕದಲ್ಲಿ 1,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿ, ಅವರ ಸ್ಥಾನದಲ್ಲಿ 50 ‘ಕೋಬೋಟ್ಸ್’ (Collaborative Robots) ಗಳನ್ನು ನಿಯೋಜಿಸಿದೆ. ವಾಹನಗಳ ಅಸೆಂಬ್ಲಿ ಲೈನ್‌ನಲ್ಲಿ ಬಾಡಿ ಪ್ಯಾನೆಲ್‌ಗಳನ್ನು ಅಳವಡಿಸುವ ಕಾರ್ಯಗಳಲ್ಲಿ ಈ ರೋಬೋಗಳು ಉಳಿದ ಉದ್ಯೋಗಿಗಳೊಂದಿಗೆ ಸೇರಿ ಕೆಲಸ ಮಾಡುತ್ತಿವೆ.
ಉತ್ಪಾದನಾ ವೆಚ್ಚವನ್ನು ಕಡಿಮೆ ಮಾಡುವುದರ ಜೊತೆಗೆ ಸುರಕ್ಷತೆ ಮತ್ತು ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಈ ಕ್ರಮಗಳನ್ನು ಕೈಗೊಂಡಿರುವುದಾಗಿ ಜಿಎಮ್ ಆಡಳಿತ ಮಂಡಳಿ ತಿಳಿಸಿದೆ. ಆದರೆ, ಉದ್ಯೋಗ ಕಡಿತದ ನಂತರ ರೋಬೋಗಳನ್ನು ಪರಿಚಯಿಸಿರುವ ಕ್ರಮವನ್ನು ಕಾರ್ಮಿಕ ಸಂಘಗಳು ತೀವ್ರವಾಗಿ ವಿರೋಧಿಸುತ್ತಿವೆ.
United Auto Workers (UAW) ಸ್ಥಳೀಯ ಘಟಕ 22ರ ಅಧ್ಯಕ್ಷ James Cotton ಪ್ರತಿಕ್ರಿಯಿಸಿ, “ರೋಬೋಗಳು ಕಾರ್ಮಿಕರ ಉದ್ಯೋಗಗಳನ್ನು ಕಸಿದುಕೊಳ್ಳುತ್ತಿವೆ. ನಮ್ಮ ಸದಸ್ಯರ ಉದ್ಯೋಗವನ್ನು ರಕ್ಷಿಸುವ ಅಗತ್ಯವಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇದರ ನಡುವೆ, ಎಲೆಕ್ಟ್ರಿಕ್ ವಾಹನಗಳ ಬೇಡಿಕೆ ನಿಧಾನಗೊಂಡಿರುವ ಹಿನ್ನೆಲೆಯಲ್ಲಿ ಜಿಎಮ್ ಸ್ವಯಂಚಾಲಿತ ತಂತ್ರಜ್ಞಾನ (Automation) ಕಡೆ ಹೆಚ್ಚು ಗಮನ ಹರಿಸುತ್ತಿರುವುದಾಗಿ ತಿಳಿದುಬಂದಿದೆ. ಇದೇ ವೇಳೆ, 2026ರ ಮೊದಲ ತ್ರೈಮಾಸಿಕದಲ್ಲಿ ಸಂಸ್ಥೆ 4.25 ಬಿಲಿಯನ್ ಡಾಲರ್‌ಗಳ ಲಾಭ ದಾಖಲಿಸಿರುವುದು ಗಮನಾರ್ಹವಾಗಿದೆ.
