ತೂಕ ಇಳಿಸುವುದು ಒಂದು ಸವಾಲಾದರೆ, ಇಳಿಸಿದ ತೂಕವನ್ನು ದಶಕಗಳ ಕಾಲ ಕಾಪಾಡಿಕೊಳ್ಳುವುದು ಅಸಲಿ ಗೆಲುವು. ಚೆನ್ನೈ ಮೂಲದ ಫಿಟ್‌ನೆಸ್ ತರಬೇತುದಾರ ಮತ್ತು ‘ಕ್ವಾಡ್ ಫಿಟ್‌ನೆಸ್’ ಸಹ-ಸ್ಥಾಪಕ ರಾಜ್ ಗಣಪತ್ ಅವರು ಕಳೆದ 20 ವರ್ಷಗಳಿಂದ ತಾವು ಹೇಗೆ ಲೀನ್ ಮತ್ತು ಸ್ಟ್ರಾಂಗ್ ಆಗಿದ್ದೇವೆ ಎಂಬುದನ್ನು ಐದು ಸರಳ ಹವ್ಯಾಸಗಳ ಮೂಲಕ ವಿವರಿಸಿದ್ದಾರೆ.
ಅವರು ಹಂಚಿಕೊಂಡಿರುವ ಆ 5 ಸೂತ್ರಗಳು ಇಲ್ಲಿವೆ:
1. ಕ್ರಿಯಾಶೀಲ ಬೆಳಿಗ್ಗೆ, ಪ್ರಶಾಂತ ಸಂಜೆ: ರಾಜ್ ಅವರ ಪ್ರಕಾರ, ಬೆಳಿಗ್ಗೆ ಹೆಚ್ಚು ಕೆಲಸ ಮಾಡುವುದು ಮತ್ತು ಕಡಿಮೆ ತಿನ್ನುವುದು ಅವರ ಅಭ್ಯಾಸ. ಇದು ಅವರ ದೇಹದಲ್ಲಿ ‘ಕಾರ್ಟಿಸೋಲ್’ ಹಾರ್ಮೋನ್ ಮಟ್ಟವನ್ನು ಹೆಚ್ಚಿಸಿ ದಿನವಿಡೀ ಚಟುವಟಿಕೆಯಿಂದ ಇರುವಂತೆ ಮಾಡುತ್ತದೆ. ಸಂಜೆ ಕೆಲಸದ ಒತ್ತಡ ಕಡಿಮೆ ಮಾಡಿ, ಹೆಚ್ಚು ಆಹಾರ ಸೇವಿಸಿ ವಿಶ್ರಮಿಸುತ್ತಾರೆ. ಇದು ‘ಮೆಲಟೋನಿನ್’ ಸ್ರವಿಸಲು ಸಹಾಯ ಮಾಡಿ, ರಾತ್ರಿ ಬೇಗ ಮತ್ತು ಗಾಢ ನಿದ್ರೆ ಬರುವಂತೆ ಮಾಡುತ್ತದೆ.
2. ಪ್ರತಿ ಊಟದಲ್ಲೂ ಇರಲಿ ಪ್ರೋಟೀನ್: “ನಾನು ಕಳೆದ ಹಲವು ವರ್ಷಗಳಲ್ಲಿ ಪ್ರೋಟೀನ್ ಇಲ್ಲದ ಊಟ ಮಾಡಿದ್ದು ಬೆರಳೆಣಿಕೆಯಷ್ಟು ಮಾತ್ರ” ಎನ್ನುತ್ತಾರೆ ರಾಜ್. ಸಸ್ಯಾಹಾರವಿರಲಿ ಅಥವಾ ಮಾಂಸಾಹಾರವಿರಲಿ, ಪ್ರತಿ ಊಟದ ತಟ್ಟೆಯಲ್ಲೂ ಸ್ವಲ್ಪ ಪ್ರಮಾಣದ ಪ್ರೋಟೀನ್ ಇರುವುದನ್ನು ಅವರು ಖಚಿತಪಡಿಸಿಕೊಳ್ಳುತ್ತಾರೆ. ಇದು ಸ್ನಾಯುಗಳ ಬಲಕ್ಕೆ ಅತ್ಯಗತ್ಯ.
3. ದಿನಕ್ಕೆ 7 ಗಂಟೆಗಳ ನಿದ್ರೆ ಕಡ್ಡಾಯ: ನಿದ್ರೆಯ ವಿಷಯದಲ್ಲಿ ರಾಜ್ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ. ಒಂದು ವೇಳೆ ರಾತ್ರಿ 7 ಗಂಟೆ ನಿದ್ರೆ ಮಾಡಲು ಸಾಧ್ಯವಾಗದಿದ್ದರೆ, ಮಧ್ಯಾಹ್ನ ನಿದ್ರೆ ಮಾಡಿ ಆ ಕೋಟಾವನ್ನು ಪೂರೈಸುತ್ತಾರೆ. ಫಿಟ್‌ನೆಸ್‌ಗೆ ವಿಶ್ರಾಂತಿ ಅತಿ ಮುಖ್ಯ ಎನ್ನುವುದು ಅವರ ಅಭಿಪ್ರಾಯ.
4. ವಾರಕ್ಕೊಮ್ಮೆ ಶಕ್ತಿ ತರಬೇತಿ (Strength Training): ಕಳೆದ 20 ವರ್ಷಗಳಲ್ಲಿ ಅವರು ಒಂದೇ ಒಂದು ವಾರವೂ ಸ್ಟ್ರೆಂತ್ ಟ್ರೈನಿಂಗ್ ಮಿಸ್ ಮಾಡಿಲ್ಲ. ಇದು ಭರ್ಜರಿ ವರ್ಕೌಟ್ ಆಗಿರಬೇಕಿಲ್ಲ, ಬದಲಾಗಿ ಸ್ಕ್ವಾಟ್ಸ್ (Squats), ಪುಶ್-ಅಪ್ಸ್ ಮತ್ತು ಪುಲ್-ಅಪ್ಸ್‌ಗಳಂತಹ ಮೂಲಭೂತ ವ್ಯಾಯಾಮಗಳ ಮೂಲಕ ದೇಹದ ಶಕ್ತಿಯನ್ನು ಕಾಪಾಡಿಕೊಳ್ಳುತ್ತಾರೆ.
5. ತರಕಾರಿಗಳ ಮೇಲೆ ಪ್ರೀತಿ ಮತ್ತು ನಡಿಗೆ: ಇವರಿಗೆ ತರಕಾರಿ ತಿನ್ನುವುದು ಮತ್ತು ನಡೆಯುವುದು ಎಂದರೆ ಎಲ್ಲಿಲ್ಲದ ಆಸೆ. ಎಲ್ಲಿ ತರಕಾರಿ ಸಿಕ್ಕರೂ ಸೇವಿಸುತ್ತಾರೆ ಮತ್ತು ನಡೆಯಲು ಸಿಗುವ ಸಣ್ಣ ಅವಕಾಶವನ್ನೂ ಬಿಡುವುದಿಲ್ಲ. ಇದು ಅವರ ದೇಹದ ಚೇತರಿಕೆಗೆ (Recovery) ಮತ್ತು ದಿನವಿಡೀ ಕ್ರಿಯಾಶೀಲವಾಗಿರಲು ನೆರವಾಗುತ್ತದೆ.
“ಇವೇನೂ ಬ್ರಹ್ಮ ವಿದ್ಯೆಯಲ್ಲ, ಅತ್ಯಂತ ಸರಳ ಕ್ರಮಗಳು. ಆದರೆ ಇವುಗಳನ್ನು ನಿರಂತರವಾಗಿ ಪಾಲಿಸುವುದೇ ಮುಖ್ಯ. ಇಂದು ನೀವು ಮಾಡುವ ಸಣ್ಣ ಬದಲಾವಣೆ ಮುಂದಿನ ವರ್ಷದ ಅಂತ್ಯಕ್ಕೆ ನಿಮ್ಮನ್ನು ಹೊಸ ವ್ಯಕ್ತಿಯನ್ನಾಗಿ ಮಾಡುತ್ತದೆ” ಎಂದು ರಾಜ್ ಗಣಪತ್ ವಿಶ್ವಾಸದಿಂದ ಹೇಳುತ್ತಾರೆ.
