E20 ಪೆಟ್ರೋಲ್ ಬಳಕೆಯಿಂದ ವಾಹನಗಳು ಹಾಳಾಗುತ್ತವೆ, ಎಂಜಿನ್ ಕಾರ್ಯಕ್ಷಮತೆ ಕುಸಿಯುತ್ತದೆ ಎಂಬ ರೀತಿಯ ಸುದ್ದಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಬೆನ್ನಲ್ಲೇ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ಗಡ್ಕರಿ (Nitin Gadkari) ಈ ಎಲ್ಲ ಆರೋಪಗಳನ್ನು ತಳ್ಳಿಹಾಕಿದ್ದಾರೆ. E20 ಇಂಧನದಿಂದ ಯಾವುದೇ ವಾಹನಕ್ಕೆ ಸಮಸ್ಯೆ ಉಂಟಾಗಿರುವ ದಾಖಲೆಗಳಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
E20 ಪೆಟ್ರೋಲ್ ಕುರಿತು ನಡೆಯುತ್ತಿರುವ ಟೀಕೆಗಳಿಗೆ ಪ್ರತಿಕ್ರಿಯಿಸಿದ ಗಡ್ಕರಿ, ಎಥನಾಲ್ ಮಿಶ್ರಿತ ಇಂಧನವನ್ನು ಭಾರತ ಮಾತ್ರವಲ್ಲ, ಅನೇಕ ದೇಶಗಳು ವರ್ಷಗಳಿಂದ ಬಳಸುತ್ತಿವೆ. ಎಲ್ಲ ಅಗತ್ಯ ಪರೀಕ್ಷೆಗಳನ್ನು ಪೂರ್ಣಗೊಳಿಸಿದ ನಂತರವೇ ಭಾರತದಲ್ಲಿ E20 ಪೆಟ್ರೋಲ್ ಪರಿಚಯಿಸಲಾಗಿದೆ ಎಂದು ಹೇಳಿದರು.
ಎಂಜಿನ್ ಹಾನಿಯಾಗುತ್ತಿದೆ ಎಂಬ ಪ್ರಚಾರ ಸಂಪೂರ್ಣ ಸುಳ್ಳು
ವಾಹನಗಳು E20 ಪೆಟ್ರೋಲ್ ಬಳಕೆಯಿಂದ ದುರಸ್ತಿ ಕೇಂದ್ರಗಳಿಗೆ ಹೋಗುತ್ತಿವೆ ಅಥವಾ ಎಂಜಿನ್ ಹಾನಿಯಾಗುತ್ತಿದೆ ಎಂಬ ಪ್ರಚಾರ ಸಂಪೂರ್ಣ ಸುಳ್ಳು ಎಂದು ಅವರು ಹೇಳಿದರು. “E20 ಬಳಕೆಯಿಂದ ಸಮಸ್ಯೆ ಎದುರಿಸಿದ ಒಂದೇ ಒಂದು ಕಾರನ್ನು ತೋರಿಸಿ” ಎಂದು ಸವಾಲು ಹಾಕಿದ ಗಡ್ಕರಿ, ಇಂತಹ ವದಂತಿಗಳನ್ನು ಉದ್ದೇಶಪೂರ್ವಕವಾಗಿ ಹರಡಲಾಗುತ್ತಿದೆ ಎಂದು ಆರೋಪಿಸಿದರು.
ವಿದೇಶಿ ತೈಲ ಆಮದು ಕಡಿಮೆ ಮಾಡುವ ಉದ್ದೇಶ
ದೇಶದ ವಿದೇಶಿ ಕಚ್ಚಾ ತೈಲ ಅವಲಂಬನೆಯನ್ನು ಕಡಿಮೆ ಮಾಡುವ ಜೊತೆಗೆ, ಕಾರ್ಬನ್ ಹೊರಸೂಸುವಿಕೆಯನ್ನು ತಗ್ಗಿಸಿ ಪರಿಸರ ಸಂರಕ್ಷಣೆಗೆ ಸಹಕಾರಿಯಾಗುವ ಉದ್ದೇಶದಿಂದ E20 ಇಂಧನವನ್ನು ಉತ್ತೇಜಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು. ಕಬ್ಬು, ಜೋಳ, ಅಕ್ಕಿ ಮೊದಲಾದ ಜೈವಿಕ ಮೂಲಗಳಿಂದ ಉತ್ಪಾದಿಸಲಾದ ಎಥನಾಲ್‌ನ್ನು ಪೆಟ್ರೋಲ್‌ಗೆ ಮಿಶ್ರಣ ಮಾಡಿ E20 ಇಂಧನ ತಯಾರಿಸಲಾಗುತ್ತದೆ ಎಂದರು.
ಕುಟುಂಬದ ಉದ್ಯಮಗಳ ಬಗ್ಗೆ ಸ್ಪಷ್ಟನೆ
ತಮ್ಮ ಕುಟುಂಬದ ಕಂಪನಿಗಳು ಎಥನಾಲ್ ಉತ್ಪಾದಿಸುತ್ತಿರುವುದರಿಂದಲೇ E20 ಪೆಟ್ರೋಲ್‌ಗೆ ಪ್ರೋತ್ಸಾಹ ನೀಡುತ್ತಿದ್ದಾರೆ ಎಂಬ ಆರೋಪಗಳನ್ನು ಗಡ್ಕರಿ ತಳ್ಳಿಹಾಕಿದರು. ತಮ್ಮ ಕುಟುಂಬಕ್ಕೆ ಸಕ್ಕರೆ ಕಾರ್ಖಾನೆಗಳಿದ್ದರೂ, ಅವರ ವ್ಯವಹಾರ ಎಥನಾಲ್ ಉತ್ಪಾದನೆಯ ಮೇಲೆ ಅವಲಂಬಿತವಾಗಿಲ್ಲ ಎಂದು ಸ್ಪಷ್ಟಪಡಿಸಿದರು.
ಹೈಡ್ರೋಜನ್ ವಾಹನಗಳ ಬಳಕೆಗೆ ಕರೆ
ಸ್ವಚ್ಛ ಸಾರಿಗೆ ಕ್ಷೇತ್ರದಲ್ಲಿ ಹೈಡ್ರೋಜನ್ ಇಂಧನವೇ ಮುಂದಿನ ದೊಡ್ಡ ಹೆಜ್ಜೆ ಎಂದು ಅಭಿಪ್ರಾಯಪಟ್ಟ ಗಡ್ಕರಿ, ತಾವು ವೈಯಕ್ತಿಕವಾಗಿ ಎಲೆಕ್ಟ್ರಿಕ್, ಫ್ಲೆಕ್ಸ್-ಫ್ಯುಯೆಲ್ ಹಾಗೂ ಹೈಡ್ರೋಜನ್ ವಾಹನಗಳನ್ನು ಬಳಸುತ್ತಿದ್ದೇನೆ ಎಂದರು. ತಮ್ಮ ಮನೆಯಲ್ಲಿ ಈ ಮೂರು ಮಾದರಿಯ ವಾಹನಗಳೂ ಇವೆ. ಆಸಕ್ತರು ಬಂದು ಅವುಗಳಲ್ಲಿ ಪ್ರಯಾಣಿಸಿ ತಂತ್ರಜ್ಞಾನದ ಅನುಭವ ಪಡೆಯಬಹುದು ಎಂದು ಹೇಳಿದರು.ಹೈಡ್ರೋಜನ್ ಕಾರಿನಲ್ಲಿ ಪ್ರಯಾಣಿಸುವ ಅನುಭವವು ಅತ್ಯುತ್ತಮವಾಗಿದ್ದು, ಅದು ಐಷಾರಾಮಿ ಕಾರುಗಳಿಗೂ ಸಮಾನ ಅಥವಾ ಅದಕ್ಕಿಂತ ಉತ್ತಮವಾಗಿದೆ ಎಂದು ಗಡ್ಕರಿ ತಿಳಿಸಿದರು.
ಕಳೆದ ಕೆಲವು ತಿಂಗಳುಗಳಿಂದ E20 ಪೆಟ್ರೋಲ್ ಕುರಿತು ಹಲವು ವದಂತಿಗಳು ಹರಿದಾಡುತ್ತಿವೆ. ಆದರೆ E20 ಇಂಧನದಿಂದ ವಾಹನಗಳು ಹಾಳಾಗುತ್ತವೆ ಎಂಬುದಕ್ಕೆ ಯಾವುದೇ ವೈಜ್ಞಾನಿಕ ಅಥವಾ ಅಧಿಕೃತ ಸಾಕ್ಷ್ಯಗಳಿಲ್ಲ ಎಂದು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಪುನರುಚ್ಚರಿಸಿದ್ದಾರೆ. ಸರ್ಕಾರದ ಪ್ರಕಾರ, ಪರಿಸರ ಸಂರಕ್ಷಣೆ ಮತ್ತು ಇಂಧನ ಸ್ವಾವಲಂಬನೆಗಾಗಿ E20 ಮಹತ್ವದ ಹೆಜ್ಜೆಯಾಗಿದೆ.
