ಭಾರತೀಯ ಮನೆಗಳಲ್ಲಿ, ಅದರಲ್ಲೂ ಮುಖ್ಯವಾಗಿ ಒಬ್ಬರೇ ವಾಸಿಸುವ ಬ್ಯಾಚುಲರ್ಗಳಿಗೆ ಹಾಲಿನ ಪ್ಯಾಕೆಟ್ ಬಳಸುವುದು ಒಂದು ನಿತ್ಯದ ಸವಾಲು. ಪ್ಯಾಕೆಟ್ ಕತ್ತರಿಸಿ ಫ್ರಿಡ್ಜ್ನಲ್ಲಿಟ್ಟರೆ ಅದು ಪಕ್ಕಕ್ಕೆ ಬಾಗಿ ಹಾಲು ಸುರಿಯುವುದು ಸಾಮಾನ್ಯ. ಈ ‘ಬ್ಯಾಚುಲರ್ ಸಮಸ್ಯೆಗೆ’ ಪರಿಹಾರವಾಗಿ ಇಂಜಿನಿಯರಿಂಗ್ ವಿದ್ಯಾರ್ಥಿಯೊಬ್ಬ 3D ಪ್ರಿಂಟೆಡ್ ಹೋಲ್ಡರ್ ಒಂದನ್ನು ವಿನ್ಯಾಸಗೊಳಿಸಿದ್ದು, ಈಗ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ವಿದ್ಯಾರ್ಥಿಯ ‘ಇನ್ನೋವೇಶನ್’: ಇನ್ಸ್ಟಾಗ್ರಾಮ್ ಬಳಕೆದಾರರೊಬ್ಬರು “ನನ್ನ ಕಾಲೇಜು ಸಂಪನ್ಮೂಲಗಳನ್ನು ಬಳಸಿಕೊಳ್ಳುವ 12ನೇ ದಿನ” ಎಂಬ ಶೀರ್ಷಿಕೆಯಡಿ ಈ ವೀಡಿಯೊ ಹಂಚಿಕೊಂಡಿದ್ದಾರೆ. ಹಾಲಿನ ಪ್ಯಾಕೆಟ್ ಅನ್ನು ಕತ್ತರಿಸಿ ಇಟ್ಟಾಗ ಅದು ಸುರಿಯುವ ದೃಶ್ಯದೊಂದಿಗೆ ವೀಡಿಯೊ ಆರಂಭವಾಗುತ್ತದೆ. ಕೆನಡಾದಲ್ಲಿ ಹಾಲಿನ ಪ್ಯಾಕೆಟ್ಗಳಿಗಾಗಿ ಬಳಸುವ ಕಂಟೇನರ್ನಿಂದ ಪ್ರೇರಿತರಾದ ಈ ವಿದ್ಯಾರ್ಥಿ, ಭಾರತೀಯ ಹಾಲಿನ ಪ್ಯಾಕೆಟ್ಗಳಿಗೆ ಹೊಂದುವಂತೆ 3D ಪ್ರಿಂಟರ್ ಬಳಸಿ ಒಂದು ವಿಶೇಷ ಹೋಲ್ಡರ್ ತಯಾರಿಸಿದ್ದಾರೆ. “ಪ್ಯಾಕೆಟ್ ಅನ್ನು ಈ ಹೋಲ್ಡರ್ ಒಳಗೆ ಸಲೀಸಾಗಿ ತೂರಿಸಬಹುದು, ನಂತರ ಮೇಲೆ ಕತ್ತರಿಸಿ ಜಗ್ನಂತೆ ಸುಲಭವಾಗಿ ಬಳಸಬಹುದು” ಎಂದು ಅವರು ವಿವರಿಸಿದ್ದಾರೆ.
ನೆಟ್ಟಿಗರ ತಮಾಷೆಯ ಕಾಮೆಂಟ್ಸ್: ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಎರಡು ಭಾಗವಾಗಿ ವಿಭಜನೆಗೊಂಡಿದ್ದಾರೆ. ಕೆಲವರು ವಿದ್ಯಾರ್ಥಿಯ ಸೃಜನಶೀಲತೆಯನ್ನು ಮೆಚ್ಚಿದರೆ, ಇನ್ನು ಕೆಲವರು ಇದೊಂದು ‘ಓವರ್ ಇಂಜಿನಿಯರಿಂಗ್’ ಎಂದು ಕಾಲೆಳೆದಿದ್ದಾರೆ.
- ಒಬ್ಬ ಬಳಕೆದಾರರು, “ಅಲ್ಲಪ್ಪಾ, ನಿಮ್ಮ ಮನೇಲಿ ಸ್ಟೀಲ್ ಜಗ್ ಅಥವಾ ಪಾತ್ರೆ ಇಲ್ವಾ?” ಎಂದು ನೇರವಾಗಿ ಪ್ರಶ್ನಿಸಿದ್ದಾರೆ.
- ಇನ್ನೊಬ್ಬರು, “ಅಡುಗೆ ಮನೆಗೆ ಎಂದೂ ಹೋಗದವರು ಕಂಡುಹಿಡಿದ ಪರಿಹಾರವಿದು” ಎಂದು ತಮಾಷೆ ಮಾಡಿದ್ದಾರೆ.
- “ಸಮಸ್ಯೆಯೇ ಇಲ್ಲದ ಜಾಗದಲ್ಲಿ ನೀವು ಪರಿಹಾರ ಹುಡುಕುತ್ತಿದ್ದೀರಿ” ಎಂಬ ಕಾಮೆಂಟ್ ಕೂಡ ಗಮನ ಸೆಳೆದಿದೆ.
ತಂತ್ರಜ್ಞಾನವನ್ನು ಬಳಸಿ ಸಣ್ಣ ಸಮಸ್ಯೆಗೆ ದೊಡ್ಡ ಪರಿಹಾರ ಕಂಡುಕೊಂಡ ವಿದ್ಯಾರ್ಥಿಯ ಪ್ರಯತ್ನ ಒಂದು ಕಡೆಯಾದರೆ, ನಮ್ಮ ಸಾಂಪ್ರದಾಯಿಕ ಅಡುಗೆ ಮನೆಯ ಪಾತ್ರೆಗಳೇ ಸಾಕು ಎನ್ನುವ ವಾದ ಮತ್ತೊಂದು ಕಡೆ ಜೋರಾಗಿದೆ.
https://www.instagram.com/reel/DVrJoU-AbRC/?utm_source=ig_web_copy_link&igsh=NTc4MTIwNjQ2YQ==
