ದೆಹಲಿ ಮುತ್ತಿಗೆಗೆ ರೈತರ ಸಜ್ಜು : ಸಾವಿರಾರು ರೈತರ ದಂಡಯಾತ್ರೆ, ಶಂಭು ಗಡಿ ಬಂದ್ ; ಟ್ರಾಫಿಕ್ ಜಾಮ್

ದೇಶದ ರಾಜಧಾನಿ ದೆಹಲಿಯಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ. ಒಂದು ಕಡೆ CJP (ಕಾಕ್ರೋಚ್ ಜನತಾ ಪಾರ್ಟಿ) ಪ್ರತಿಭಟನೆಗಳು ಹಾಗೂ ‘ಚಲೋ ಸಂಸತ್’ ರ್ಯಾಲಿಗಳು ನಡೆಯುತ್ತಿದ್ದರೆ, ಮತ್ತೊಂದೆಡೆ ಭಾರತ–ಅಮೆರಿಕ ಮುಕ್ತ ವ್ಯಾಪಾರ ಒಪ್ಪಂದ (FTA) ವಿರೋಧಿಸಿ ಸಾವಿರಾರು ರೈತರು ದೆಹಲಿಯತ್ತ ಮೆರವಣಿಗೆ ನಡೆಸುತ್ತಿದ್ದಾರೆ.

ಪಂಜಾಬ್ ಮತ್ತು ಹರಿಯಾಣದಿಂದ ಸಾವಿರಾರು ರೈತರು ಟ್ರ್ಯಾಕ್ಟರ್‌ಗಳು ಹಾಗೂ ಇತರೆ ವಾಹನಗಳೊಂದಿಗೆ ದೆಹಲಿಯತ್ತ ಹೊರಟಿರುವ ಹಿನ್ನೆಲೆಯಲ್ಲಿ ಪಂಜಾಬ್–ಹರಿಯಾಣ ಗಡಿಯ ಶಂಭು ಗಡಿಯನ್ನು ಪೊಲೀಸರು ಮುಚ್ಚಿದ್ದಾರೆ. ಪಟಿಯಾಲಾ ಭಾಗದಿಂದ ಶಂಭು ಗಡಿಗೆ ಸಂಪರ್ಕಿಸುವ ಪ್ರಮುಖ ರಸ್ತೆಗಳಲ್ಲಿ ಬ್ಯಾರಿಕೇಡ್‌ಗಳನ್ನು ಅಳವಡಿಸಿ ವಾಹನ ಸಂಚಾರವನ್ನು ನಿರ್ಬಂಧಿಸಲಾಗಿದೆ.

FTA ವಿರೋಧಿಸಿ ರೈತರ ಆಕ್ರೋಶ

ಭಾರತ–ಅಮೆರಿಕ ಮುಕ್ತ ವ್ಯಾಪಾರ ಒಪ್ಪಂದ ಜಾರಿಯಾದರೆ ಅಮೆರಿಕದಿಂದ ಕೃಷಿ, ಹಾಲು ಹಾಗೂ ಕೋಳಿ ಉತ್ಪನ್ನಗಳ ಅಗ್ಗದ ಆಮದು ಭಾರತಕ್ಕೆ ಹೆಚ್ಚಾಗಲಿದ್ದು, ಇದರಿಂದ ದೇಶೀಯ ಕೃಷಿ ಮಾರುಕಟ್ಟೆಗೆ ಭಾರಿ ಹೊಡೆತ ಬೀಳಲಿದೆ ಎಂದು ರೈತ ಸಂಘಟನೆಗಳು ಆರೋಪಿಸಿವೆ.

ಅಗ್ಗದ ಆಮದುಗಳಿಂದ ಸ್ಥಳೀಯ ರೈತರು, ವಿಶೇಷವಾಗಿ ಸಣ್ಣ ಮತ್ತು ಅತಿಸಣ್ಣ ರೈತರ ಜೀವನೋಪಾಯಕ್ಕೆ ಸಂಕಷ್ಟ ಎದುರಾಗಲಿದೆ. ಜೊತೆಗೆ ಕನಿಷ್ಠ ಬೆಂಬಲ ಬೆಲೆ (MSP) ವ್ಯವಸ್ಥೆಯೂ ದುರ್ಬಲವಾಗುವ ಅಪಾಯವಿದೆ ಎಂದು ರೈತರು ಆತಂಕ ವ್ಯಕ್ತಪಡಿಸಿದ್ದಾರೆ. ಇದೇ ಕಾರಣಕ್ಕೆ ಕೇಂದ್ರ ಸರ್ಕಾರದ ಮೇಲೆ ಒತ್ತಡ ಹೇರಲು ಈ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ.

ಭಾರಿ ಪೊಲೀಸ್ ಬಂದೋಬಸ್ತ್

ಶಾಂತಿ ಮತ್ತು ಸುವ್ಯವಸ್ಥೆ ಕಾಪಾಡಲು ಶಂಭು ಗಡಿಯಲ್ಲಿ ಭಾರಿ ಸಂಖ್ಯೆಯ ಪೊಲೀಸ್ ಪಡೆಗಳನ್ನು ನಿಯೋಜಿಸಲಾಗಿದೆ. ರೈತರು ಗಡಿ ದಾಟದಂತೆ ಕಟ್ಟುನಿಟ್ಟಿನ ಭದ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ.ಕಿಸಾನ್ ಮಜ್ದೂರ್ ಮೋರ್ಚಾ, ಜಾಯಿಂಟ್ ಕಿಸಾನ್ ಮೋರ್ಚಾ ಹಾಗೂ ಭಾರತೀಯ ಕಿಸಾನ್ ಯೂನಿಯನ್ ಸೇರಿದಂತೆ ಹಲವು ರಾಷ್ಟ್ರೀಯ ರೈತ ಸಂಘಟನೆಗಳು ಈ ಪ್ರತಿಭಟನೆಯಲ್ಲಿ ಭಾಗವಹಿಸುತ್ತಿವೆ.

ದೆಹಲಿ ಟ್ರಾಫಿಕ್ ಸಲಹೆ

ಪ್ರತಿಭಟನೆಯ ಹಿನ್ನೆಲೆಯಲ್ಲಿ ದೆಹಲಿ ಪೊಲೀಸರು ಟ್ರಾಫಿಕ್ ಸಲಹೆ (Traffic Advisory) ಹೊರಡಿಸಿದ್ದು, ಕಿಸಾನ್ ಘಾಟ್, ಸತ್ಯಾಗ್ರಹ ಮಾರ್ಗ್, ವೆಲೋಡ್ರೋಮ್ ರಸ್ತೆ, ರಾಜ್‌ಘಾಟ್ DTC ಡಿಪೋ ರಸ್ತೆ ಹಾಗೂ ರಾಜ್‌ಘಾಟ್ ಬೈಪಾಸ್ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ವಾಹನ ಸಂಚಾರ ನಿಧಾನಗೊಳ್ಳುವ ಸಾಧ್ಯತೆ ಇದೆ ಎಂದು ತಿಳಿಸಿದ್ದಾರೆ. ಅಗತ್ಯವಿದ್ದರೆ ದೆಹಲಿ ಗೇಟ್, ರಾಜ್‌ಘಾಟ್ ಕ್ರಾಸಿಂಗ್, ಗುರುನಾನಕ್ ಚೌಕ್, ಶಾಂತಿವನ್ ಚೌಕ್, ರಾಜ್‌ಘಾಟ್ DTC ಡಿಪೋ ಹಾಗೂ IP ಫ್ಲೈಓವರ್ ಪ್ರದೇಶಗಳಲ್ಲಿ ಸಂಚಾರ ಮಾರ್ಗಗಳನ್ನು ತಾತ್ಕಾಲಿಕವಾಗಿ ಬದಲಾಯಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.

ವಿಮಾನ ನಿಲ್ದಾಣ ಹಾಗೂ ರೈಲು ನಿಲ್ದಾಣಗಳಿಗೆ ತೆರಳುವ ಪ್ರಯಾಣಿಕರು ಮುಂಚಿತವಾಗಿಯೇ ಹೊರಡಲು ಸೂಚಿಸಲಾಗಿದೆ. ಟ್ರಾಫಿಕ್ ಸಂಬಂಧಿತ ಮಾಹಿತಿಗಾಗಿ 1095 ಅಥವಾ 011-25844444 ಸಹಾಯವಾಣಿ ಸಂಖ್ಯೆಗೆ ಕರೆ ಮಾಡಬಹುದು. ಜೊತೆಗೆ 8750871493 ವಾಟ್ಸ್ಆಪ್ ಸಂಖ್ಯೆಯ ಮೂಲಕವೂ ಟ್ರಾಫಿಕ್ ಮಾಹಿತಿ ಪಡೆಯಬಹುದಾಗಿದೆ.