ಬೆಂಗಳೂರು: ರಾಜ್ಯ ರಾಜಕಾರಣದಲ್ಲಿ ತೀವ್ರ ಕುತೂಹಲ ಮೂಡಿಸಿದ್ದ ರಾಜ್ಯದ ಎರಡು ಪ್ರಮುಖ ವಿಧಾನಸಭಾ ಕ್ಷೇತ್ರಗಳಾದ ದಾವಣಗೆರೆ ದಕ್ಷಿಣ ಮತ್ತು ಬಾಗಲಕೋಟೆಯ ಉಪಚುನಾವಣೆ ಮತದಾನ ಮುಕ್ತಾಯವಾಗಿದ್ದು, ಈಗ ಎಲ್ಲರ ಕಣ್ಣು ಅಭ್ಯರ್ಥಿಗಳ ಸೋಲು-ಗೆಲುವಿನ ಲೆಕ್ಕಾಚಾರದ ಮೇಲೆ ನೆಟ್ಟಿದೆ. ಕಣದಲ್ಲಿದ್ದ ಘಟಾನುಘಟಿ ನಾಯಕರ ಭವಿಷ್ಯ ಈಗ ಮತಯಂತ್ರಗಳಲ್ಲಿ (EVM) ಭದ್ರವಾಗಿದೆ.
ಎಲ್ಲೆಲ್ಲಿ ಎಷ್ಟು ಮತದಾನ?
ಎರಡೂ ಕ್ಷೇತ್ರಗಳಲ್ಲಿ ಮತದಾರರು ಸಮಾನ ಉತ್ಸಾಹದಿಂದ ಮತಗಟ್ಟೆಗೆ ಬಂದು ಹಕ್ಕು ಚಲಾಯಿಸಿದ್ದಾರೆ. ಶೇಕಡಾವಾರು ಮತದಾನದ ವಿವರ ಹೀಗಿದೆ:
ಬಾಗಲಕೋಟೆ: ಶೇ 68.73 ರಷ್ಟು ಮತದಾನ ದಾಖಲಾಗಿದೆ.
ದಾವಣಗೆರೆ ದಕ್ಷಿಣ: ಶೇ 68.55 ರಷ್ಟು ಮತದಾನವಾಗಿದೆ.
ಎರಡೂ ಕ್ಷೇತ್ರಗಳಲ್ಲಿ ಮತದಾನದ ಪ್ರಮಾಣ ಬಹುತೇಕ ಸಮಾನವಾಗಿದ್ದು, ಯಾರ ಪಾಲಿಗೆ ಇದು ವರದಾನವಾಗಲಿದೆ ಎಂಬ ಲೆಕ್ಕಾಚಾರ ಶುರುವಾಗಿದೆ.
ಮೇ 4ಕ್ಕೆ ಸಿಗಲಿದೆ ಉತ್ತರ
ಕಳೆದ 15 ದಿನಗಳಿಂದ ನಡೆದಿದ್ದ ಅಬ್ಬರದ ಪ್ರಚಾರ, ಆರೋಪಗಳ ಸುರಿಮಳೆ ಹಾಗೂ ಮತದಾರನ ಮನವೊಲಿಸುವ ಕಸರತ್ತುಗಳಿಗೆ ಈಗ ತೆರೆಬಿದ್ದಿದೆ. ಅಭ್ಯರ್ಥಿಗಳ ಈ ಹದಿನೈದು ದಿನಗಳ ನಿದ್ದೆಗೆಡಿಸಿದ ಶ್ರಮದ ಫಲಿತಾಂಶ ಮೇ 4ರಂದು ಅಧಿಕೃತವಾಗಿ ಹೊರಬೀಳಲಿದೆ. ಅಂದು ಇಡೀ ರಾಜ್ಯದ ಕುತೂಹಲಕ್ಕೆ ಅಂತಿಮ ತೆರೆ ಬೀಳಲಿದೆ.
ಬಾಗಲಕೋಟೆಯಲ್ಲಿ ಹಣದ ಸದ್ದು: ಬಾಗಲಕೋಟೆಯ ರಾಜೀವ್ ಗಾಂಧಿ ಕಾಲೋನಿಯಲ್ಲಿ ಜಾಫರ್ ಬೇಫಾರಿ ಎಂಬಾತ ಹಣ ಹಂಚುತ್ತಿದ್ದ ವಿಡಿಯೋ ವೈರಲ್ ಆಗಿದ್ದು, ನವನಗರ ಠಾಣೆಯಲ್ಲಿ ಕೇಸ್ ದಾಖಲಾಗಿದೆ. ಇನ್ನೊಂದೆಡೆ ವಾಂಬೆ ಕಾಲೋನಿಯಲ್ಲಿ ಮಹಿಳೆಯೊಬ್ಬರು ಕಾಂಗ್ರೆಸ್ನವರು 500 ರೂ. ನೀಡಿದ್ದಾರೆ ಎಂದು ಹಣ ಪ್ರದರ್ಶಿಸಿದ್ದು ಭಾರಿ ಚರ್ಚೆಗೆ ಕಾರಣವಾಗಿದೆ.
ಹಿಂಬಾಗಿಲಿಂದ ಎಸ್ಕೇಪ್: ಹಳೇಪೇಟೆಯಲ್ಲಿ ಹಣ ಹಂಚಲು ಮನೆಗೆ ನುಗ್ಗಿದ ಕಾಂಗ್ರೆಸ್ ಕಾರ್ಯಕರ್ತರನ್ನು ಬಿಜೆಪಿ ಕಾರ್ಯಕರ್ತರು ಹೊರಗಿನಿಂದ ಲಾಕ್ ಮಾಡಿದ್ದರು. ಆದರೆ ಚಾಲಾಕಿ ಕಾರ್ಯಕರ್ತರು ಹಿಂಬಾಗಿಲಿನಿಂದ ಓಡಿ ಹೋಗುವಲ್ಲಿ ಯಶಸ್ವಿಯಾಗಿದ್ದಾರೆ.
ದಾವಣಗೆರೆಯಲ್ಲಿ ಕೋಳಿ ಪಾಲಿಟಿಕ್ಸ್: ದಾವಣಗೆರೆಯ ಎಸ್ಪಿಎಸ್ ನಗರದಲ್ಲಿ ಹಣ ಹಂಚಿಕೆಯ ವಿಡಿಯೋ ವೈರಲ್ ಆಗಿದ್ದರೆ, ಮತ್ತೊಂದೆಡೆ ಕಾಂಗ್ರೆಸ್ನವರು ಮತಕ್ಕಾಗಿ ಕೋಳಿ ಹಂಚಿದ್ದಾರೆ ಎಂದು ಬಾಲಕರು ಹೇಳುತ್ತಿರುವ ವಿಡಿಯೋವನ್ನು ಬಿಜೆಪಿ ಮುಖಂಡ ವಿನಯ್ ಕುಮಾರ್ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಸದ್ಯಕ್ಕೆ ಅಭ್ಯರ್ಥಿಗಳ ಜಾತಕ ಇವಿಎಂ (EVM) ಸೇರಿದೆ. ಮತದಾನದ ಈ ಅಂಕಿ-ಅಂಶಗಳು ಮತ್ತು ಹರಿದಾಡುತ್ತಿರುವ ಆಮಿಷದ ವಿಡಿಯೋಗಳು ಸೋಲು-ಗೆಲುವಿನ ಮೇಲೆ ಎಷ್ಟರ ಮಟ್ಟಿಗೆ ಪ್ರಭಾವ ಬೀರುತ್ತವೆ ಎಂಬುದು ಫಲಿತಾಂಶದ ದಿನ ಪ್ರಕಟವಾಗಲಿದೆ.
