ದೆಹಲಿ: ರಾಜಧಾನಿಯಲ್ಲಿ ಇತ್ತೀಚೆಗೆ ನಡೆದ ಪ್ರತಿಭಟನಾ ರಾಲಿಯೊಂದರಲ್ಲಿ ಸುಧಾರಿತ ತಂತ್ರಜ್ಞಾನ ಮತ್ತು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಕಣ್ಗಾವಲು ವ್ಯವಸ್ಥೆಯು ಭದ್ರತಾ ಸಿಬ್ಬಂದಿಗೆ ದೊಡ್ಡ ಮಟ್ಟದ ಆಘಾತಕಾರಿ ಮಾಹಿತಿ ನೀಡಿದೆ. ಮುಖ ಗುರುತಿಸುವಿಕೆ ವ್ಯವಸ್ಥೆ (FRS) ಹಾಗೂ ಅಪರಾಧ ದತ್ತಾಂಶಗಳ (Criminal Database) ಮೂಲಕ ನಡೆಸಿದ ತಪಾಸಣೆಯಲ್ಲಿ, ಪ್ರತಿಭಟನೆಯಲ್ಲಿ ಕ್ರಿಮಿನಲ್ ಹಿನ್ನೆಲೆಯುಳ್ಳ ಸುಮಾರು 2,900 ಜನರು ಪಾಲ್ಗೊಂಡಿರುವುದು ಪತ್ತೆಯಾಗಿದೆ.
ದೆಹಲಿ ಪೊಲೀಸರು ಮುಖ ಗುರುತಿಸುವಿಕೆ ವ್ಯವಸ್ಥೆಯ ವ್ಯಾನ್ಗಳು ಮತ್ತು ‘ಅಪರಾಧ- ದತ್ತಾಂಶ ಹೊಂದಾಣಿಕೆಯಂತಹ ಅತ್ಯಾಧುನಿಕ ತಂತ್ರಜ್ಞಾನವನ್ನು ಈ ಕಾರ್ಯಾಚರಣೆಯಲ್ಲಿ ಬಳಸಿಕೊಂಡಿದ್ದಾರೆ.
ದತ್ತಾಂಶ ಹೊಂದಾಣಿಕೆ ಮತ್ತು ದಾಖಲೆಗಳ ಪರಿಶೀಲನೆಯ ಮೂಲಕ ಒಟ್ಟು 2,873 ಕ್ರಿಮಿನಲ್ ಹಿನ್ನೆಲೆಯುಳ್ಳ ವ್ಯಕ್ತಿಗಳನ್ನು ಯಶಸ್ವಿಯಾಗಿ ಗುರುತಿಸಲಾಗಿದೆ.ದೆಹಲಿಯ ಹೊರವಲಯ, ವಾಯುವ್ಯ, ಈಶಾನ್ಯ, ಪೂರ್ವ, ನೈಋತ್ಯ ಹಾಗೂ ರೈಲ್ವೇ ಜಿಲ್ಲೆ ಸೇರಿದಂತೆ ನಾನಾ ಭಾಗಗಳಿಂದ ಈ ವ್ಯಕ್ತಿಗಳು ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿರುವುದು ವಿಶ್ಲೇಷಣೆಯಿಂದ ದೃಢಪಟ್ಟಿದೆ.
ಗಂಭೀರ ಅಪರಾಧ ಹಿನ್ನೆಲೆ ಹೊಂದಿದ್ದ ನೂರಾರು ಮಂದಿ
ಗುರುತಿಸಲ್ಪಟ್ಟ 2,873 ವ್ಯಕ್ತಿಗಳಲ್ಲಿ 989 ಜನರು ಘೋರ ಅಪರಾಧಗಳ ಗಂಭೀರ ಇತಿಹಾಸ ಹೊಂದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇವರಲ್ಲಿ ಪ್ರಮುಖವಾಗಿ,101 ಜನ ಕೊಲೆ ಆರೋಪಿಗಳು ಮತ್ತು 62 ಜನ ಕೊಲೆ ಯತ್ನದ ಆರೋಪಿಗಳು.61 ಅತ್ಯಾಚಾರ ಆರೋಪಿಗಳು, 25 ಲೈಂಗಿಕ ಕಿರುಕುಳ ಆರೋಪಿಗಳು ಹಾಗೂ ಪೋಕ್ಸೊ (POCSO) ಕಾಯ್ದೆಯಡಿ ಪ್ರಕರಣ ದಾಖಲಾದ 6 ಮಂದಿ ಇದರಲ್ಲಿದ್ದಾರೆ.
284 ದರೋಡೆಕೋರರು, 135 ಕಳ್ಳತನ ಪ್ರಕರಣಗಳ ಆರೋಪಿಗಳು, 229 ಶಸ್ತ್ರಾಸ್ತ್ರ ಕಾಯ್ದೆ ಮತ್ತು 67 ಎನ್ಡಿಪಿಎಸ್ (NDPS – ಮಾದಕವಸ್ತು) ಕಾಯ್ದೆಯಡಿ ದಾಖಲಾದ ಆರೋಪಿಗಳು ಸೇರಿದ್ದಾರೆ.
ಪುನರಾವರ್ತಿತ ಅಪರಾಧಿಗಳ ಉಪಸ್ಥಿತಿ: ಭದ್ರತಾ ಪಡೆಗಳಲ್ಲಿ ಆತಂಕ
ಈ ಕಾರ್ಯಾಚರಣೆಯಲ್ಲಿ ಪೊಲೀಸರನ್ನು ಹೆಚ್ಚು ಚಿಂತೆಗೀಡು ಮಾಡಿರುವುದು ಪುನರಾವರ್ತಿತ ಅಪರಾಧಿಗಳ ಉಪಸ್ಥಿತಿ. ಕೆಲವು ಕೊಲೆ ಮತ್ತು ದರೋಡೆ ಪ್ರಕರಣಗಳ ಆರೋಪಿಗಳ ಮೇಲೆ ಕನಿಷ್ಠ ಹತ್ತಕ್ಕೂ ಹೆಚ್ಚು ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿವೆ. ಇಂತಹ ವ್ಯಕ್ತಿಗಳು ದೊಡ್ಡ ಮಟ್ಟದ ಸಾರ್ವಜನಿಕ ಸಭೆಗಳನ್ನು ತಮ್ಮ ಅತಿರೇಕದ ಚಟುವಟಿಕೆಗಳಿಗೆ ಬಳಸಿಕೊಳ್ಳುವಲ್ಲಿ ನುರಿತವರಾಗಿದ್ದಾರೆ ಎಂದು ತನಿಖಾಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಶಾಂತಿಯುತ ಪ್ರಜಾಸತ್ತಾತ್ಮಕ ಚಳುವಳಿಗಳು ಅಥವಾ ವಿದ್ಯಾರ್ಥಿ ಪ್ರತಿಭಟನೆಗಳ ಮುಖವಾಡದ ಹಿಂದೆ ಅನುಭವಿ ಸಮಾಜ ವಿರೋಧಿ ಶಕ್ತಿಗಳು ನುಸುಳುತ್ತಿರುವುದಕ್ಕೆ ಈ ಘಟನೆ ಸ್ಪಷ್ಟ ನಿದರ್ಶನವಾಗಿದೆ ಎಂದು ಭದ್ರತಾ ಆಧಿಕಾರಿಗಳು ಎಚ್ಚರಿಸಿದ್ದಾರೆ.
ದಟ್ಟವಾದ ಜನಸಂದಣಿಯ ವಾತಾವರಣದಲ್ಲಿ ಇಂತಹ ಕ್ರಿಮಿನಲ್ ಶಕ್ತಿಗಳು ಸಣ್ಣದೊಂದು ಘರ್ಷಣೆಯನ್ನೂ ಸಹ ದೊಡ್ಡ ಮಟ್ಟದ ಗಲಭೆ ಅಥವಾ ಹಿಂಸಾಚಾರವಾಗಿ ಬದಲಾಯಿಸುವ “ಸ್ಫೋಟಕ ಮಿಶ್ರಣ”ವನ್ನು ಸೃಷ್ಟಿಸಬಲ್ಲವು ಎಂದು ಪೊಲೀಸ್ ಮೂಲಗಳು ಆತಂಕ ವ್ಯಕ್ತಪಡಿಸಿವೆ.
