ಬೆಂಗಳೂರು: ಎಷ್ಟೇ ವ್ಯಾಯಾಮ ಮಾಡಿದರೂ, ಊಟ ಕಡಿಮೆ ಮಾಡಿದರೂ ತೂಕ ಇಳಿಯುತ್ತಿಲ್ಲ ಎಂದು ಬೇಸರಗೊಂಡಿದ್ದೀರಾ? ವೇಯಿಂಗ್ ಸ್ಕೇಲ್ನಲ್ಲಿ ಮುಳ್ಳು ಒಂದೇ ಕಡೆ ನಿಂತುಬಿಟ್ಟಿದೆಯೇ? ಹಾಗಿದ್ದರೆ ನೀವು ಕೇವಲ ಕ್ಯಾಲೊರಿಗಳ ಬಗ್ಗೆ ಮಾತ್ರ ಯೋಚಿಸುತ್ತಿದ್ದೀರಿ ಎಂದರ್ಥ. ತೂಕ ಇಳಿಕೆ ಸ್ಥಗಿತಗೊಳ್ಳಲು (Weight Loss Plateau) ನಮ್ಮ ದೇಹದ ಒಳಗಿನ ಕೆಲವು ಗುಪ್ತ ಕಾರಣಗಳೇ ಹೊಣೆ ಎನ್ನುತ್ತಾರೆ ತಜ್ಞರು.
ಡಾ. ಥಾಮಸ್ ಪಾಲೋಸ್ಕಿ ಅವರ ಪ್ರಕಾರ ತೂಕ ಇಳಿಕೆಗೆ ಕೇವಲ ಜಿಮ್ ಅಷ್ಟೇ ಸಾಕಾಗಲ್ಲ. ಈ ಕೆಳಗಿನ ಅಂಶಗಳ ಮೇಲೆ ಗಮನವಿಡಿ:
ಜಿಮ್ ಹೊರಗಿನ ಚಟುವಟಿಕೆ: ನೀವು ಜಿಮ್ನಲ್ಲಿ ಒಂದು ಗಂಟೆ ಬೆವರಿಸಿದರೂ, ಉಳಿದ ಸಮಯದಲ್ಲಿ ಸೋಫಾ ಮೇಲೆ ಕುಳಿತಿದ್ದರೆ ಪ್ರಯೋಜನವಿಲ್ಲ. ಮನೆಯ ಸಣ್ಣಪುಟ್ಟ ಕೆಲಸ, ಓಡಾಟ ಕಡಿಮೆಯಾದರೆ ತೂಕ ಇಳಿಕೆ ನಿಧಾನವಾಗುತ್ತದೆ.
ನಿದ್ರೆ ಎಂಬ ಮ್ಯಾಜಿಕ್: ನೀವು ಸರಿಯಾಗಿ ನಿದ್ರೆ ಮಾಡದಿದ್ದರೆ ದೇಹಕ್ಕೆ ಹೆಚ್ಚು ಹಸಿವಾಗುತ್ತದೆ. ನಿದ್ರೆಯಿಲ್ಲದ ವ್ಯಕ್ತಿ ದಿನಕ್ಕೆ ಸುಮಾರು 300 ಕ್ಯಾಲೊರಿ ಅಧಿಕ ಆಹಾರ ಸೇವಿಸುತ್ತಾನೆ ಎಂದು ಸಂಶೋಧನೆ ಹೇಳುತ್ತದೆ.
ಪ್ಯಾಕೆಟ್ ಫುಡ್ ಗೆ ನೋ ಅನ್ನಿ: ಈ ಅಲ್ಟ್ರಾ-ಪ್ರೊಸೆಸ್ಡ್ ಆಹಾರಗಳು ನಿಮ್ಮ ಮೆಟಬಾಲಿಸಂ ಅನ್ನು ಹಾಳುಮಾಡುತ್ತವೆ. ಇವುಗಳ ಸೇವನೆಯಿಂದ ದಿನಕ್ಕೆ ಸುಮಾರು 500 ಕ್ಯಾಲೊರಿ ಅಧಿಕವಾಗಿ ದೇಹ ಸೇರಬಹುದು.
https://www.instagram.com/p/DWyp68zCObX/?utm_source=ig_web_copy_link&igsh=NTc4MTIwNjQ2YQ==
ಇನ್ಸುಲಿನ್ ಮತ್ತು ಹಾರ್ಮೋನ್ ಆಟ: ಇನ್ಸುಲಿನ್ ಪ್ರತಿರೋಧ ಅಥವಾ ಮಹಿಳೆಯರಲ್ಲಿ ಕಾಡುವ PCOS ಮತ್ತು ಋತುಬಂಧದ (Menopause) ಬದಲಾವಣೆಗಳು ಹೊಟ್ಟೆಯ ಭಾಗದಲ್ಲಿ ಕೊಬ್ಬು ಕರಗದಂತೆ ತಡೆಯುತ್ತವೆ.
ಔಷಧಿಗಳ ಸೈಡ್ ಎಫೆಕ್ಟ್: ನೀವು ಬಳಸುವ ಬಿಪಿ ಮಾತ್ರೆಗಳು ಅಥವಾ ಖಿನ್ನತೆ-ನಿರೋಧಕ ಔಷಧಿಗಳು ಸಹ ತೂಕ ಇಳಿಕೆಗೆ ಅಡ್ಡಿಪಡಿಸುತ್ತಿರಬಹುದು.
ಜೀವಕೋಶಗಳ ಶಕ್ತಿ: ನಮ್ಮ ಜೀವಕೋಶದ ಮೈಟೊಕಾಂಡ್ರಿಯ ಸರಿಯಾಗಿ ಕೆಲಸ ಮಾಡದಿದ್ದರೆ ಶಕ್ತಿ ಉತ್ಪಾದನೆ ಕುಂಠಿತವಾಗಿ ತೂಕ ಇಳಿಯುವುದು ನಿಂತುಹೋಗುತ್ತದೆ.
