ಗಣೇಶ ಚತುರ್ಥಿಯಂದು ಚಂದ್ರನನ್ನು ಯಾಕೆ ನೋಡಬಾರದು? ನೋಡಿದರೆ ಪರಿಹಾರವೇನು ತಿಳಿಯಿರಿ

ಬೆಂಗಳೂರು: ಗಣೇಶ ಚತುರ್ಥಿ ಎಂದರೆ ಗಣಪತಿ ಆರಾಧನೆಯ ಜೊತೆಗೆ ಹಲವು ಪೌರಾಣಿಕ ನಂಬಿಕೆಗಳು ಮತ್ತು ಸಂಪ್ರದಾಯಗಳಿಗೂ ಮಹತ್ವವಿದೆ. ಈ ಪೈಕಿ ಗಣೇಶ ಚತುರ್ಥಿಯಂದು ಚಂದ್ರನನ್ನು ನೋಡಬಾರದು ಎಂಬ ನಂಬಿಕೆಯೂ ಪ್ರಮುಖವಾಗಿದೆ. ಈ ದಿನ ಚಂದ್ರನ ದರ್ಶನ ಮಾಡಿದರೆ ‘ಮಿಥ್ಯ ದೋಷ’ ಉಂಟಾಗಿ, ಮಾಡದ ತಪ್ಪಿಗೂ ಸುಳ್ಳು ಆರೋಪ ಅಥವಾ ಅಪವಾದ ಎದುರಾಗಬಹುದು ಎಂಬ ನಂಬಿಕೆ ಇದೆ.

ಚಂದ್ರನನ್ನು ಯಾಕೆ ನೋಡಬಾರದು?

ಹಿಂದೂ ಪೌರಾಣಿಕ ನಂಬಿಕೆಗಳ ಪ್ರಕಾರ, ಭಾದ್ರಪದ ಶುಕ್ಲ ಚತುರ್ಥಿಯಂದು ಚಂದ್ರನನ್ನು ನೋಡುವುದರಿಂದ ಮಿಥ್ಯ ದೋಷ ಉಂಟಾಗುತ್ತದೆ ಎನ್ನಲಾಗುತ್ತದೆ. ಇದರ ಪರಿಣಾಮವಾಗಿ ವ್ಯಕ್ತಿ ತಾನು ಮಾಡದ ತಪ್ಪಿಗೂ ನಿಂದನೆ, ಅಪವಾದ ಅಥವಾ ಸುಳ್ಳು ಆರೋಪ ಎದುರಿಸಬೇಕಾಗಬಹುದು ಎಂಬ ನಂಬಿಕೆ ಇದೆ. ಇದರ ಹಿಂದೆ ಗಣೇಶ ಮತ್ತು ಚಂದ್ರನಿಗೆ ಸಂಬಂಧಿಸಿದ ಪೌರಾಣಿಕ ಕಥೆಯಿದೆ.

ಗಣೇಶನನ್ನು ನೋಡಿ ಚಂದ್ರ ನಕ್ಕಿದ್ದೇಕೆ?

ದಂತಕಥೆಯ ಪ್ರಕಾರ, ಗಣೇಶನು ಭಕ್ತರು ಅರ್ಪಿಸಿದ ಮೋದಕಗಳನ್ನು ಸ್ವೀಕರಿಸಿ ತನ್ನ ವಾಹನವಾದ ಇಲಿಯ ಮೇಲೆ ಕುಳಿತು ಸಾಗುತ್ತಿದ್ದನು. ದಾರಿಯಲ್ಲಿ ಹಾವು ಕಾಣಿಸಿಕೊಂಡಾಗ ಇಲಿ ಹೆದರಿ ಓಡಿತು. ಪರಿಣಾಮ ಗಣೇಶ ಕೆಳಗೆ ಬಿದ್ದಿದ್ದು, ಹೊಟ್ಟೆಯಲ್ಲಿದ್ದ ಮೋದಕಗಳೂ ಕೆಳಗೆ ಬಿದ್ದವು.

ಗಣೇಶನು ಮೋದಕಗಳನ್ನು ಮತ್ತೆ ತೆಗೆದುಕೊಂಡು ತನ್ನ ಹೊಟ್ಟೆಯನ್ನು ಅದೇ ಹಾವಿನಿಂದ ಕಟ್ಟಿಕೊಂಡನು. ಈ ದೃಶ್ಯವನ್ನು ನೋಡಿದ ಚಂದ್ರನು ಗಣೇಶನನ್ನು ನೋಡಿ ನಕ್ಕು ಅಣಕಿಸಿದನೆಂದು ಪೌರಾಣಿಕ ಕಥೆ ಹೇಳುತ್ತದೆ.

ಚಂದ್ರನಿಗೆ ಗಣೇಶನ ಶಾಪ

ಚಂದ್ರನ ವರ್ತನೆಯಿಂದ ಕೋಪಗೊಂಡ ಗಣೇಶನು, ತನ್ನನ್ನು ನೋಡುವವರು ಸುಳ್ಳು ಆರೋಪ ಮತ್ತು ಅಪವಾದಕ್ಕೆ ಗುರಿಯಾಗಲಿ ಎಂದು ಶಾಪ ನೀಡಿದನೆಂದು ನಂಬಲಾಗಿದೆ. ಬಳಿಕ ತನ್ನ ತಪ್ಪನ್ನು ಅರಿತ ಚಂದ್ರನು ಗಣೇಶನಲ್ಲಿ ಕ್ಷಮೆಯಾಚಿಸಿದನು. ದೇವತೆಗಳ ಮನವಿಯ ನಂತರ ಗಣೇಶನು ಶಾಪದ ತೀವ್ರತೆಯನ್ನು ಕಡಿಮೆ ಮಾಡಿದನೆಂದು ದಂತಕಥೆ ಹೇಳುತ್ತದೆ.

ಆಕಸ್ಮಿಕವಾಗಿ ಚಂದ್ರನನ್ನು ನೋಡಿದರೆ ಏನು ಮಾಡಬೇಕು?

ಗಣೇಶ ಚತುರ್ಥಿಯಂದು ತಿಳಿಯದೆ ಚಂದ್ರನನ್ನು ನೋಡಿದರೆ ಭಯಪಡುವ ಅಗತ್ಯವಿಲ್ಲ. ಧಾರ್ಮಿಕ ಸಂಪ್ರದಾಯದ ಪ್ರಕಾರ, ಶ್ರೀಕೃಷ್ಣನ ಸ್ಯಮಂತಕ ಮಣಿ ಕಥೆಯನ್ನು ಓದುವುದು ಅಥವಾ ಕೇಳುವುದು ಹಾಗೂ ಗಣೇಶನನ್ನು ಭಕ್ತಿಯಿಂದ ಸ್ಮರಿಸುವುದು ಪರಿಹಾರವಾಗಿ ಆಚರಿಸಲಾಗುತ್ತದೆ.

ಕೆಲವು ಸಂಪ್ರದಾಯಗಳಲ್ಲಿ ಸ್ಯಮಂತಕ ಮಣಿ ಕಥೆಗೆ ಸಂಬಂಧಿಸಿದ ಶ್ಲೋಕವನ್ನು ಪಠಿಸಿ ಬಳಿಕ ನೀರು ಕುಡಿಯುವ ಪದ್ಧತಿಯೂ ಇದೆ. ಆದರೆ ಈ ಧಾರ್ಮಿಕ ಪರಿಹಾರಗಳಿಗೆ ವೈಜ್ಞಾನಿಕ ಆಧಾರವಿಲ್ಲ ಎಂಬುದನ್ನು ಗಮನಿಸಬೇಕು.

ಈ ಕಥೆಯ ಸಂದೇಶವೇನು?

ಗಣೇಶ ಮತ್ತು ಚಂದ್ರನ ಈ ಕಥೆ ಕೇವಲ ಚಂದ್ರನನ್ನು ನೋಡಬಾರದು ಎಂಬ ನಂಬಿಕೆಗೆ ಸೀಮಿತವಾಗಿಲ್ಲ. ಅಹಂಕಾರದಿಂದ ಇತರರನ್ನು ಅವಮಾನಿಸಬಾರದು ಹಾಗೂ ವ್ಯಕ್ತಿಯ ಬಾಹ್ಯ ರೂಪವನ್ನು ಆಧರಿಸಿ ಗೇಲಿ ಮಾಡಬಾರದು ಎಂಬ ನೈತಿಕ ಸಂದೇಶವನ್ನೂ ಈ ಕಥೆ ನೀಡುತ್ತದೆ ಎಂದು ಭಕ್ತರು ನಂಬುತ್ತಾರೆ.

ಚಂದ್ರನನ್ನು ಆಕಸ್ಮಿಕವಾಗಿ ನೋಡಿದರೆ ಪರಿಹಾರವೇನು?

·       ಅನಾಹುತವಾಗಿ ಅಂದು ಚಂದ್ರನನ್ನು ನೋಡಿದರೆ ಶ್ರೀಕೃಷ್ಣನಿಗೆ ಸಂಬಂಧಿಸಿದ ಸ್ಯಮಂತಕ ರತ್ನದ ಕಥೆಯನ್ನು (Syamantakopakhyana) ಕೇಳಬೇಕು ಅಥವಾ ಓದಬೇಕು.

·         ದ್ವಾಪರ ಯುಗದಲ್ಲಿ ಸ್ವತಃ ಶ್ರೀಕೃಷ್ಣನೇ ಗಣೇಶ ಚತುರ್ಥಿಯಂದು ಚಂದ್ರನನ್ನು ನೋಡಿ, ತರುವಾಯ ಸ್ಯಮಂತಕ ಮಣಿಯನ್ನು ಕದ್ದ ಕಳಂಕವನ್ನು (ಅಪವಾದ) ಎದುರಿಸಬೇಕಾಗಿ ಬಂದಿತ್ತು.

·         ಆ ಅಪವಾದದಿಂದ ಮುಕ್ತಿ ಪಡೆಯಲು ಕೃಷ್ಣನು ಈ ಕಥೆಯನ್ನು ಕೇಳಿದನು.

·         ಆಕಸ್ಮಿಕವಾಗಿ ಚಂದ್ರದರ್ಶನವಾದರೆ ಗಣೇಶನನ್ನು ಭಕ್ತಿಯಿಂದ ಪ್ರಾರ್ಥಿಸಿ, ಕ್ಷಮೆ ಯಾಚಿಸಿ ಈ ಪುರಾಣ ಕಥೆಯನ್ನು ಆಲಿಸುವುದರಿಂದ ದೋಷ ನಿವಾರಣೆಯಾಗುತ್ತದೆ.