ಬೆಂಗಳೂರು: ತಮ್ಮ ಭವಿಷ್ಯಕ್ಕಾಗಿ ರಿಸ್ಕ್ ಇಲ್ಲದೆ ಹಣ ಉಳಿಸಬೇಕು ಎಂದು ಬಯಸುವವರಿಗೆ ಭಾರತ ಸರ್ಕಾರದ ಸಾರ್ವಜನಿಕ ಭವಿಷ್ಯ ನಿಧಿ ಅಥವಾ ಪಿಪಿಎಫ್ (PPF) ಯೋಜನೆ ಒಂದು ಅದ್ಭುತ ವರದಾನ. ಬ್ಯಾಂಕ್ ಬಡ್ಡಿದರಗಳಿಗಿಂತ ಹೆಚ್ಚಿನ ಲಾಭ ಮತ್ತು ಗ್ಯಾರಂಟಿ ಸುರಕ್ಷತೆ ನೀಡುವುದರಲ್ಲಿ ಈ ಸ್ಕೀಮ್ ಸದಾ ಮುಂಚೂಣಿಯಲ್ಲಿದೆ.
ಬಡ್ಡಿಯೇ ಬರೋಬ್ಬರಿ 9.69 ಲಕ್ಷ ರೂಪಾಯಿ
ಒಬ್ಬ ವ್ಯಕ್ತಿ ಪ್ರತಿ ವರ್ಷ ತನ್ನ ಪಿಪಿಎಫ್ ಖಾತೆಗೆ ₹80,000 ಹಣವನ್ನು (ಅಂದರೆ ತಿಂಗಳಿಗೆ ಸುಮಾರು ₹6,600 ಅಥವಾ ದಿನಕ್ಕೆ ಅಂದಾಜು ₹220) ಜಮೆ ಮಾಡುತ್ತಾ ಬಂದರೆ, 15 ವರ್ಷಗಳ ಲಾಕ್-ಇನ್ ಅವಧಿ ಮುಗಿದಾಗ ದೊಡ್ಡ ಮೊತ್ತದ ನಿಧಿ ಅವರ ಕೈಸೇರುತ್ತದೆ.
ನಿಮ್ಮ ಒಟ್ಟು ಹೂಡಿಕೆ: ₹12,00,000 (12 ಲಕ್ಷ ರೂ.)
ನಿಮಗೆ ಸಿಗುವ ಬಡ್ಡಿ: ₹9,69,712 (ಸುಮಾರು 9.7 ಲಕ್ಷ ರೂ.)
ಒಟ್ಟು ಮೆಚ್ಯೂರಿಟಿ ಮೊತ್ತ: ₹21,69,712
ತೆರಿಗೆಯ ಟೆನ್ಷನ್ ಇಲ್ಲ
ಪಿಪಿಎಫ್ ಯೋಜನೆಯ ಅತಿ ದೊಡ್ಡ ಪ್ಲಸ್ ಪಾಯಿಂಟ್ ಎಂದರೆ ಇದರ ‘ತೆರಿಗೆ ಮುಕ್ತ’ ಸೌಲಭ್ಯ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80C ಅಡಿಯಲ್ಲಿ ನೀವು ಹೂಡಿಕೆ ಮಾಡುವ ಹಣಕ್ಕೆ ತೆರಿಗೆ ವಿನಾಯಿತಿ ಸಿಗುತ್ತದೆ. ಅಷ್ಟೇ ಅಲ್ಲ, ನೀವು ಪಡೆಯುವ ಬಡ್ಡಿ ಮತ್ತು 15 ವರ್ಷಗಳ ನಂತರ ಸಿಗುವ ಒಟ್ಟು ಮೊತ್ತಕ್ಕೂ ಒಂದು ರೂಪಾಯಿ ತೆರಿಗೆ ಕಟ್ಟುವ ಅವಶ್ಯಕತೆ ಇಲ್ಲ
ಹೂಡಿಕೆದಾರರು ಗಮನಿಸಬೇಕಾದ ಮುಖ್ಯಾಂಶಗಳು:
ಬಡ್ಡಿದರ: ಪ್ರಸ್ತುತ ಸರ್ಕಾರವು ವಾರ್ಷಿಕ 7.1 ಶೇಕಡಾ ಬಡ್ಡಿಯನ್ನು ನೀಡುತ್ತಿದೆ.
ಹೂಡಿಕೆಯ ಮಿತಿ: ವರ್ಷಕ್ಕೆ ಕನಿಷ್ಠ ₹500 ರಿಂದ ಗರಿಷ್ಠ ₹1.50 ಲಕ್ಷದವರೆಗೆ ಹೂಡಿಕೆ ಮಾಡಬಹುದು.
ಯಾರು ಖಾತೆ ತೆರೆಯಬಹುದು?: ಉದ್ಯೋಗಿಗಳು, ಸಣ್ಣ ವ್ಯಾಪಾರಿಗಳು, ಗೃಹಿಣಿಯರು ಮಾತ್ರವಲ್ಲದೆ ಮಕ್ಕಳ ಹೆಸರಲ್ಲೂ ಪೋಷಕರು ಖಾತೆ ತೆರೆಯಬಹುದು.
