ಬೆಂಗಳೂರು: ಹಾಲು, ಮೊಸರು, ತುಪ್ಪ, ಬೆಣ್ಣೆ ಸೇರಿದಂತೆ ಅಗತ್ಯ ವಸ್ತುಗಳ ಬೆಲೆ ಏರಿಕೆಯ ಬೆನ್ನಲ್ಲೇ ಇದೀಗ ಖ್ಯಾತ ಎಂಟಿಆರ್ (MTR) ಹೋಟೆಲ್ ನಲ್ಲಿಯೂ ತಿಂಡಿ-ತಿನಿಸುಗಳ ದರ ಹೆಚ್ಚಳ ಮಾಡಲಾಗಿದೆ. ನವೆಂಬರ್ 8ರಿಂದ ಪರಿಷ್ಕೃತ ದರಗಳು ಜಾರಿಗೆ ಬರಲಿದ್ದು, ಹೋಟೆಲ್ ಗೆ ಭೇಟಿ ನೀಡುವ ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟಲಿದೆ.
ಆಹಾರ ಪದಾರ್ಥಗಳ ತಯಾರಿಕೆಗೆ ಅಗತ್ಯವಿರುವ ಹಾಲು ಮತ್ತು ಹಾಲಿನ ಉತ್ಪನ್ನಗಳ ಬೆಲೆ ಹೆಚ್ಚಳವಾಗಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎನ್ನಲಾಗಿದೆ. ಈಗಾಗಲೇ ರಾಜ್ಯದ ಹಲವು ಹೋಟೆಲ್‌ಗಳಲ್ಲಿ ಕಾಫಿ, ಟೀ ಹಾಗೂ ವಿವಿಧ ಆಹಾರ ಪದಾರ್ಥಗಳ ದರ ಹೆಚ್ಚಳ ಮಾಡಲಾಗಿದ್ದು, ಇದೀಗ ಎಂಟಿಆರ್ ಕೂಡ ದರ ಪರಿಷ್ಕರಣೆಯ ಹಾದಿ ಹಿಡಿದಿದೆ.
ಹೊಸ ದರದ ಪ್ರಕಾರ, ಒಂದು ಪ್ಲೇಟ್ ರೈಸ್ ಇಡ್ಲಿಗೆ 70 ರೂ., ವಡೆಗೆ 90 ರೂ., ಖಾರಾಬಾತ್ ಮತ್ತು ವೈಟ್ ಉಪ್ಮಾಗೆ ತಲಾ 125 ರೂ., ರವೆ ಇಡ್ಲಿಗೆ 125 ರೂ. ಹಾಗೂ ಬಿಸಿಬೇಳೆ ಬಾತ್ ಗೆ 150 ರೂ. ನಿಗದಿಪಡಿಸಲಾಗಿದೆ. ಖಾರಾ ಪೊಂಗಲ್ 130 ರೂ., ಶಾವಿಗೆ ಬಾತ್ 135 ರೂ., ಎರಡು ಪೂರಿಗೆ 145 ರೂ. ಮತ್ತು ಬೋಂಡಾ ಸೂಪ್‌ಗೆ 130 ರೂ. ದರ ನಿಗದಿಯಾಗಿದೆ.
ದೋಸೆ ಪ್ರಿಯರಿಗೂ ದರ ಏರಿಕೆಯ ಬಿಸಿ ತಟ್ಟಿದ್ದು, ಮಸಾಲೆ ದೋಸೆ 175 ರೂ., ಪ್ಲೇನ್ ದೋಸೆ 170 ರೂ., ರವೆ ದೋಸೆ 195 ರೂ. ಹಾಗೂ ರವೆ ಮಸಾಲೆ ಮತ್ತು ರವೆ ಈರುಳ್ಳಿ ದೋಸೆ ತಲಾ 200 ರೂ. ಆಗಿದೆ.
ಇನ್ನು ಕಾಫಿಗೆ 75 ರೂ., ಟೀಗೆ 70 ರೂ., ಹಾಲಿಗೆ 65 ರೂ. ನಿಗದಿಪಡಿಸಲಾಗಿದೆ. ಸಿಹಿ ತಿನಿಸುಗಳ ಪೈಕಿ ಕೇಸರಿ ಬಾತ್ 120 ರೂ., ಜಾಮೂನ್ 90 ರೂ. ಹಾಗೂ ಹಲ್ವಾ 120 ರೂ. ಆಗಿದೆ. ಎಂಟಿಆರ್ ವಿಶೇಷ ಊಟದ ದರವನ್ನು 390 ರೂ.ಗೆ ನಿಗದಿಪಡಿಸಲಾಗಿದೆ.
ಗ್ರಾಹಕರ ಜೇಬಿಗೆ ಹೆಚ್ಚುವರಿ ಹೊರೆ
ಹೋಟೆಲ್ ಗಳಲ್ಲಿ ತಿಂಡಿ ಸೇವಿಸುವುದು ಬಹುತೇಕರ ದೈನಂದಿನ ಜೀವನದ ಭಾಗವಾಗಿದೆ. ಆದರೆ, ಒಂದರ ಹಿಂದೆ ಒಂದರಂತೆ ಆಹಾರ ಪದಾರ್ಥಗಳ ದರ ಏರಿಕೆಯಾಗುತ್ತಿರುವುದರಿಂದ ಹೊರಗಡೆ ತಿಂಡಿ ತಿನ್ನುವ ವೆಚ್ಚ ಹೆಚ್ಚಾಗುತ್ತಿದೆ. ಕುಟುಂಬ ಸಮೇತ ಹೋಟೆಲ್‌ಗೆ ತೆರಳುವವರು, ವಾರಾಂತ್ಯದಲ್ಲಿ ಊಟ-ತಿಂಡಿಗೆ ಹೊರಡುವವರು ಹಾಗೂ ಕೆಲಸದ ನಿಮಿತ್ತ ಪ್ರತಿದಿನ ಹೋಟೆಲ್ ಅವಲಂಬಿಸುವವರು ಹೆಚ್ಚಿನ ಹಣ ವ್ಯಯಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.
ಒಂದೆಡೆ ದಿನಸಿ, ಹಾಲು, ತರಕಾರಿ, ಅಡುಗೆ ಅನಿಲ ಸೇರಿದಂತೆ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಕುಟುಂಬದ ಬಜೆಟ್ ಈಗಾಗಲೇ ಏರುಪೇರಾಗಿದೆ. ಮತ್ತೊಂದೆಡೆ ಹೋಟೆಲ್ ಆಹಾರ ಪದಾರ್ಥಗಳ ದರ ಹೆಚ್ಚಳವಾಗುತ್ತಿರುವುದು ಸಾಮಾನ್ಯ ಜನರ ಖರ್ಚಿನ ಮೇಲೆ ಹೆಚ್ಚುವರಿ ಒತ್ತಡ ಉಂಟುಮಾಡುತ್ತಿದೆ. ಬೆಲೆ ಏರಿಕೆಯ ಹಿನ್ನೆಲೆಯಲ್ಲಿ ಗ್ರಾಹಕರು ಹೋಟೆಲ್ ಗಳಲ್ಲಿ ಆಹಾರ ಸೇವಿಸುವ ಪ್ರಮಾಣ ಕಡಿಮೆ ಮಾಡಬೇಕಾದ ಅನಿವಾರ್ಯತೆಯೂ ಎದುರಾಗಬಹುದು.
ಉತ್ಪಾದನಾ ವೆಚ್ಚ, ಕಾರ್ಮಿಕರ ವೇತನ, ಬಾಡಿಗೆ ಮತ್ತು ಕಚ್ಚಾ ವಸ್ತುಗಳ ಬೆಲೆ ಏರಿಕೆಯಿಂದ ಹೋಟೆಲ್ ಉದ್ಯಮದ ಮೇಲೂ ಒತ್ತಡ ಹೆಚ್ಚುತ್ತಿದೆ. ಆದರೆ, ಇದರ ಪರಿಣಾಮ ಅಂತಿಮವಾಗಿ ಗ್ರಾಹಕರ ಜೇಬಿನ ಮೇಲೆಯೇ ಬೀಳುತ್ತಿರುವುದು ಗಮನಾರ್ಹವಾಗಿದೆ. ಹೀಗಾಗಿ ದಿನನಿತ್ಯದ ಜೀವನದಲ್ಲಿ ಆಹಾರ ಸೇವನೆಯೂ ದುಬಾರಿಯಾಗುತ್ತಿರುವುದು ಜನಸಾಮಾನ್ಯರಲ್ಲಿ ಆತಂಕ ಮೂಡಿಸಿದೆ.
ಸೂಚನೆ: ಈ ಸುದ್ದಿಯಲ್ಲಿನ ಎಂಟಿಆರ್ ಹೋಟೆಲ್‌ನ ತಿಂಡಿ-ತಿನಿಸುಗಳ ದರಗಳನ್ನು ಲಭ್ಯವಾದ ದರಪಟ್ಟಿಯ ಆಧಾರದ ಮೇಲೆ ಪ್ರಕಟಿಸಲಾಗಿದೆ. ದರಗಳು ನವೆಂಬರ್ 8, 2026ರಿಂದ ಜಾರಿಗೆ ಬರಲಿವೆ ಎಂದು ದರಪಟ್ಟಿಯಲ್ಲಿ ನಮೂದಿಸಲಾಗಿದೆ. ಹೋಟೆಲ್ ಆಡಳಿತ ಮಂಡಳಿಯ ಅಂತಿಮ ಪ್ರಕಟಣೆ ಅಥವಾ ಸ್ಥಳದಲ್ಲಿನ ದರಗಳಲ್ಲಿ ವ್ಯತ್ಯಾಸವಿದ್ದಲ್ಲಿ ಅದನ್ನು ಪರಿಗಣಿಸಬೇಕು. ಈ ವರದಿ ಮಾಹಿತಿ ನೀಡುವ ಉದ್ದೇಶ ಹೊಂದಿದ್ದು, ಯಾವುದೇ ವಾಣಿಜ್ಯ ಸಂಸ್ಥೆಯ ಪರ ಅಥವಾ ವಿರೋಧದ ಅಭಿಪ್ರಾಯವನ್ನು ಪ್ರತಿನಿಧಿಸುವುದಿಲ್ಲ.
