ಬೆಂಗಳೂರು: ದೇಶದ ಪ್ರಮುಖ ಇ-ಕಾಮರ್ಸ್ ದೈತ್ಯ ಹಾಗೂ ವಾಲ್ಮಾರ್ಟ್ಒಡೆತನದ ಫ್ಲಿಪ್ಕಾರ್ಟ್ ಇದೀಗ ಭಾರತದ ಆಹಾರ ವಿತರಣಾ ಮಾರುಕಟ್ಟೆಗೆ ಧುಮುಕಲು ಮಾಸ್ಟರ್ ಪ್ಲಾನ್ ರೂಪಿಸಿದೆ. ಮುಂದಿನ 30 ದಿನಗಳೊಳಗೆ (ಒಂದು ತಿಂಗಳಿನಲ್ಲಿ) ಈ ನೂತನ ಸೇವೆಯನ್ನು ಕಂಪನಿಯು ಪ್ರಾಯೋಗಿಕವಾಗಿ ರಾಜಧಾನಿ ಬೆಂಗಳೂರಿನಲ್ಲಿ ಆರಂಭಿಸಲಿದೆ ಎಂದು ವರದಿಗಳು ತಿಳಿಸಿವೆ.
ಪುಸ್ತಕಗಳ ಮಾರಾಟದಿಂದ ಪ್ರಯಾಣ ದಿನಸಿ ಮತ್ತು ಎಲೆಕ್ಟ್ರಾನಿಕ್ಸ್ ಕ್ಷೇತ್ರಗಳಲ್ಲಿ ಯಶಸ್ಸು ಕಂಡಿರುವ ಫ್ಲಿಪ್ಕಾರ್ಟ್, ಈಗ ಸ್ವಿಗ್ಗಿ ಮತ್ತು ಝೊಮ್ಯಾಟೋ ಆಳುತ್ತಿರುವ ಫುಡ್ ಡೆಲಿವರಿ ಸಾಮ್ರಾಜ್ಯಕ್ಕೆ ನೇರ ಸವಾಲು ಎಸೆಯಲು ಸಜ್ಜಾಗಿದೆ.
ಪ್ರತ್ಯೇಕ ಆ್ಯಪ್ ಅಥವಾ ONDC ಮೂಲಕ ಸೇವೆ?
ಫ್ಲಿಪ್ಕಾರ್ಟ್ ಗ್ರೂಪ್ನ ಸಿಇಒ ಕಲ್ಯಾಣ್ ಕೃಷ್ಣಮೂರ್ತಿ ಅವರ ಪ್ರಕಾರ, ಇ-ಕಾಮರ್ಸ್ ಪ್ಲಾಟ್ಫಾರ್ಮ್ನಲ್ಲಿ ಆಹಾರ ವಿತರಣೆಯು ಕಂಪನಿಯ ಮತ್ತೊಂದು ಪ್ರಮುಖ ಬೆಳವಣಿಗೆಯ ಹೆಜ್ಜೆಯಾಗಿದೆ.
ಪ್ರತ್ಯೇಕ ಆ್ಯಪ್: ಫುಡ್ ಡೆಲಿವರಿಗಾಗಿಯೇ ಪ್ರತ್ಯೇಕ ಆ್ಯಪ್ ಬಿಡುಗಡೆ ಮಾಡುವ ಕುರಿತು ಕಂಪನಿ ಆಲೋಚಿಸುತ್ತಿದೆ.
ONDC ಬೆಂಬಲ: ಸರ್ಕಾರದ ಬೆಂಬಲಿತ ‘ಓಪನ್ ನೆಟ್ವರ್ಕ್ ಫಾರ್ ಡಿಜಿಟಲ್ ಕಾಮರ್ಸ್’ (ONDC) ನೆಟ್ವರ್ಕ್ ಮೂಲಕವೂ ಗ್ರಾಹಕರಿಗೆ ಈ ಸೇವೆ ಸಿಗುವಂತೆ ತಂತ್ರ ರೂಪಿಸಲಾಗುತ್ತಿದೆ.
ಬೆಂಗಳೂರಿನಲ್ಲಿ ಗ್ರಾಹಕರ ಪ್ರತಿಕ್ರಿಯೆ ಮತ್ತು ಸೇವೆಯ ಯಶಸ್ಸನ್ನು ಪರೀಕ್ಷಿಸಿದ ನಂತರವೇ ದೇಶಾದ್ಯಂತ ವಿಸ್ತರಿಸುವ ಬಗ್ಗೆ ಅಂತಿಮ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ಸಿಇಒ ಸ್ಪಷ್ಟಪಡಿಸಿದ್ದಾರೆ.
ಪ್ರಸ್ತುತ ಭಾರತದ ಆಹಾರ ವಿತರಣಾ ಮಾರುಕಟ್ಟೆಯಲ್ಲಿ ಝೊಮ್ಯಾಟೊ ಶೇ. 57 ಹಾಗೂ ಸ್ವಿಗ್ಗಿ ಶೇ. 43ರಷ್ಟು ಪಾಲು ಹೊಂದಿವೆ. ಈ ತೀವ್ರ ಪೈಪೋಟಿ ನಡುವೆಯೂ ಫ್ಲಿಪ್ಕಾರ್ಟ್ ಮುಖ್ಯವಾಗಿ ‘Gen Z’ (ಇಂದಿನ ಯುವಜನತೆ) ಗ್ರಾಹಕರನ್ನು ತಲುಪಲು ಯೋಜಿಸಿದೆ.
ಯುವ ಪೀಳಿಗೆಯು ಫ್ಯಾಷನ್, ಬ್ಯೂಟಿ ಪ್ರಾಡಕ್ಟ್ಗಳ ಜೊತೆಗೆ ಪ್ರಯಾಣ ಮತ್ತು ಆಹಾರದ ಅನುಭವಗಳಿಗೆ ಹೆಚ್ಚು ಖರ್ಚು ಮಾಡುತ್ತಿರುವುದನ್ನು ಗಮನಿಸಿರುವ ಫ್ಲಿಪ್ಕಾರ್ಟ್, ಕೇವಲ ಬೆಲೆಯ ವಿಚಾರದಲ್ಲಿ ಸ್ಪರ್ಧಿಸದೆ ಉತ್ತಮ ಮೌಲ್ಯಯುತ ಸೇವೆ (Value Services) ನೀಡಲು ಮುಂದಾಗಿದೆ.
ಒಂದೆಡೆ ಹೊಸ ಉದ್ಯಮಕ್ಕೆ ಹೆಜ್ಜೆ ಇಡುತ್ತಿರುವ ಫ್ಲಿಪ್ಕಾರ್ಟ್ಗೆ ಮತ್ತೊಂದೆಡೆ ಕಾನೂನು ಸಂಕಷ್ಟ ಎದುರಾಗಿದೆ. ಆನ್ಲೈನ್ ಮಾರಾಟಗಾರರ ಒಕ್ಕೂಟವಾದ ‘ಫೋರಂ ಫಾರ್ ಇಂಟರ್ನೆಟ್ ರಿಟೇಲರ್ಸ್, ಸೆಲ್ಲರ್ಸ್ ಅಂಡ್ ಟ್ರೇಡರ್ಸ್ ಭಾರತೀಯ ಸ್ಪರ್ಧಾತ್ಮಕ ಆಯೋಗಕ್ಕೆ (CCI) ಫ್ಲಿಪ್ಕಾರ್ಟ್ ವಿರುದ್ಧ ದೂರು ನೀಡಿದೆ.
ಫ್ಲಿಪ್ಕಾರ್ಟ್ ತೆರಿಗೆ ವಂಚನೆಯ ಮೂಲಕ ಅಂದಾಜು ₹3,000 ಕೋಟಿ ನಿಧಿ ಸೃಷ್ಟಿಸಿಕೊಂಡು, ಸ್ವತಂತ್ರ ಸಣ್ಣ ಮಾರಾಟಗಾರರಿಗೆ ಧಕ್ಕೆಯಾಗುವಂತೆ ಭಾರಿ ರಿಯಾಯಿತಿಗಳನ್ನು ನೀಡುತ್ತಿದೆ ಹಾಗೂ ಮಾರುಕಟ್ಟೆಯಲ್ಲಿ ಅನುಚಿತ ಸ್ಪರ್ಧೆಯನ್ನು ಸೃಷ್ಟಿಸುತ್ತಿದೆ ಎಂದು ದೂರಿನಲ್ಲಿ ಗಂಭೀರ ಆರೋಪ ಮಾಡಲಾಗಿದೆ.
ಸದ್ಯ ಬೆಂಗಳೂರಿನಲ್ಲಿ ಫ್ಲಿಪ್ಕಾರ್ಟ್ ಫುಡ್ ಡೆಲಿವರಿ ಆ್ಯಪ್ ಬಿಡುಗಡೆಯ ಅಧಿಕೃತ ದಿನಾಂಕ ಘೋಷಣೆಯಾಗಬೇಕಿದ್ದು, ಸಿಲಿಕಾನ್ ಸಿಟಿಯ ಆಹಾರ ಪ್ರಿಯರಲ್ಲಿ ಕುತೂಹಲ ಹೆಚ್ಚಿಸಿದೆ.
