ದೆಹಲಿ ಪೊಲೀಸರ ವಿಶೇಷ ಘಟಕದ (Special Cell) 24 ವರ್ಷದ ಸ್ವಾಟ್ (SWAT) ಕಮಾಂಡೋ ಕಾಜಲ್ ಚೌಧರಿ ಅವರು ಮಂಗಳವಾರ ಗಾಜಿಯಾಬಾದ್ನ ಆಸ್ಪತ್ರೆಯಲ್ಲಿ ನಿಧನರಾದರು. ಐದು ದಿನಗಳ ಹಿಂದೆ ಅವರ ಪತಿ ಅಂಕುರ್ ಚೌಧರಿ ಎಂಬಾತ ಕಾಜಲ್ ಅವರ ಮೇಲೆ ಡಂಬ್ಬೆಲ್ನಿಂದ ಹಲ್ಲೆ ನಡೆಸಿ, ಅವರ ತಲೆಯನ್ನು ಬಾಗಿಲಿನ ಚೌಕಟ್ಟಿಗೆ ಬಡಿದಿದ್ದ ಎಂದು ಆರೋಪಿಸಲಾಗಿದೆ.
ವರದಕ್ಷಿಣೆ ಮತ್ತು ಇತರ ಕೌಟುಂಬಿಕ ವಿಚಾರಗಳ ಕುರಿತು ದಂಪತಿಗಳ ನಡುವೆ ವಾಗ್ವಾದ ನಡೆದ ನಂತರ ಈ ಘಟನೆ ಸಂಭವಿಸಿದೆ. ಹಲ್ಲೆ ನಡೆಸಿದ ನಂತರ ಅಂಕುರ್, ದೆಹಲಿ ಪೊಲೀಸ್ನಲ್ಲಿ ಕಾನ್ಸ್ಟೆಬಲ್ ಆಗಿರುವ ತನ್ನ ಭಾವ ನಿಖಿಲ್ ಅವರಿಗೆ ಕರೆ ಮಾಡಿ, ತಾನು ಕಾಜಲ್ನನ್ನು ಕೊಂದಿರುವುದಾಗಿ ತಿಳಿಸಿದ್ದ ಎಂದು ವರದಿಗಳು ತಿಳಿಸಿದೆ.
ನಿಖಿಲ್ ಅವರು ತಿಳಿಸಿರುವಂತೆ, ಜನವರಿ 22 ರಂದು ದಂಪತಿಗಳ ನಡುವೆ ತೀವ್ರ ಜಗಳ ನಡೆದಿತ್ತು. “ನನ್ನ ತಂಗಿ ಫೋನ್ ತೆಗೆದುಕೊಂಡು ಏನಾಯಿತು ಎಂದು ವಿವರಿಸಲು ಪ್ರಯತ್ನಿಸಿದಳು. ಅವಳು ಮಾಡಿದ ಕೆಲವು ಕಾಮೆಂಟ್ಗಳಿಂದ ಅಂಕುರ್ ಸಿಟ್ಟಾದನು. ಆತ ಫೋನ್ ಕಸಿದುಕೊಂಡು, ನಾನು ನಿನ್ನ ತಂಗಿಯನ್ನು ಕೊಲ್ಲಲಿದ್ದೇನೆ, ಈ ಸಂಭಾಷಣೆಯನ್ನು ಸಾಕ್ಷ್ಯವಾಗಿ ರೆಕಾರ್ಡ್ ಮಾಡಿಕೊ ಎಂದು ಹೇಳಿದನು. ನಂತರ ಆಕೆಯ ಕಿರುಚಾಟ ಕೇಳಿಸಿತು ಮತ್ತು ಕರೆ ಸ್ಥಗಿತಗೊಂಡಿತು,” ಎಂದು ನಿಖಿಲ್ ಹೇಳಿದ್ದಾರೆ.
ಹಲ್ಲೆಯ ನಂತರ ಅಂಕುರ್ ಕಾಜಲ್ ಅವರನ್ನು ಹತ್ತಿರದ ಆಸ್ಪತ್ರೆಗೆ ದಾಖಲಿಸಿದ್ದನು. ಅವರ ಸ್ಥಿತಿ ಹದಗೆಟ್ಟಾಗ, ಎರಡು ದಿನಗಳ ನಂತರ ಕುಟುಂಬದವರು ಅವರನ್ನು ಗಾಜಿಯಾಬಾದ್ನ ಆಸ್ಪತ್ರೆಗೆ ಸ್ಥಳಾಂತರಿಸಿದರು. ಆದರೆ ವೈದ್ಯರ ಶ್ರಮದ ಹೊರತಾಗಿಯೂ ಕಾಜಲ್ ಸಾವನ್ನಪ್ಪಿದರು. ದೆಹಲಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದಾಗಲೇ ವೈದ್ಯರು ಆಕೆಯನ್ನು ‘ಬ್ರೈನ್ ಡೆಡ್’ (ಮೆದುಳು ನಿಷ್ಕ್ರಿಯ) ಎಂದು ಘೋಷಿಸಿದ್ದರು ಎಂದು ನಿಖಿಲ್ ತಿಳಿಸಿದ್ದಾರೆ.
ತನಿಖೆ ಬಳಿಕ ಆರೋಪಿ ಅರೆಸ್ಟ್
ಮಂಗಳವಾರ ಶವಪರೀಕ್ಷೆ ನಡೆಸಲಾಗಿದ್ದು, ವರದಿಯ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.ರಕ್ಷಣಾ ಸಚಿವಾಲಯದಲ್ಲಿ ಕ್ಲರ್ಕ್ ಆಗಿ ಕೆಲಸ ಮಾಡುತ್ತಿದ್ದ ಆರೋಪಿ ಅಂಕುರ್ನನ್ನು ಘಟನೆ ನಡೆದ ರಾತ್ರಿಯೇ ಬಂಧಿಸಲಾಗಿದೆ. ಹರಿಯಾಣದ ಗನೌರ್ ಮೂಲದ ಈ ದಂಪತಿಗಳು ನವೆಂಬರ್ 2023 ರಲ್ಲಿ ವಿವಾಹವಾಗಿದ್ದರು ಮತ್ತು ಅವರಿಗೆ ಒಂದೂವರೆ ವರ್ಷದ ಮಗನಿದ್ದಾನೆ.
