ಚೀನಾದ ಲ್ಯಾಂಜೌ ನಗರದಲ್ಲಿ ಮಹಿಳೆಯೊಬ್ಬರ ಸಣ್ಣ ಮರೆವು ಇಡೀ ವಸತಿ ಸಂಕೀರ್ಣವನ್ನೇ ಹಿಮದ ಕ್ರೀಡಾಂಗಣವನ್ನಾಗಿ ಬದಲಿಸಿದ ವಿಚಿತ್ರ ಘಟನೆ ನಡೆದಿದೆ. ಮೈನಸ್ 8 ಡಿಗ್ರಿ ಸೆಲ್ಸಿಯಸ್ ಚಳಿಯಿರುವಾಗ ಸೋಲಾರ್ ವಾಟರ್ ಹೀಟರ್ ನಲ್ಲಿ ಆಫ್ ಮಾಡಲು ಮರೆತಿದ್ದೇ ಈ ಎಲ್ಲಾ ಅವಾಂತರಕ್ಕೆ ಕಾರಣವಾಗಿದೆ. ಈ ಘಟನೆಯ ವಿಡಿಯೋ ಈಗ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.
ಒಂಬತ್ತು ಗಂಟೆಗಳ ಕಾಲ ಹರಿದ ನೀರು ವಾಂಗ್ ಎಂಬ ಮಹಿಳೆ ರಾತ್ರಿ ಸ್ನಾನ ಮಾಡಿದ ನಂತರ ಸೋಲಾರ್ ವಾಟರ್ ಹೀಟರ್ನ ನಲ್ಲಿಯನ್ನು ಆಫ್ ಮಾಡಲು ಮರೆತಿದ್ದರು. ರಾತ್ರಿಯಿಡೀ ಅಂದರೆ ಸುಮಾರು ಒಂಬತ್ತು ಗಂಟೆಗಳ ಕಾಲ ನೀರು ನಿರಂತರವಾಗಿ ಟ್ಯಾಂಕ್ನಿಂದ ಹೊರಕ್ಕೆ ಹರಿದಿದೆ. ಹೊರಗಡೆ ತಾಪಮಾನ ಮೈನಸ್ 8 ಡಿಗ್ರಿ ಇದ್ದ ಕಾರಣ, ಹರಿದ ನೀರು ರಸ್ತೆಯ ಮೇಲೆ ಬಿದ್ದ ತಕ್ಷಣ ಗಡ್ಡೆಯಾಗಿ ಹೆಪ್ಪುಗಟ್ಟಿದೆ. ಬೆಳಿಗ್ಗೆ ಜನರು ಎದ್ದು ನೋಡುವಷ್ಟರಲ್ಲಿ ಇಡೀ ಬಡಾವಣೆಯ ರಸ್ತೆಗಳು ಐಸ್ ಸ್ಕೇಟಿಂಗ್ ರಿಂಕ್ನಂತೆ ಮಾರ್ಪಟ್ಟಿದ್ದವು.
ತಂದೆಗೆ ಕಾದಿತ್ತು ಶಾಕ್ ಬೆಳಿಗ್ಗೆ 6 ಗಂಟೆಗೆ ವಾಂಗ್ ಅವರ ತಂದೆ ವ್ಯಾಯಾಮಕ್ಕಾಗಿ ಹೊರಬಂದಾಗ ರಸ್ತೆಯಲ್ಲಾ ಐಸ್ ಆವರಿಸಿರುವುದನ್ನು ಕಂಡು ದಂಗಾಗಿದ್ದಾರೆ. ಮೊದಲು ಇದು ಬೇರೆಯವರ ಮನೆಯಿಂದ ಬಂದ ನೀರು ಎಂದು ಭಾವಿಸಿದ್ದ ಅವರು, ನಂತರ ಇದು ತಮ್ಮದೇ ಮನೆಯ ಸೋಲಾರ್ ಟ್ಯಾಂಕ್ನಿಂದ ಹರಿಯುತ್ತಿದೆ ಎಂದು ತಿಳಿದು ಮುಜುಗರಕ್ಕೊಳಗಾಗಿದ್ದಾರೆ. ಮಗಳ ಬೇಜವಾಬ್ದಾರಿ ತನಕ್ಕೆ ಅವರು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ ಎನ್ನಲಾಗಿದೆ.
ನಗರದಲ್ಲಿ ಉಪ್ಪಿನ ಅಭಾವ ರಸ್ತೆಯ ಮೇಲಿನ ಐಸ್ ಕರಗಿಸಲು ವಾಂಗ್ ಅವರ ಕುಟುಂಬ ತಕ್ಷಣವೇ ಕಾರ್ಯಪ್ರವೃತ್ತವಾಯಿತು. ರಸ್ತೆಯ ಮೇಲಿನ ಹಿಮವನ್ನು ಕರಗಿಸಲು ಅವರ ತಾಯಿ ಸಮೀಪದ ಎಲ್ಲಾ ಅಂಗಡಿಗಳಲ್ಲಿದ್ದ ಉಪ್ಪನ್ನು ಖರೀದಿಸಿ ತಂದರು. ಎಷ್ಟು ಪ್ರಮಾಣದ ಉಪ್ಪು ಬಳಸಲಾಯಿತೆಂದರೆ ಆ ಬಡಾವಣೆಯ ಅಂಗಡಿಗಳಲ್ಲಿ ಉಪ್ಪೇ ಖಾಲಿಯಾಗಿತ್ತು. ನಂತರ ವಾಂಗ್ ಮತ್ತು ಅವರ ತಂದೆ ಸ್ಥಳೀಯ ಸಿಬ್ಬಂದಿಯೊಂದಿಗೆ ಸೇರಿ ರಸ್ತೆಯನ್ನು ಸ್ವಚ್ಛಗೊಳಿಸಿದರು. ಅದೃಷ್ಟವಶಾತ್ ಈ ಘಟನೆಯಿಂದ ಯಾರಿಗೂ ಗಾಯಗಳಾಗಿಲ್ಲ.
ಮಹಿಳೆಯ ಕ್ಷಮೆಯಾಚನೆ ತನ್ನ ತಪ್ಪಿನಿಂದ ನೆರೆಹೊರೆಯವರಿಗೆ ಆದ ತೊಂದರೆಗೆ ವಾಂಗ್ ವಿಡಿಯೋ ಮೂಲಕ ಬಹಿರಂಗವಾಗಿ ಕ್ಷಮೆಯಾಚಿಸಿದ್ದಾರೆ. “ನನ್ನ ತಪ್ಪಿನಿಂದಾಗಿ ಇಂದು ಬೆಳಿಗ್ಗೆ ಯಾರಿಗಾದರೂ ಉಪ್ಪು ಖರೀದಿಸಲು ಸಾಧ್ಯವಾಗದಿದ್ದರೆ ಕ್ಷಮಿಸಿ, ಆ ಸ್ಕೇಟಿಂಗ್ ರಿಂಕ್ ನಿರ್ಮಿಸಿದವಳು ನಾನೇ” ಎಂದು ಅವರು ಹೇಳಿಕೊಂಡಿದ್ದಾರೆ. ಕಡು ಚಳಿಯ ಸಮಯದಲ್ಲಿ ಗೃಹೋಪಯೋಗಿ ಉಪಕರಣಗಳ ಬಗ್ಗೆ ಎಷ್ಟು ಎಚ್ಚರಿಕೆಯಿಂದ ಇರಬೇಕು ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ.
